ప్రపంచ రేడియో దినోత్సవం (ఫిబ్రవరి 13, 2026) సందర్భంగా ప్రధానమంత్రి నరేంద్ర మోదీ దేశ ప్రజలకు, రేడియో రంగానికి చెందిన వారందరికీ ప్రత్యేక శుభాకాంక్షలు తెలిపారు. ఈ సందర్భంగా ఆయన ‘ఎక్స్’ (ట్విట్టర్) వేదికగా సందేశం అందించారు.
రేడియో ఒక ‘విశ్వసనీయ గొంతుక’ అని ఆయన అన్నారు. ప్రపంచ రేడియో దినోత్సవాన్ని పురస్కరించుకుని ప్రధానమంత్రి నరేంద్ర మోదీ రేడియో మాధ్యమంపై తనకున్న అభిమానాన్ని చాటుకున్నారు. కుగ్రామాల నుంచి మహానగరాల వరకు రేడియో ఒక ‘విశ్వసనీయ గొంతుక’గా మారి ప్రజలను అనుసంధానిస్తోందని ఆయన కొనియాడారు.
సాంకేతిక మార్పులు ఎన్ని వచ్చినా, సమాచారాన్ని చేరవేయడంలోనూ, సృజనాత్మకతను ప్రోత్సహించడంలోనూ రేడియో తన ప్రత్యేకతను చాటుకుంటోందని ప్రధాని పేర్కొన్నారు.ఈ సందర్భంగా ఆయన తన ప్రతి నెల రేడియో కార్యక్రమం ‘మన్ కీ బాత్’ గురించి ప్రత్యేకంగా ప్రస్తావించారు. “మన్ కీ బాత్ ద్వారా రేడియోలో ఉండే అద్భుతమైన శక్తిని నేను స్వయంగా అనుభవించాను.
సామాన్య ప్రజల్లోని సామాజిక శక్తిని వెలికితీయడానికి, వారితో నేరుగా మాట్లాడటానికి రేడియో ఒక గొప్ప వేదికగా నిలిచింది” అని మోదీ వ్యాఖ్యానించారు.వచ్చే ఆదివారం, ఫిబ్రవరి 22న ప్రసారం కానున్న మన్ కీ బాత్ కార్యక్రమం కోసం ప్రజలు తమ సలహాలు, సూచనలను పంచుకోవాలని ఆయన పిలుపునిచ్చారు.
రేడియో శ్రోతలకు, ఆర్జేలకు మరియు ఈ ప్రసార మాధ్యమంతో ముడిపడి ఉన్న సిబ్బంది అందరికీ ఈ సందర్భంగా ఆయన అభినందనలు తెలియజేశారు.
