ఐడీబీఐ బ్యాంకును అమ్మకానికి పెట్టడం అన్యాయమని లోక్‌సభలో ప్రతిపక్ష నేత రాహుల్ గాంధీ వ్యాఖ్యానించారు. కెనడాకు చెందిన ఫెయిర్‌ఫాక్స్ సంస్థకు ఐడీబీఐ బ్యాంకును విక్రయించాలన్న కేంద్ర ప్రభుత్వ ప్రతిపాదనను ఆయన తప్పుబట్టారు. ప్రభుత్వ రంగ సంస్థను విక్రయానికి పెట్టడం ద్వారా ఉద్యోగుల ప్రయోజనాలను, హక్కులను దెబ్బతీస్తున్నారని కేంద్రంలోని నరేంద్ర మోదీ ప్రభుత్వంపై విమర్శలు చేశారు.
ఐడీబీఐ బ్యాంకు గత ఏడాది రూ.9,000 కోట్లకు పైగా లాభాలను ఆర్జించిందని రాహుల్ గుర్తుచేశారు. కొన్నేళ్లపాటు ఆర్థిక ఇబ్బందులు ఎదుర్కొన్న బ్యాంకును ఉద్యోగుల కృషి తిరిగి లాభాల బాట పట్టించిందని పేర్కొన్నారు. ఇలాంటి పరిస్థితుల్లో బ్యాంకును ప్రైవేటీకరించాల్సిన అవసరం ఏమొచ్చిందని ప్రశ్నించారు.
దేశ పారిశ్రామిక అభివృద్ధికి తోడ్పడాలనే లక్ష్యంతో కాంగ్రెస్ పార్టీ హయాంలో ఐడీబీఐని స్థాపించారని, మోదీ ప్రభుత్వ హయాంలో మాత్రం తొలుత బిడ్డింగ్ నిర్వహించి, ఆ తర్వాత ధర నిర్ణయించి విక్రయానికి సిద్ధమయ్యారని రాహుల్ వ్యాఖ్యానించారు. కాంగ్రెస్ ప్రభుత్వాల సమయంలో బ్యాంకులను ఏర్పాటు చేస్తే, ప్రస్తుత ప్రభుత్వం వాటిని విక్రయిస్తోందని ఎక్స్ వేదికగా విమర్శించారు. ఐడీబీఐ ఉద్యోగులకు తాను అండగా ఉంటానని ప్రకటించారు.
లాభాల్లో ఉన్న బ్యాంకును ఎందుకు విక్రయిస్తున్నారని, ప్రైవేటీకరణ జరిగితే తమ ఉద్యోగ భద్రత, ప్రయోజనాల పరిస్థితి ఏమిటని వారు ప్రశ్నించినట్లు తెలిపారు. ఈ అంశాన్ని తాను లోక్‌సభలో లేవనెత్తినా ప్రభుత్వం నుంచి సరైన సమాధానం రాలేదని పేర్కొన్నారు.
ఐడీబీఐ తొలుత దేశ పారిశ్రామికాభివృద్ధికి నిధులు సమకూర్చే కీలక అభివృద్ధి బ్యాంకుగా ప్రారంభమైందని, అనంతరం వాణిజ్య బ్యాంకుగా మారే క్రమంలో అనేక సవాళ్లను ఎదుర్కొందని రాహుల్ వివరించారు. అయినప్పటికీ ఉద్యోగుల అంకితభావం, కృషితో తిరిగి లాభాల బాట పట్టిందని అన్నారు.
కేంద్ర ప్రభుత్వం, భారత జీవిత బీమా సంస్థ (ఎల్ఐసీ) కలిపి ఐడీబీఐ బ్యాంకులో 95 శాతం వాటాను కలిగి ఉన్నాయని రాహుల్ తెలిపారు. ప్రతిపాదిత విక్రయం అనంతరం వీరి ఉమ్మడి వాటా 34 శాతానికి తగ్గిపోతుందని పేర్కొన్నారు. 2003లో పార్లమెంట్‌లో ఇచ్చిన హామీ ప్రకారం ఐడీబీఐ బ్యాంకులో ప్రభుత్వ వాటా కనీసం 51 శాతం ఉండాలని గుర్తుచేశారు. పార్లమెంట్‌కు ఇచ్చిన హామీ దేశ ప్రజలకు ఇచ్చిన హామీతో సమానమని అన్నారు.
బ్యాంకు ప్రైవేటీకరణ జరిగితే షెడ్యూల్డ్ కులాలు, షెడ్యూల్డ్ తెగలు, ఇతర వెనుకబడిన తరగతులకు అమలవుతున్న రిజర్వేషన్ రక్షణలు ఉద్యోగులకు దూరమయ్యే ప్రమాదం ఉందని రాహుల్ ఆందోళన వ్యక్తం చేశారు. ఇప్పటికే బలహీనపడిన ఉద్యోగుల సేవా నిబంధనలు, హక్కులకు ఉన్న మిగిలిన రక్షణలు కూడా తొలగిపోయే అవకాశం ఉందని పేర్కొన్నారు.
ప్రభుత్వ రంగం, ప్రైవేటు రంగం రెండూ సమాంతరంగా పనిచేస్తూ దేశాభివృద్ధికి తోడ్పడాలన్నదే కాంగ్రెస్ విధానమని రాహుల్ తెలిపారు. ప్రభుత్వ రంగ బ్యాంకులు విక్రయించాల్సిన ఆస్తులు కావని, దేశ నిర్మాణానికి ఉపయోగపడే సాధనాలని పేర్కొన్నారు. ఐడీబీఐ ఉద్యోగుల డిమాండ్లకు తన సంపూర్ణ మద్దతు ఉంటుందని, ఉద్యోగులంతా ఐక్యంగా, పట్టుదలతో తమ హక్కుల కోసం పోరాడాలని పిలుపునిచ్చారు.
