పోలీసులుగా చెప్పుకున్న ముగ్గురు దుర్మార్గులు ఒక 17 ఏళ్ల బాలికపై అత్యాచారం చేశారు. న్యూఢిల్లీలోని కల్కాజీ ఆలయం సమీపంలోని ఆస్తా కుంజ్ పార్కులో ఈ దారుణ ఘటన జరిగింది. పోలీసులు తెలిపిన వివరాల ప్రకారం సోమవారం రాత్రి సుమారు 8.45 గంటలకు బాలికపై లైంగిక దాడి జరిగినట్లు పోలీస్ కంట్రోల్ రూమ్కు సమాచారం అందింది.
కాల్ రావడంతో అమర్ కాలనీ పోలీస్ స్టేషన్ ఎస్హెచ్ఓ సిబ్బందితో కలిసి ఆస్తా కుంజ్ పార్కుకు చేరుకున్నారు. అక్కడ బాలిక తన స్నేహితుడితో కలిసి కనిపించింది. విచారణలో బాలిక తెలిపిన వివరాల ప్రకారం చూస్తే ఆమె తన స్నేహితుడితో కలిసి కల్కాజీ ఆలయానికి దర్శనం కోసం వెళ్లింది. అనంతరం గేట్ నంబర్ 7 ద్వారా ఆస్తా కుంజ్ పార్కులోకి ప్రవేశించారు.
ముగ్గురు వ్యక్తులు తాము పోలీసులమని చెప్పి బాలిక, ఆమె స్నేహితుడిని అడ్డుకున్నారని పోలీసులు తెలిపారు. అనంతరం బాలికను ఆమె స్నేహితుడి నుంచి వేరు చేసి పార్కులోని నిర్మానుష్య ప్రాంతానికి తీసుకెళ్లినట్లు ఆరోపణలు ఉన్నాయి. వారిలో ఆసిఫ్ అనే వ్యక్తి తుపాకీ, కత్తితో బాలికను బెదిరించి లైంగిక దాడికి పాల్పడినట్లు పోలీసులు పేర్కొన్నారు. మిగిలిన ఇద్దరు కూడా బాలికపై లైంగిక దాడికి పాల్పడినట్లు ఆమె ఫిర్యాదులో పేర్కొన్నట్లు తెలిపారు.
ఈ ఘటనపై అమర్ కాలనీ పోలీస్ స్టేషన్లో భారతీయ న్యాయ సంహితలోని 70(2), 61(2), 115(2), 351(3) సెక్షన్లతో పాటు పోక్సో చట్టంలోని 6, 17 సెక్షన్ల కింద కేసు నమోదు చేశారు. నిందితుల కోసం ప్రత్యేక పోలీసు బృందాలను ఏర్పాటు చేసి గాలింపు చేపట్టారు.
బాలికను, ఆమె స్నేహితుడిని నిందితులు బెదిరించినట్లు పోలీసులు వెల్లడించారు. బాలికకు ఎయిమ్స్ ఆసుపత్రిలో వైద్య పరీక్షలు నిర్వహించారు. మరోవైపు నేరస్థలాన్ని క్రైమ్ టీమ్, ఫోరెన్సిక్ సైన్స్ లేబొరేటరీ బృందాలు పరిశీలించి ఆధారాలను సేకరించాయి.
ఈ ఘటనకు సంబంధించి నిందితుల్లో ఒకరైన ఆసిఫ్ను పోలీసులు అదుపులోకి తీసుకున్నారు.
దర్యాప్తులో భాగంగా దక్షిణ-తూర్పు ఢిల్లీలోని అమర్ కాలనీ పరిధిలో డీఎం కార్యాలయ రోడ్డు సమీపంలో ఆసిఫ్ సంచరిస్తున్నట్లు ప్రత్యేక సిబ్బంది ఇన్స్పెక్టర్ రాజేందర్ దాగర్కు సమాచారం అందింది. దీంతో పోలీసులు అక్కడ మాటు వేసి అతడిని పట్టుకునేందుకు ప్రయత్నించారు.
ఆసిఫ్ను అడ్డుకున్న సమయంలో అతడు పోలీసులపై కాల్పులు జరిపాడు. మూడు రౌండ్లు కాల్చిన అతడిని లొంగిపోవాలని పోలీసులు హెచ్చరించినప్పటికీ కాల్పులు కొనసాగించినట్లు తెలిపారు. ఈ సమయంలో అతడు జరిపిన కాల్పుల్లో ఒక బుల్లెట్ హెడ్ కానిస్టేబుల్ రాజేశ్ ధరించిన బుల్లెట్ప్రూఫ్ జాకెట్ను తాకింది.
హెడ్ కానిస్టేబుల్ రెండు రౌండ్లు కాల్పులు జరిపినట్లు పోలీసులు తెలిపారు. అందులో ఒక బుల్లెట్ ఆసిఫ్ కుడి కాలికి తగిలింది. గాయపడిన ఆసిఫ్ను చికిత్స కోసం ఎయిమ్స్ ట్రామా సెంటర్కు తరలించారు. ఘటనాస్థలానికి క్రైమ్ టీమ్, ఫోరెన్సిక్ సైన్స్ లేబొరేటరీ బృందాలను రప్పించి ఆధారాలు సేకరించారు. కేసులో తదుపరి చట్టపరమైన చర్యలు కొనసాగుతున్నాయని, మిగిలిన నిందితుల కోసం దర్యాప్తు కొనసాగుతోందని పోలీసులు తెలిపారు.
