ఢిల్లీ నగరంలో సోమవారం సాయంత్రం రెడ్ఫోర్ట్ మెట్రో స్టేషన్ సమీపంలో సంభవించిన శక్తివంతమైన పేలుడులో 12 మంది మృతి చెందగా, పలువురు గాయపడ్డ ఘటనపై పోలీసులు అప్రమత్తతను మరింతగా పెంచారు. ఈ పేలుడు రిపబ్లిక్ డే వేడుకలను లక్ష్యంగా చేసుకున్న పెద్ద ఉగ్ర యాజ్ఞలో భాగమని దర్యాప్తు సంస్థలు భావిస్తున్నాయి.
దర్యాప్తులో భాగంగా పోలీసులు గుర్తించిన వివరాల ప్రకారం, ప్రధాన నిందితుడు డాక్టర్ ముజమ్మిల్ గనై గత జనవరిలో పలు సార్లు రెడ్ఫోర్ట్ పరిసర ప్రాంతాలకు వెళ్లి భద్రతా ఏర్పాట్లు, జనసంచారం వంటి అంశాలను పరిశీలించినట్లు మొబైల్ డంప్ డేటా, సీసీటీవీ ఫుటేజీల ద్వారా వెల్లడైంది.
ఆయనతో కలిసి మరో నిందితుడు డాక్టర్ ఉమర్ నబీ కూడా తరచూ అక్కడికి వెళ్లినట్లు ఆధారాలు లభించాయి. వీరి పరిశీలనలు రిపబ్లిక్ డే సందర్భంగా పెద్ద దాడి చేసేందుకు పూర్వ ప్రణాళికలో భాగంగా ఉన్నాయని పోలీసులు అనుమానిస్తున్నారు. ప్రస్తుతం ఈ ఇద్దరు డాక్టర్ల మధ్య సంభాషణలు, వారి ఆర్థిక వనరులు, మరియు ఇతర ఉగ్ర మాడ్యూల్ సభ్యులతో సంబంధాలు ఉన్నాయా అనే దిశలో దర్యాప్తు కొనసాగుతోంది.
ప్రభుత్వ వర్గాల సమాచారం ప్రకారం, పేలుడులో ఉపయోగించిన వైట్ హ్యుందాయ్ i20 కారు హర్యానా రాష్ట్రంలోని ఫరీదాబాద్లోని అల్-ఫలాహ్ మెడికల్ కాలేజ్ ప్రాంగణంలో 11 రోజుల నుంచి నిలిపి ఉంచినట్లు తేలింది. నవంబర్ 10 ఉదయం భద్రతా దళాలు ఉగ్ర మాడ్యూల్స్పై కఠిన చర్యలు చేపడుతుండటంతో నిందితుడు డాక్టర్ ఉమర్ నబీ ఆ కారును తీసుకువచ్చి ఢిల్లీలోకి వచ్చినట్లు పోలీసులు చెబుతున్నారు.
దర్యాప్తు అధికారులు వెల్లడించిన ప్రకారం, పేలుడు యాదృచ్ఛికంగా, ముందుగానే సంభవించినట్లు తెలుస్తోంది. బాంబు పూర్తిగా సిద్ధం కాలేదు కాబట్టి పేలుడు తీవ్రత తక్కువగా ఉండి గుంత (క్రేటర్) కూడా ఏర్పడలేదని తెలిపారు. అలాగే పేలుడు స్థలంలో శ్రాప్నెల్ లేదా ప్రాజెక్టైల్లు కనుగొనబడలేదని, దీని వల్ల బాంబు పూర్తి స్థాయి శక్తిని సాధించకముందే పేలిపోయిందని అధికారులు తెలిపారు.
ఈ ఘటన అనంతరం ఢిల్లీలో భద్రతా ఏర్పాట్లు కట్టుదిట్టం చేశారు. నగరంలోని అన్ని ప్రధాన ప్రవేశ, నిష్క్రమణ మార్గాల వద్ద భారీగా పోలీసులు, పారామిలిటరీ దళాలు మోహరించారు. ఘాజీపూర్, సింఘూ, టిక్రీ, బదర్పూర్ సరిహద్దుల వద్ద వాహనాల తనిఖీలు కొనసాగుతున్నాయి.
సీనియర్ అధికారుల పర్యవేక్షణలో అన్ని వాహనాలను క్షుణ్ణంగా తనిఖీ చేస్తున్నారు. మెట్రో స్టేషన్లు, రైల్వే స్టేషన్లు, బస్ టెర్మినళ్లు, మార్కెట్లు వంటి బహిరంగ ప్రదేశాల్లో కూడా యాదృచ్ఛిక తనిఖీలు జరుగుతున్నాయి. “అన్ని జిల్లాల యూనిట్లు, ప్రత్యేక విభాగాలకు అప్రమత్తంగా ఉండాలని, ముఖ్యంగా పర్యాటక ప్రాంతాలు, షాపింగ్ మాల్స్, ఆధ్యాత్మిక ప్రదేశాల వద్ద పహారా మరింత బలోపేతం చేయాలని ఆదేశించాం” అని ఒక ఉన్నతాధికారి తెలిపారు.
స్నిఫర్ కుక్కలు, మెటల్ డిటెక్టర్లు, యాంటీ సబోటేజ్ బృందాలను సున్నిత ప్రాంతాల్లో మోహరించారు. ప్రజలు ఏవైనా అనుమానాస్పద వస్తువులు లేదా వ్యక్తులను గమనిస్తే వెంటనే పోలీస్ హెల్ప్లైన్లకు సమాచారం ఇవ్వాలని అధికారులు సూచించారు. ఇంటెలిజెన్స్ బ్యూరో, పారామిలిటరీ దళాలు, ఢిల్లీ పోలీసుల మధ్య సమన్వయ సమావేశాలు జరుగుతున్నాయి.
ప్రస్తుత పరిస్థితిని అంచనా వేసి, భద్రతా చర్యలను సమీక్షిస్తున్నట్లు అధికారులు తెలిపారు. ఈ అదనపు భద్రతా ఏర్పాట్లు తదుపరి ఆదేశాలు వచ్చే వరకు కొనసాగుతాయని స్పష్టం చేశారు.
