దేశ రాజధాని ఢిల్లీలో జరిగిన అగ్నిప్రమాదంలో 9 మంది మరణించారు. ఢిల్లీ నగరంలోని వివేక్ విహార్ ప్రాంతంలో ఉన్న నివాస సముదాయంలో ఆదివారం తెల్లవారుజామున ఈ ఘటన జరిగినట్లు ప్రాథమిక వివరాలు సూచిస్తున్నాయి. ఏసీ పేలుడు కారణంగా మంటలు చెలరేగినట్టు అనుమానం వ్యక్తమవుతోంది.
ఒక్కసారిగా మంటలు వ్యాపించడంతో భవనంలో ఉన్న పలువురు చిక్కుకుపోయారు. ఈ ప్రమాదంలో ఇప్పటివరకు 9 మంది మృతి చెందినట్లు, మరో నలుగురు గాయపడినట్లు సమాచారం. గాయపడిన వారిని సమీప ఆసుపత్రులకు తరలించి చికిత్స అందిస్తున్నారు.
సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని 14 ఫైర్ ఇంజిన్లతో మంటలను అదుపులోకి తీసుకువచ్చారు. అగ్నిమాపక దళాలు, రెస్క్యూ టీమ్స్ కలిసి సుమారు 10 మందిని సురక్షితంగా బయటకు తీసుకువచ్చాయి. ఇంకా భవనంలో మరికొందరు చిక్కుకుని ఉండొచ్చనే అనుమానంతో గాలింపు చర్యలు కొనసాగుతున్నాయి.
పోలీసులు కేసు నమోదు చేసి ప్రమాదానికి గల కారణాలపై దర్యాప్తు ప్రారంభించారు. ఏసీ పేలుడు నిజమైన కారణమా లేదా ఇతర కారణాలున్నాయా అన్న దానిపై విచారణ కొనసాగుతోంది. మృతుల సంఖ్య పెరిగే అవకాశమున్నట్లు అధికారులు భావిస్తున్నారు.
