2025 అక్టోబరులో అమల్లోకి వచ్చిన కాల్పుల విరమణ ఒప్పందాన్ని ఇజ్రాయెల్, హమాస్ పరస్పరం ఉల్లంఘించుకుంటున్నాయి. పదే పదే ఒకరిపై ఒకరు దాడులకు పాల్పడుతూనే ఉన్నారు. తాజాగా గాజాలో నాసర్ ఆసుపత్రిపై ఇజ్రాయెల్ చేసిన దాడిలో ఆరుగురు మృతి చెందగా 20 మందికి గాయాలయ్యాయి. గాజా దక్షిణ ప్రాంతంలోని ఖాన్ యూనిస్‌లో ఉన్న నాసర్ ఆసుపత్రి సముదాయంపై ఇజ్రాయెల్ ఈ దాడి జరిపింది.
ఈ దాడిని ఇజ్రాయెల్ సైన్యం కూడా ధ్రువీకరించింది. ఆసుపత్రి సముదాయంలో హమాస్ ఉగ్రవాదులు తమ ఉనికిని ఏర్పాటు చేసుకుని, దానిని కమాండ్ కేంద్రంగా ఉపయోగిస్తున్నారని ఆరోపించింది. వారి నుంచి ఎదురవుతున్న ముప్పును తొలగించేందుకే వైమానిక దాడి నిర్వహించినట్లు ఇజ్రాయెల్ సైన్యం ప్రకటించింది. అయితే ఆసుపత్రిపై దాడిని హమాస్ తీవ్రంగా ఖండించింది. దీనిని యుద్ధ నేరంగా అభివర్ణించింది.
మధ్య గాజాలోని అల్ బురేజ్ శరణార్థి శిబిరంలో గురువారం ఇజ్రాయెల్ సైన్యం జరిపిన కాల్పుల్లో మరో వ్యక్తి మరణించినట్లు పౌర రక్షణ విభాగం వెల్లడించింది. ఇజ్రాయెల్ సైన్యం కాల్పుల్లో మరణించిన వ్యక్తి మృతదేహాన్ని అల్ అక్సా ఆసుపత్రికి తరలించినట్లు ఆసుపత్రి వర్గాలు తెలిపాయి. ఈ ఘటనపై విచారణ జరుపుతున్నట్లు ఇజ్రాయెల్ సైన్యం ప్రకటించింది.
2023 అక్టోబరు 7న హమాస్ ఇజ్రాయెల్‌పై గతంలో ఎన్నడూ లేని స్థాయిలో దాడి చేయడంతో గాజాలో ఇజ్రాయెల్ సైనిక చర్యలు ప్రారంభమయ్యాయి. దాదాపు రెండేళ్లపాటు కొనసాగిన ఈ యుద్ధం అనంతరం కాల్పుల విరమణ ఒప్పందం కుదిరింది. అయితే ఒప్పందం అమల్లోకి వచ్చినప్పటి నుంచి గాజాలో హింసాత్మక ఘటనలు పూర్తిగా ఆగడం లేదు.
మంగళవారం కూడా ఇజ్రాయెల్ సైన్యం గాజా ప్రాంతంలో జరిపిన దాడుల్లో 13 ఏళ్ల బాలుడితో సహా ఏడుగురు మరణించినట్లు స్థానిక అత్యవసర సేవల విభాగం వెల్లడించింది. అయితే తాము సైనిక కార్యకలాపాల్లో పాల్గొంటున్న వ్యక్తులనే లక్ష్యంగా చేసుకున్నామని ఇజ్రాయెల్ సైన్యం పేర్కొంది.
కాల్పుల విరమణ ఒప్పందం అమల్లోకి వచ్చినప్పటి నుంచి ఇప్పటివరకు 1,590 మందికి పైగా పాలస్తీనియన్లు ప్రాణాలు కోల్పోయారు. ఇదే సమయంలో ఇజ్రాయెల్ సైన్యం ఏడుగురు సైనికులు, ఒక పౌర కాంట్రాక్టర్ మరణించినట్లు ప్రకటించింది. కాల్పుల విరమణ ఒప్పందం అమల్లో ఉన్నప్పటికీ కొనసాగుతున్న దాడులు గాజాలో పరిస్థితులు ఇంకా ఉద్రిక్తంగానే ఉన్నాయని స్పష్టం చేస్తున్నాయి.
