విదేశాల నుంచి వచ్చి మన దేశంలో ఉద్యమాలలో పాలుపంచుకుంటున్న సినీ నటుడు ఇమ్రాన్ ఖాన్ ను వెంటనే దేశం విడిచి వెళ్లాల్సిందిగా పోలీసులు ఆదేశాలు జారీ చేశారు. అమెరికా పౌరసత్వం కలిగిన బాలీవుడ్ నటుడు ఇమ్రాన్ ఖాన్‌కు ఈ మేరకు ముంబై పోలీసులు నోటీసులు జారీ చేశారు.
అక్టోబర్ 10న ముంబైలోని ఆగస్టు క్రాంతి మైదాన్‌లో జరిగిన కాక్రోచ్ ల నిరసన కార్యక్రమంలో ఇమ్రాన్ ఖాన్ పాల్గొనడం ఈ చర్యకు కారణమైంది. ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ నిరసనకారులు ఈ ఆందోళన నిర్వహించారు. ఈ కార్యక్రమంలో పాల్గొన్న ఇమ్రాన్ ఖాన్‌ను పోలీసులు కొద్దిసేపు అదుపులోకి తీసుకున్నారు.
ఇమ్రాన్ ఖాన్ పలు హిందీ చిత్రాల్లో నటించారు. ఆయన ప్రముఖ బాలీవుడ్ నటుడు అమీర్ ఖాన్ మేనల్లుడు. 2010లో విడుదలైన ‘ఐ హేట్ లవ్ స్టోరీస్’, 2011లో వచ్చిన ‘మేరే బ్రదర్ కి దుల్హన్’ చిత్రాలతో ఆయన గుర్తింపు పొందారు. ఇటీవల అమీర్ ఖాన్ నిర్మాణ భాగస్వామ్యం ఉన్న ‘హ్యాపీ పటేల్: ఖతర్నాక్ జాసూస్’ చిత్రంలో అతిథి పాత్రలో కనిపించారు.
నిరసన కార్యక్రమం అనంతరం ఇమ్రాన్ ఖాన్‌ను పోలీసులు వాహనం వద్దకు తీసుకెళ్తున్న సమయంలో ఓ విలేకరి ఆయనను ప్రశ్నించిన దృశ్యాలు సామాజిక మాధ్యమాల్లో కనిపించాయి. ఆందోళనలో పాల్గొనడంపై అడిగిన ప్రశ్నకు స్పందిస్తూ, తనకు ఎలాంటి డిమాండ్లు లేవని, తాను ఏ సంస్థలోనూ సభ్యుడిని కాదని ఆయన చెప్పినట్లు ఆ దృశ్యాల్లో వెల్లడైంది.
అయితే ఇమ్రాన్ ఖాన్‌పై చర్యలు తీసుకోవాలని గతంలో భారతీయ జనతా పార్టీ మాజీ ఎంపీ కిరీట్ సోమయ్య ముంబై పోలీసులకు ఫిర్యాదు చేశారు. అమెరికా పౌరసత్వం కలిగిన వ్యక్తి రాజకీయ నిరసనలో ఎలా పాల్గొంటారని ప్రశ్నించిన ఆయన, ఈ వ్యవహారంపై విచారణ జరిపి తగిన చర్యలు తీసుకోవాలని కోరారు. పోలీసుల తాజా చర్యను ఆయన స్వాగతించారు.
అరెస్టు చేస్తే మరిన్ని వివరాలు…
ఇమ్రాన్ ఖాన్‌పై ఫిర్యాదు చేసిన విషయాన్ని కిరీట్ సోమయ్య గురువారం మీడియాకు వివరించారు. ఈ నెల శనివారం కేంద్ర ప్రభుత్వ ఇమ్మిగ్రేషన్ అధికారులకు, విమానాశ్రయ అధికారులకు, ముంబై పోలీసులకు ఫిర్యాదు చేశానని, ఆదివారం కూడా దానిపై అనుసరణ చర్యలు చేపట్టానని తెలిపారు. ఇమ్రాన్ ఖాన్ ఎప్పటి నుంచి అమెరికా పౌరుడిగా ఉన్నారో వివరాలు వెల్లడించాలని కోరినట్లు చెప్పారు. ఈ విషయంలో స్పందించిన అధికారులకు కృతజ్ఞతలు తెలిపారు.
అమెరికాలో జన్మించి అక్కడే విద్యాభ్యాసం చేసిన ఇమ్రాన్ ఖాన్ భారత్‌లో ఉపాధి పొందుతూ ప్రభుత్వానికి వ్యతిరేకంగా రాజకీయ, దౌత్యపరమైన కార్యకలాపాల్లో పాల్గొన్నారని కిరీట్ సోమయ్య ఆరోపించారు. ఇలాంటి కార్యకలాపాల్లో పాల్గొనే ఇతర వ్యక్తులను కూడా గుర్తించి చర్యలు తీసుకోవాలని, అవసరమైతే వారిని దేశం నుంచి పంపించాలని డిమాండ్ చేశారు. ఈ అంశంపై సమగ్ర విచారణ జరిపితే మరిన్ని వివరాలు వెలుగులోకి వస్తాయని పేర్కొన్నారు.
ఆయన ఇమ్మిగ్రేషన్, విదేశీయుల చట్టంలోని నిబంధనలను ఉల్లంఘించినట్లు ఆరోపణలు రావడంతో అక్టోబర్ 28లోగా భారత్ విడిచి వెళ్లాలని ఆదేశించినట్లు అధికారులు గురువారం వెల్లడించారు. అయితే ఈ వ్యవహారంలో తదుపరి అధికారిక చర్యలు ఇంకా కొనసాగుతున్నాయని పోలీసులు తెలిపారు.
విదేశీ పౌరసత్వం కలిగిన వ్యక్తులు భారతదేశంలో రాజకీయ నిరసనలు, రాజకీయ కార్యకలాపాల్లో పాల్గొనడంపై సంబంధిత చట్టాలు, నిబంధనల ప్రకారం ఆంక్షలు ఉంటాయని పోలీసు అధికారి ఒకరు తెలిపారు. ఈ నేపథ్యంలో ఇమ్రాన్ ఖాన్‌పై చర్యలు తీసుకున్నట్లు పేర్కొన్నారు. అయితే ఆయనపై విధించిన ఆదేశాలకు సంబంధించిన పూర్తి చట్టపరమైన వివరాలు, తదుపరి ప్రక్రియపై స్పష్టత రావాల్సి ఉంది.
