గతంలో ఎన్నడూ లేని విధంగా ఢిల్లీ మాజీ ముఖ్యమంత్రి అరవింద్ కేజ్రీవాల్ న్యాయవ్యవస్థపై తీవ్ర నిర్ణయం తీసుకున్నారు. ఆమ్ ఆద్మీ పార్టీ అధినేత అరవింద్ ఢిల్లీ ఎక్సైజ్ కేసుకు సంబంధించి కోర్టులో ఎలాంటి వాదనలు వినిపించరాని కీలక నిర్ణయం తీసుకున్నారు.
ఈ కేసు విచారణను నిర్వహిస్తున్న ఢిల్లీ హైకోర్టు న్యాయమూర్తి స్వర్ణ కాంత శర్మ ముందుకు తాను వ్యక్తిగతంగా గానీ, న్యాయవాది ద్వారా గానీ హాజరు కాబోనని లేఖ ద్వారా స్పష్టం చేశారు. ఈ విషయాన్ని పార్టీ వర్గాలు వెల్లడించాయి.
నాలుగు పేజీల లేఖలో అరవింద్ కేజ్రీవాల్ “న్యాయం తీవ్రంగా తప్పిపోయిందనే భావన” తనకు కలిగిందని పేర్కొన్నారు. ఈ వ్యవహారంలో తనకు ఉన్న ఆందోళనలు తీవ్రంగా ఉన్నాయని, అవి ఇంకా పరిష్కారం కాలేదని తెలిపారు. “న్యాయం జరిగేలా మాత్రమే కాకుండా, అది జరిగినట్లు కనిపించాలి కూడా” అనే సూత్రం ప్రజాస్వామ్యంలో అత్యంత కీలకమని ఆయన పేర్కొన్నారు.
ఈ సూత్రాన్ని పక్కనపెట్టి ప్రజలను కళ్ల ముందున్న విషయాలను విస్మరించమని అడగలేమని లేఖలో పేర్కొన్నారు. ఈ నిర్ణయం తేలికగా తీసుకున్నది కాదని, ఎంతో ఆలోచన తర్వాత తీసుకున్నానని తెలిపారు. సత్యాగ్రహ సిద్ధాంతాలను ప్రస్తావిస్తూ, మహాత్మా గాంధీ బోధనలను ఉదహరించారు. తన ఉద్దేశం న్యాయ వ్యవస్థను బలపరచడమే కానీ దాన్ని బలహీనపరచడం కాదని వివరించారు.
ఈ కేసులో న్యాయమూర్తి తప్పుకోవాలని కోరుతూ దాఖలు చేసిన తన పూర్వ పిటిషన్‌ను ఏప్రిల్ 20న తిరస్కరించిన తర్వాత పరిస్థితి మరింత క్లిష్టంగా మారిందని ఆయన అభిప్రాయపడ్డారు. తాను చేసిన అభ్యర్థనను వ్యక్తిగత దాడిగా, సంస్థపై దాడిగా భావించడం పట్ల ఆవేదన వ్యక్తం చేశారు.
ప్రస్తుత పరిస్థితుల్లో నిష్పక్షపాత విచారణ పొందడం అసాధ్యమని భావిస్తున్నానని, అందువల్ల ఇకపై విచారణలో పాల్గొనబోనని తన లేఖలో స్పష్టం చేశారు. ఈ పరిణామం దేశవ్యాప్తంగా చర్చనీయాంశంగా మారింది.
