డిజిటల్ పేమెంట్లపై అదనపు రుసుము వసూలును వాయిదా వేస్తూ కేంద్ర ప్రభుత్వం నిర్ణయం తీసుకున్నది. పండుగల సీజన్‌ను దృష్టిలో ఉంచుకుని వ్యాపార లావాదేవీలపై ఈ రుసుమును దీపావళి తర్వాతే అమలు చేయాలని నిర్ణయించింది.
అక్టోబర్‌ 15 నుంచి ఈ విధానం అమల్లోకి రావాల్సి ఉండగా, తాజా నిర్ణయంతో వాయిదా పడింది. వచ్చే ఏడాది జనవరి వరకు అమలు వాయిదా పడే అవకాశం ఉన్నట్లు సమాచారం. అయితే జనవరి తేదీ అధికారికంగా ఖరారు కాలేదు.
సెప్టెంబర్‌ 15న ఎన్‌పీసీఐ ప్రకటించిన వివరాల ప్రకారం రూ.2,000 కంటే ఎక్కువ విలువ కలిగిన యూపీఐ చెల్లింపుల్లో ఎంపిక చేసిన వ్యక్తి నుంచి వ్యాపారికి జరిగే లావాదేవీలపై 0.4 శాతం రుసుము విధించాలని ప్రతిపాదించారు. అయితే వ్యక్తుల మధ్య జరిగే చెల్లింపులకు, రూ.2,000 లోపు వ్యాపార లావాదేవీలకు ఈ రుసుము వర్తించదు. మొత్తం వ్యక్తి నుంచి వ్యాపారికి జరిగే యూపీఐ లావాదేవీల్లో 95 శాతానికి పైగా రూ.2,000 లోపు చెల్లింపులే ఉన్నాయని నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ) పేర్కొంది.
రూ.75,000 లేదా అంతకంటే ఎక్కువ విలువ కలిగిన లావాదేవీలపై ప్రతి చెల్లింపునకు గరిష్ఠంగా రూ.300 మాత్రమే రుసుముగా వసూలు చేయాలన్నది ప్రతిపాదన. అయితే ఈ రుసుము ప్రతి యూపీఐ వినియోగదారుడి నుంచి నేరుగా వసూలు చేసే సాధారణ ఛార్జీ కాదని ప్రభుత్వం స్పష్టం చేసింది. ఇది ఎంపిక చేసిన వ్యాపార లావాదేవీలకు సంబంధించిన రుసుము మాత్రమేనని వివరించింది.
యూపీఐ చెల్లింపులపై రుసుము విధించే ప్రతిపాదనపై ప్రతిపక్షాలు విమర్శలు చేయడంతో ప్రభుత్వం వివరణ ఇచ్చింది. సంప్రదాయ క్రెడిట్‌ కార్డు లావాదేవీలపై సాధారణంగా 1.5 నుంచి 2.5 శాతం వరకు, డెబిట్‌ కార్డు లావాదేవీలపై గరిష్ఠంగా 0.9 శాతం వరకు రుసుములు ఉంటాయని పేర్కొంది. వాటితో పోలిస్తే యూపీఐపై ప్రతిపాదించిన 0.4 శాతం రుసుము తక్కువేనని తెలిపింది. వ్యాపారులు డిజిటల్ చెల్లింపులను స్వీకరించేందుకు అయ్యే ఖర్చును తగ్గించడంలో ఈ విధానం ఉపయోగపడుతుందని వివరించింది.
ప్రతి నెలా కోట్లాది మంది వినియోగదారులు యూపీఐ ద్వారా లావాదేవీలు నిర్వహిస్తున్న నేపథ్యంలో చెల్లింపుల వ్యవస్థను మరింత పటిష్ఠం చేయాల్సిన అవసరం ఉందని ప్రభుత్వం పేర్కొంది. సాంకేతిక మౌలిక సదుపాయాల అభివృద్ధి, సైబర్‌ భద్రత, కొత్త సేవల రూపకల్పన, వినియోగదారులకు మెరుగైన సేవలు అందించడం వంటి అవసరాల కోసం ఈ రుసుము ఉపయోగపడుతుందని తెలిపింది.
ఎండీఆర్‌ అనేది పన్ను కాదని, ప్రభుత్వం లేదా ఎన్‌పీసీఐ నేరుగా వసూలు చేసే మొత్తమూ కాదని ఆర్థిక మంత్రిత్వ శాఖ వివరించింది. చెల్లింపుల వ్యవస్థలో భాగస్వాములైన బ్యాంకులు, చెల్లింపు సేవల సంస్థలు తదితరులకు ఈ మొత్తం పంపిణీ అవుతుందని పేర్కొంది.
2020 నుంచి అమల్లో ఉన్న జీరో ఎండీఆర్‌ విధానానికి ముగింపు పలికి, యూపీఐ చెల్లింపుల వ్యవస్థ నిర్వహణకు అవసరమైన ఆదాయాన్ని సమకూర్చాలన్నది ఈ ప్రతిపాదన వెనుక ఉన్న ప్రధాన ఉద్దేశంగా ప్రభుత్వం పేర్కొంది. అయితే అదనపు రుసుము వల్ల వ్యాపారులపై, వినియోగదారులపై ప్రభావం ఎలా ఉంటుందన్న చర్చ కొనసాగుతోంది.
