ప్రత్యేకంహోమ్

రష్యా ఉక్రెయిన్ మధ్య కొత్త ఒప్పందం: ట్రంప్

#DonaldTrump

రష్యా ఉక్రెయిన్ మధ్య ఇంధన కాల్పుల విరమణ ఒప్పందం కుదిరిందని అమెరికా అధ్యక్షుడు డోనాల్డ్ ట్రంప్ ప్రకటించారు. తన సామాజిక మాధ్యమ వేదిక ట్రూత్‌ సోషల్‌లో ఈ విషయాన్ని ఆయన వెల్లడించారు. ఈ ఒప్పందం తక్షణమే అమల్లోకి వస్తుందని పేర్కొన్నారు. అయితే, ఈ ఒప్పందానికి సంబంధించిన పూర్తి వివరాలను వెల్లడించలేదు.

డోనాల్డ్ ట్రంప్‌ ప్రకటనపై ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీ స్పందిస్తూ ఈ ఒప్పందానికి సంబంధించిన వివరాల కోసం తాము, తమ మిత్రదేశాలు ఎదురుచూస్తున్నామని తెలిపారు. ట్రంప్‌ ప్రకటన గురించి తొలిసారిగా సామాజిక మాధ్యమం ద్వారానే తెలుసుకున్నట్లు ఆయన ఆక్సియోస్‌ వార్తా సంస్థకు ఇచ్చిన ఇంటర్వ్యూలో ఆయన వెల్లడించారు. అయితే, రష్యా కూడా అంగీకరిస్తే ఇంధన మౌలిక సదుపాయాలపై దాడులను నిలిపివేసేందుకు ఉక్రెయిన్‌ సిద్ధంగా ఉందని ఓ సీనియర్‌ ఉక్రెయిన్‌ అధికారి తెలిపారు.

రష్యా చమురు శుద్ధి కర్మాగారాలపై దాడులను ఏకపక్షంగా నిలిపివేయాలంటూ అమెరికా నుంచి ఒత్తిడి వస్తున్న నేపథ్యంలో జెలెన్‌స్కీ ఈ ప్రకటన చేయడం ప్రాధాన్యం సంతరించుకుంది. రష్యా తమ విద్యుత్‌ మౌలిక సదుపాయాలపై దాడులను నిలిపివేస్తేనే తాము కూడా ఆ దేశంలోని చమురు శుద్ధి కర్మాగారాలపై దాడులను ఆపుతామని ఉక్రెయిన్‌ మొదటి నుంచీ చెబుతోంది. ఇలాంటి ఒప్పందం కుదిరితే దానికి పటిష్ఠమైన హామీలు ఉండాలని జెలెన్‌స్కీ స్పష్టం చేశారు.

రష్యా ఉక్రెయిన్‌ మధ్య ఇంధన కాల్పుల విరమణపై ట్రంప్‌ ప్రకటన చేయడం ఇదే మొదటిసారి కాదు. గత సెప్టెంబరు మధ్యలోనూ ఇలాంటి ఒప్పందం కుదిరినట్లు ఆయన ప్రకటించారు. అయితే, ఆ సమయంలో ఇరు దేశాల్లో ఏ ఒక్కటీ అటువంటి ఒప్పందం కుదిరినట్లు అధికారికంగా ధ్రువీకరించలేదు. తాజాగా మరోసారి ట్రంప్‌ ప్రకటన చేయడంతో ఈసారి ఒప్పందం అమలులోకి వస్తుందా? ఇరు దేశాలు దానికి కట్టుబడి ఉంటాయా? అన్నది ఆసక్తికరంగా మారింది.

యూరోపియన్‌ కమిషన్‌ అధ్యక్షురాలు ఉర్సులా వాన్‌ డెర్‌ లేయెన్‌ కూడా జెలెన్‌స్కీకి మద్దతు ప్రకటించారు. ఉక్రెయిన్‌, రష్యాల్లో ఇంధన మౌలిక సదుపాయాలు, ప్రపంచ ఆహార సరఫరాలకు రక్షణ కల్పించేలా కాల్పుల విరమణ జరగాలన్న ఉక్రెయిన్‌ అధ్యక్షుడి పిలుపును పూర్తిగా సమర్థిస్తున్నట్లు ఆమె తెలిపారు. జెలెన్‌స్కీతో మాట్లాడిన అనంతరం సామాజిక మాధ్యమంలో ఈ విషయాన్ని వెల్లడించారు.

యుద్ధం కారణంగా ఇంధన సరఫరాలు, విద్యుత్‌ వ్యవస్థలు, చమురు రవాణాపై నెలకొన్న ఒత్తిళ్ల నేపథ్యంలో ఇంధన మౌలిక సదుపాయాలపై దాడుల నిలిపివేత కీలక అంశంగా మారింది. అయితే, ట్రంప్‌ ప్రకటించిన ఒప్పందానికి సంబంధించి ఇరు దేశాల అధికారిక ధ్రువీకరణ, అమలు నిబంధనలు, పరస్పర హామీలు వెల్లడైతేనే ఈ కాల్పుల విరమణపై స్పష్టత రానుంది.

Related posts

హైడ్రా పెట్టి 2 ఏళ్లు.. కబ్జాల చెరవీడిన భూమి 3325 ఎకరాలు

Satyam News

అసెంబ్లీ లో తెలంగాణ తల్లి విగ్రహ ఆవిష్కరణ

Satyam News

సింధు జలాల ఒప్పందం రద్దుతో కష్టాల్లో పాక్

Satyam News

దానాలకు శ్రేష్ఠం సంక్రాంతి పండుగ రోజు

Satyam News

డోన్‌లో ముఖ్యమంత్రి చంద్రబాబు పర్యటన

Satyam News

పూర్తి అక్షరాస్యత రాష్ట్రంగా హిమాచల్ ప్రదేశ్

Satyam News

Leave a Comment