రామాయణం ఆధారంగా బాలీవుడ్లో అత్యంత భారీ వ్యయంతో రూపొందుతున్న చిత్రం ‘రామాయణం’. దర్శకుడు నితేశ్ తివారీ, నిర్మాత నమిత్ మల్హోత్రా తెరకెక్కిస్తున్న ఈ చిత్రంపై ఇప్పటికే దేశవ్యాప్తంగా భారీ అంచనాలు నెలకొన్నాయి. రణ్బీర్ కపూర్ శ్రీరాముడిగా, యశ్ రావణుడిగా, సాయిపల్లవి సీతగా, రవి దూబే లక్ష్మణుడిగా నటిస్తున్నారు. సుమారు రూ.2,000 కోట్ల భారీ బడ్జెట్తో రెండు లేదా మూడు భాగాలుగా ఈ చిత్రాన్ని రూపొందిస్తున్నట్లు ప్రచారం జరుగుతోంది.
ఈ చిత్రానికి సంబంధించిన కథా విశేషాలు ఇప్పుడు ఆసక్తికర చర్చకు దారితీస్తున్నాయి. ముఖ్యంగా మొదటి భాగంలో హీరో శ్రీరాముడు, ప్రతినాయకుడు రావణుడు ఒక్కసారి కూడా ఎదురుపడకపోవడం విశేషం. ఇద్దరూ ఒకరి గురించి మరొకరు తెలుసుకుంటున్నప్పటికీ, కథలో వారి ప్రయాణాలు వేర్వేరుగా సాగుతాయి. అయోధ్య యువరాజుగా ఉన్న రాముడు భార్య సీత, సోదరుడు లక్ష్మణుడితో కలిసి అరణ్యవాసానికి వెళ్లే పరిస్థితులు ఒకవైపు చూపిస్తే, మరోవైపు అవమానాలు, అణచివేతలను ఎదుర్కొన్న వ్యక్తి నుంచి లంకాధిపతిగా, మూడు లోకాలను జయించాలనే ఆకాంక్ష కలిగిన శక్తిమంతుడిగా రావణుడు ఎదిగిన నేపథ్యాన్ని ఆవిష్కరిస్తారు.
బ్రహ్మదేవుడి నుంచి పొందిన వరంలోని ఒక చిన్న మినహాయింపు కారణంగా తనను సంహరించేందుకు శ్రీమహావిష్ణువు ఏడో అవతారంగా రాముడు జన్మించాడనే విషయం రావణుడికి కూడా తెలుసు. అయినప్పటికీ తన అహంకారం, అజేయుడిననే నమ్మకంతో రాముడిని యుద్ధానికి ఆహ్వానించాలని రావణుడు భావిస్తాడు.
మొదటి భాగం చివర్లో కనిపించే కీలక పాత్రల్లో రావణుడి కుమారుడు మేఘనాదుడు ఒకరు. రామాయణంలో మేఘనాదుడికి అత్యంత ప్రాధాన్యం ఉంది. దేవేంద్రుడిని ఓడించిన కారణంగా అతడికి ‘ఇంద్రజిత్’ అనే పేరు వచ్చింది. రావణుడి విజయాల్లోనూ, లంకా సైనిక శక్తిలోనూ అతడి పాత్ర కీలకం. అయినప్పటికీ మొదటి భాగంలో అతడి పాత్రను పూర్తిస్థాయిలో చూపించకుండా చివర్లో మాత్రమే పరిచయం చేసినట్లు తెలుస్తోంది.
జటాయువు సీతను రావణుడి చెర నుంచి విడిపించేందుకు ప్రయత్నించి తీవ్రంగా గాయపడిన సందర్భంలో మేఘనాదుడి ప్రస్తావన వస్తుంది. రావణుడి వరప్రభావం కారణంగా జటాయువు కూడా అతడిని అడ్డుకోలేకపోతాడు. అనంతరం సీతాన్వేషణలో భాగంగా రామలక్ష్మణులు జటాయువు వద్దకు చేరుకుంటారు. మరణావస్థలో ఉన్న జటాయువు సీతను రావణుడు అపహరించి లంకకు తీసుకెళ్లాడని వారికి చెబుతాడు.
