భారత్ లో తీవ్ర స్థాయిలో ఆందోళనలు చేస్తున్న కాక్రోచ్ జనతా పార్టీకి అమెరికా నుంచి కొందరు నిధులు సమకూరుస్తున్నారు. ఇది ఎవరు చెప్పారో తెలుసా? అమెరికన్ గాయని మేరీ మిల్‌బెన్. . కాక్రోచ్ జనతా పార్టీ (సీజేపీ)కు అమెరికాలోని కొందరు దాతలు నిధులు సమకూరుస్తున్నారని, ప్రధాని నరేంద్ర మోదీకి, ఆయన నాయకత్వంలో భారత్ భవిష్యత్తుకు వ్యతిరేకంగా ఉన్న వ్యక్తులు ఈ వ్యవహారం వెనుక ఉన్నారని ఆమె ఆరోపించారు.
అమెరికాకు చెందిన 41 ఏళ్ల గాయని బుధవారం సామాజిక మాధ్యమ వేదికలో స్పందిస్తూ, భారత యువత మౌనంగా ఉండాల్సిన సమయం కాదని పేర్కొన్నారు. దేశంలో అంతరాయాలు సృష్టించే శక్తులకు వ్యతిరేకంగా యువ దేశభక్తులు సంఘటితమై శాంతియుతంగా నిరసన తెలియజేయాలని ఆమె కోరారు.
వివిధ దేశాల్లో ఉన్న సంప్రదాయవాద భావజాలం కలిగిన నాయకులను లక్ష్యంగా చేసుకోవడం, ఆయా దేశాలకు చెందిన అమెరికాలో విద్యనభ్యసించిన వ్యక్తులను గుర్తించడం, వారిని తీవ్రవాద ధోరణుల వైపు మళ్లించడం, అనంతరం స్వదేశాలకు పంపించి అశాంతి సృష్టించేందుకు నిధులు సమకూర్చడం వంటి ధోరణి కొందరు దాతల్లో కనిపిస్తోందని ఆమె ఆరోపించారు.
ఇటువంటి ప్రయత్నాలు ఆయా దేశాల అభివృద్ధి, పాలనపై ప్రభావం చూపుతున్నాయని పేర్కొన్నారు. ఈ ఆరోపణలకు మద్దతుగా ఆమె నిర్దిష్ట ఉదాహరణలు లేదా ఆధారాలను ప్రస్తావించలేదు. ప్రజాస్వామ్యం, స్వేచ్ఛను కాపాడేందుకు ఎల్లప్పుడూ ప్రతిఘటన ఉద్యమం ఉండాలని మేరీ మిల్‌బెన్ అభిప్రాయపడ్డారు. భారత గడ్డపై పుట్టి, పెరిగి, విద్యనభ్యసించిన యువత కొత్త గొంతుకగా ఎదగాలని, సంఘటితమై ప్రజాస్వామ్య పద్ధతుల్లో తమ అభిప్రాయాలను వ్యక్తం చేయాలని పిలుపునిచ్చారు.
ఆఫ్రికన్-అమెరికన్ వర్గానికి చెందిన హాలీవుడ్ నటి, గాయనిగా మేరీ మిల్‌బెన్‌కు గుర్తింపు ఉంది. భారత జాతీయ గీతం ‘జనగణమన’తో పాటు ‘ఓం జై జగదీశ్ హరే’ భక్తిగీతాన్ని ఆలపించడం ద్వారా ఆమెకు భారత్‌లోనూ ప్రత్యేక గుర్తింపు లభించింది. 2023లో ప్రధాని మోదీ అమెరికా పర్యటన సందర్భంగా నిర్వహించిన కార్యక్రమంలో ఆమె భారత జాతీయ గీతాన్ని ఆలపించారు.
ఎన్నికల జాబితాల ప్రత్యేక సమగ్ర సవరణపై ప్రతిపక్షాలు చేస్తున్న ఆరోపణలు, ఎన్నికల సంఘం వైఖరి, అలాగే సీజేపీకి విదేశీ నిధులు అందుతున్నాయన్న మేరీ మిల్‌బెన్ ఆరోపణలు ప్రస్తుతం రాజకీయ చర్చకు దారితీస్తున్నాయి. అయితే, ఈ రెండు అంశాలకు సంబంధించిన ఆరోపణలు, వాటిపై అధికారికంగా వెల్లడయ్యే వివరాలను వేర్వేరుగా పరిశీలించాల్సిన అవసరం ఉంది.
