ప్రతిపక్షాల ఒత్తిడికి కేంద్ర ఎన్నికల సంఘం లొంగిపోయింది. ఓటర్ల జాబితాలో కొత్తగా పేర్లు నమోదు చేసుకునే వారి కోసం ఉపయోగించే ఆన్లైన్ ఫారం-6లో ప్రత్యేక సమగ్ర ఓటర్ల జాబితా సవరణ (SIR) ప్రక్రియకు సంబంధించిన వివాదాస్పద డిక్లరేషన్ను కేంద్ర ఎన్నికల సంఘం ఉపసంహరించుకుంది. దీంతో ప్రత్యేక సమగ్ర సవరణ ప్రక్రియ పూర్తయిన రాష్ట్రాలతో పాటు, ఇంకా ఈ ప్రక్రియ ప్రారంభం కాని రాష్ట్రాల్లోనూ ఫారం-6లో అదనపు డిక్లరేషన్ను సమర్పించాల్సిన అవసరం ఉండదు.
కేంద్ర ఎన్నికల సంఘం పూర్తి స్థాయి సమావేశం సెప్టెంబర్ 26న నిర్వహించినట్లు సంబంధిత వర్గాలు తెలిపాయి. ఈ సమావేశంలో ఫారం-6లో ఎలాంటి మార్పులు చేయకూడదని ఏకగ్రీవంగా నిర్ణయించినట్లు వెల్లడించాయి. ప్రత్యేక సమగ్ర సవరణ ప్రక్రియ కొనసాగుతున్న సమయంలోనూ, ఆ ప్రక్రియ లేని సమయంలోనూ ఫారం-6లో ఎలాంటి మార్పులు ఉండవని నిర్ణయించినట్లు పేర్కొన్నాయి.
SIR జరుగుతున్న రాష్ట్రాల్లో కొత్త ఓటర్ల నమోదు కోసం ఫారం-6తో పాటు అదనపు డిక్లరేషన్ను సమర్పించాలని గతంలో కోరారు. ఎన్నికల సంఘం 2025 జూన్ 24న జారీ చేసిన ప్రత్యేక సమగ్ర సవరణ ఆదేశాల ఆధారంగా ఈ అదనపు డిక్లరేషన్ను తీసుకొచ్చినట్లు సంబంధిత వర్గాలు తెలిపాయి. ఆ సమయంలో ఎన్నికల సంఘం ఏకగ్రీవ నిర్ణయం మేరకే ఈ విధానాన్ని అమలు చేసినట్లు పేర్కొన్నాయి.
తాజాగా సెప్టెంబర్ 26న జరిగిన పూర్తి స్థాయి సమావేశంలో ఈ అదనపు డిక్లరేషన్ను ఉపసంహరించుకోవాలని నిర్ణయించారు. ఇకపై ఫారం-6లో కొత్త ఓటర్లు తమ పేర్లను నమోదు చేసుకునే ప్రక్రియలో ఈ అదనపు డిక్లరేషన్ ఉండదు. ప్రత్యేక సమగ్ర సవరణ ప్రక్రియ పూర్తయిన రాష్ట్రాల్లోనే కాకుండా, ఈ ప్రక్రియ ఇంకా ప్రారంభం కాని రాష్ట్రాల్లోనూ ఇదే విధానం అమల్లో ఉంటుందని సంబంధిత వర్గాలు వెల్లడించాయి.
ఈ నిర్ణయంతో ఫారం-6 ద్వారా కొత్త ఓటర్ల నమోదుకు సంబంధించిన విధానంలో ప్రత్యేక సమగ్ర సవరణ పేరుతో అదనపు ప్రకటనను జతచేసే విధానం నిలిచిపోనుంది.
