భారత ప్రభుత్వం యువజన వ్యవహారాలు, క్రీడల మంత్రిత్వ శాఖ ఆధ్వర్యంలోని మేరా యువ భారత్ (MY Bharat), బ్రహ్మకుమారీస్ సహకారంతో “నషా ముక్త్ యువ భారత్ సంకల్ప్ అభియాన్” (మాదకద్రవ్య రహిత యువత – వికసిత్ భారత్ కోసం) కార్యక్రమాన్ని హైదరాబాద్లో విజయవంతంగా నిర్వహించింది. ఈ కార్యక్రమంలో సుమారు 1,500 మంది యువత మరియు పౌరులు పాల్గొని, మాదకద్రవ్య రహిత మరియు అభివృద్ధి చెందిన భారత నిర్మాణానికి తమ నిబద్ధతను పునరుద్ఘాటించారు.
ఈ కార్యక్రమానికి తెలంగాణ రాష్ట్ర గవర్నర్ శివ ప్రతాప్ శుక్లా ముఖ్య అతిథిగా హాజరయ్యారు. కార్యక్రమంలో బ్రహ్మకుమారీస్ డైరెక్టర్ బీకే కులదీప్ దిదీ, తెలంగాణ గవర్నర్ ప్రత్యేక ప్రధాన కార్యదర్శి ఎం. దానా కిషోర్, డీపీఎస్ చైర్మన్ ఎం. కొమరయ్య, భారత నౌకాదళం కెప్టెన్ (ఐఎన్) శివా సింగ్, మేరా యువ భారత్, తెలంగాణ రాష్ట్ర డైరెక్టర్ (ఇన్చార్జ్) చి.అన్వేష్ తదితరులు పాల్గొన్నారు.
కార్యక్రమానికి స్వాగతం పలికిన మేరా యువ భారత్, తెలంగాణ రాష్ట్ర డైరెక్టర్ (ఇన్చార్జ్) చి. అన్వేష్, యువత నషా ముక్త్ యువ భారత్ సంకల్ప్ అభియాన్లో చురుకుగా పాల్గొని దేశ నిర్మాణంలో భాగస్వాములు కావాలని పిలుపునిచ్చారు. మాదకద్రవ్యాలకు దూరంగా ఉండి, ప్రతిజ్ఞను చిత్తశుద్ధితో పాటిస్తూ, ఆరోగ్యవంతమైన, బాధ్యతాయుతమైన, శక్తివంతమైన సమాజ నిర్మాణం ద్వారా వికసిత్ భారత్ లక్ష్య సాధనకు తమ వంతు కృషి చేయాలని ఆయన కోరారు.
ఈ సందర్భంగా ప్రసంగించిన తెలంగాణ రాష్ట్ర గవర్నర్ శివ ప్రతాప్ శుక్లా, మాదకద్రవ్య రహిత సమాజ నిర్మాణం అత్యంత అవసరమని పేర్కొన్నారు. యువత నషా ముక్త్ భారత్ ఉద్యమానికి రాయబారులుగా మారాలని పిలుపునిస్తూ, మాదకద్రవ్యాల బారిన పడకుండా సమాజాన్ని రక్షించడంలో యువత కీలక పాత్ర పోషించాలని, ఆరోగ్యవంతమైన, శక్తివంతమైన మరియు అభివృద్ధి చెందిన భారత నిర్మాణంలో భాగస్వాములు కావాలని సూచించారు.
కార్యక్రమంలో ప్రధాన ఆకర్షణగా నషా ముక్త్ యువ భారత్ సంకల్ప్ అభియాన్ సందర్భంగా ప్రధానమంత్రి వర్చువల్ సందేశం ప్రసారం చేయబడింది. సుమారు 1,500 మంది పాల్గొనేవారు ప్రధానమంత్రి సందేశాన్ని వీక్షించి, అనంతరం నషా ముక్త్ యువ భారత్ ప్రతిజ్ఞ చేసి, మాదకద్రవ్య రహిత భారత నిర్మాణానికి తమ అంకితభావాన్ని పునరుద్ఘాటించారు.
ఈ కార్యక్రమం దేశ నిర్మాణంలో యువత పాత్ర యొక్క ప్రాధాన్యతను చాటిచెప్పడంతో పాటు, మాదకద్రవ్యాల దుష్ప్రభావాలపై అవగాహన పెంపొందిస్తూ, ఆరోగ్యకరమైన మరియు బాధ్యతాయుతమైన జీవన విధానాన్ని అలవర్చుకోవాలని యువతను ప్రోత్సహించింది. వికసిత్ భారత్ లక్ష్య సాధనకు మాదకద్రవ్య రహిత భారత నిర్మాణంలో ప్రభుత్వ సంస్థలు, సామాజిక సంస్థలు మరియు యువత సమిష్టిగా కృషి చేయాలనే సంకల్పాన్ని ఈ కార్యక్రమం ప్రతిబింబించింది.