లంకకు చేరుకోవడం అంత సులభం కాదని, అక్కడ రావణుడితోపాటు అతడి సోదరుడు కుంభకర్ణుడు, కుమారుడు మేఘనాదుడిని కూడా ఎదుర్కోవాల్సి ఉంటుందని హెచ్చరిస్తాడు. కుంభకర్ణుడు మేల్కొని ఉన్నప్పుడు అత్యంత శక్తిమంతుడిగా ఉంటాడని, ఆరు నెలలపాటు నిద్రించే స్వభావం కలిగి ఉంటాడనే ఇతిహాస నేపథ్యాన్ని కూడా ప్రస్తావిస్తారు.
శివభక్తుడైన రావణుడి మాదిరిగానే మేఘనాదుడు కూడా శివుడిని ఆరాధించే వ్యక్తిగా ఇతిహాసంలో ప్రసిద్ధి చెందాడు. యజ్ఞం ముందు కూర్చున్న మేఘనాదుడి రూపంలో రాఘవ్ జుయల్ కనిపించడం ప్రేక్షకుల్లో ఆసక్తిని పెంచుతోంది. అయితే చిత్ర బృందం నుంచి ఈ పాత్రకు సంబంధించిన అధికారిక పూర్తి వివరాలు ఇంకా వెల్లడికావాల్సి ఉంది.
ఈ సినిమాలో రావణుడి పాత్రను సంప్రదాయ కథనాలకు కొంత భిన్నంగా చూపిస్తున్నట్లు తెలుస్తోంది. కేవలం సీతపై మోహంతో ఆమెను అపహరించిన వ్యక్తిగా కాకుండా, తన అహంకారం, గర్వం, అపారమైన శక్తిపై ఉన్న నమ్మకంతో తప్పుదారిలో పయనించే వ్యక్తిగా రావణుడిని చిత్రీకరించినట్లు కథనం సూచిస్తోంది.
లక్ష్మణుడు తన సోదరి శూర్పణఖ ముక్కును కోయడంతో ప్రతీకార భావనతో సీతను అపహరించినప్పటికీ, రావణుడి అసలు ఉద్దేశం అంతకంటే పెద్దదిగా చూపించారనే విశ్లేషణ ఉంది. తనను అంతం చేయడానికి జన్మించిన రాముడిని లంకకు రప్పించి యుద్ధంలో ఓడించి, ఒక సామాన్య మానవుడు తనను జయించలేడని నిరూపించుకోవాలన్నది అతడి అహంకారానికి ప్రతీకగా కనిపిస్తోంది.
జటాయువు అంత్యక్రియల అనంతరం రాముడు లక్ష్మణుడితో మాట్లాడుతూ సీతను తిరిగి తీసుకురావడమే కాకుండా రావణుడిని పూర్తిగా అంతం చేయడానికి లంకకు వెళతానని ప్రకటిస్తాడు. దీంతో రెండో భాగంలో రాముడు లంకకు చేరుకోవడం, రావణుడి సైన్యంతో యుద్ధం, మేఘనాదుడు, కుంభకర్ణుడి పాత్రలు మరింత కీలకం కానున్నట్లు సంకేతాలు కనిపిస్తున్నాయి.
మొత్తానికి మొదటి భాగంలో రాముడు, రావణుడు ఎదురుపడకపోవడం, మేఘనాదుడి పాత్రను చివర్లో పరిచయం చేయడం వంటి అంశాలు రెండో భాగంపై ఆసక్తిని మరింత పెంచుతున్నాయి. అయితే రామాయణ ఇతిహాసం ప్రేక్షకులకు ముందే తెలిసిన కథే అయినప్పటికీ, దర్శకుడు నితేశ్ తివారీ దానిని ఏ విధంగా తెరపై ఆవిష్కరిస్తారన్నదే ఇప్పుడు ఆసక్తికరంగా మారింది.
