బంగ్లాదేశ్ ను భూ కంపం వణికించింది. శుక్రవారం ఉదయం బంగ్లాదేశ్‌లోని నర్సింఘ్‌డి ప్రాంతంలో సంభవించిన భూకంపం వల్ల పశ్చిమ బెంగాల్‌లోని పలు ప్రాంతాల్లో, ముఖ్యంగా కోల్‌కతాలో, ప్రకంపనలు స్పష్టంగా కనిపించాయి. భారత వాతావరణ విభాగం సమాచారం ప్రకారం, రిక్టర్‌ స్కేలుపై 5.7 తీవ్రతతో భూకంపం ఉదయం 10.08 గంటలకు నర్సింఘ్‌డికి దక్షిణ-దక్షిణ పశ్చిమ దిశగా సుమారు 13 కిలోమీటర్ల దూరంలో, భూమికి 10 కిలోమీటర్ల లోతులో సంభవించింది. ప్రకంపనలు గమనించిన వెంటనే కోల్‌కతాతో పాటు అనేక జిల్లాల్లో ప్రజలు అప్రమత్తం అయ్యారు. ఇళ్ల నుంచి బయటకు వచ్చి రోడ్లపైకి చేరుకున్నారు. అయితే ఇప్పటి వరకు ఎలాంటి ప్రాణనష్టం లేదా ఆస్తినష్టం జరిగినట్టు నివేదికలు లేవని అధికారులు తెలిపారు. మొత్తం మీద భూకంపం స్వల్ప స్థాయిలో ఉన్నప్పటికీ, ప్రజలు కొన్ని క్షణాలు భయాందోళనకు గురయ్యారు. అధికారులు పరిస్థితిని పర్యవేక్షిస్తూ, మరింత సమాచారాన్ని సేకరిస్తున్నారు.
బంగ్లాదేశ్ ను కుదిపేసిన భూ కంపం
