దక్షిణామ్నాయ శ్రీ శారదాపీఠం, శృంగేరి ఆధ్వర్యంలో ‘ధర్మ విజయ యాత్ర’ నిర్వహించనున్నారు. జగద్గురు శ్రీ విధుశేఖర భారతి సన్నిధానంవారు ఈ యాత్రలో భాగంగా దేశంలోని పలు రాష్ట్రాల్లో పర్యటించనున్నారు. నవంబర్ 19వ తేదీ నుంచి డిసెంబర్ 23వ తేదీ వరకు ఈ ధర్మ విజయ యాత్ర కొనసాగనుంది. కర్ణాటక, మహారాష్ట్ర, మధ్యప్రదేశ్, రాజస్థాన్, తెలంగాణ, ఆంధ్రప్రదేశ్ రాష్ట్రాల్లోని వివిధ ప్రాంతాలను సందర్శించేలా పర్యటన షెడ్యూల్‌ను రూపొందించారు.
శృంగేరి నుంచి ప్రారంభమయ్యే ఈ యాత్రలో భాగంగా పలు పుణ్యక్షేత్రాలు, ఆధ్యాత్మిక కేంద్రాలను జగద్గురువులు సందర్శించనున్నారు. నవంబర్ 19న విజయపురం చేరుకోవడంతో యాత్ర ప్రారంభ కార్యక్రమాలు మొదలవుతాయి. అనంతరం వివిధ ప్రాంతాల్లో పర్యటిస్తూ భక్తులకు దర్శనమివ్వనున్నారు. నవంబర్ చివరి వారంలో ఉజ్జయిని, భోపాల్ తదితర ప్రాంతాలు, డిసెంబర్‌లో హైదరాబాద్, రాజమహేంద్రవరం, విజయవాడ, గుంటూరు, కాకినాడ తదితర ప్రాంతాల్లో పర్యటనకు ఏర్పాట్లు చేసినట్లు ప్రకటించిన షెడ్యూల్‌లో పేర్కొన్నారు.
ఈ యాత్రలో భాగంగా వివిధ ప్రాంతాల్లో ధార్మిక కార్యక్రమాలు, ఆధ్యాత్మిక ప్రవచనాలు, భక్తులకు అనుగ్రహ భాషణాలు నిర్వహించనున్నారు. సనాతన ధర్మ పరిరక్షణ, భారతీయ ఆధ్యాత్మిక సంప్రదాయాల విశిష్టత, వేద సంస్కృతి ప్రాధాన్యతను ప్రజలకు తెలియజేయడం ఈ యాత్ర ముఖ్య ఉద్దేశంగా భావిస్తున్నారు. జగద్గురువుల పర్యటన సందర్భంగా ఆయా ప్రాంతాల్లోని భక్తులు, శృంగేరి శారదాపీఠం అనుయాయులు స్వాగత ఏర్పాట్లు చేసుకోనున్నారు.
డిసెంబర్ 23వ తేదీన కాకినాడ నుంచి శృంగేరికి చేరుకోవడంతో ఈ యాత్ర ముగియనుంది. యాత్రకు సంబంధించిన పూర్తి వివరాలు, తేదీలు, ప్రాంతాల వారీగా పర్యటన షెడ్యూల్‌ను శృంగేరి శారదాపీఠం విడుదల చేసింది. భక్తులు మరిన్ని వివరాల కోసం 08265-252525, 262626, 272727 నంబర్లను లేదా అధికారిక వెబ్‌సైట్ www.sringeri.net ను సంప్రదించవచ్చు.
