60 రోజుల కార్యాచరణ ప్రణాళికకు అమెరికా ఇరాన్ అంగీకరించాయి. ఇరుదేశాల మధ్య కొనసాగుతున్న దౌత్య చర్చల్లో కీలక పురోగతి నమోదైంది. జూన్ 18న కుదిరిన ఇస్లామాబాద్ అవగాహన ఒప్పందం ఆధారంగా స్విట్జర్లాండ్‌లోని బుర్గెన్‌స్టాక్‌లో జరిగిన తొలి ఉన్నతస్థాయి చర్చల అనంతరం, తుది ఒప్పందం దిశగా 60 రోజుల కార్యాచరణ ప్రణాళికపై ఇరు దేశాలు అంగీకరించాయి.
ఖతార్, పాకిస్తాన్ మధ్యవర్తిత్వంలో జరిగిన ఈ సమావేశంలో రాజకీయ పర్యవేక్షణ కోసం ఉన్నతస్థాయి కమిటీ ఏర్పాటు చేయాలని నిర్ణయించారు. ఈ కమిటీ అణు కార్యక్రమం, ఆంక్షలు, పర్యవేక్షణ, వివాద పరిష్కారం వంటి అంశాలపై పనిచేసే ప్రత్యేక బృందాలను సమన్వయం చేస్తుంది. వచ్చే 60 రోజుల్లో సమగ్ర ఒప్పందం సాధించడమే లక్ష్యంగా సాంకేతిక స్థాయి చర్చలు వెంటనే ప్రారంభించేందుకు మార్గం సుగమమైంది.
ప్రపంచ ఇంధన సరఫరాలకు అత్యంత కీలకమైన హోర్ముజ్ జలసంధిలో ఉద్రిక్తతలు, అపార్థాలు నివారించేందుకు అమెరికా ఇరాన్ మధ్య ప్రత్యక్ష సమాచార వ్యవస్థను ఏర్పాటు చేయాలని కూడా నిర్ణయించారు. వాణిజ్య నౌకల సురక్షిత రాకపోకలను నిర్ధారించడం ఈ వ్యవస్థ ప్రధాన ఉద్దేశంగా పేర్కొన్నారు.
లెబనాన్‌లో కాల్పుల విరమణ అమలును పర్యవేక్షించేందుకు అమెరికా, ఇరాన్, లెబనాన్ ప్రతినిధులతో ప్రత్యేక సమన్వయ విభాగాన్ని ఏర్పాటు చేశారు. దీనికి ఖతార్, పాకిస్తాన్ సౌకర్యదాతలుగా వ్యవహరించనున్నాయి. ఈ వ్యవస్థనే శాంతి ప్రక్రియకు తొలి నిజమైన పరీక్షగా ఇరాన్ విదేశాంగ మంత్రి సయిద్ అబ్బాస్ అరాఘ్చీ అభివర్ణించారు.
మధ్యవర్తిత్వ ప్రయత్నాల ఫలితంగా లెబనాన్ యుద్ధం ముగింపు దిశగా గణనీయమైన పురోగతి సాధించామని అరాఘ్చీ పేర్కొన్నారు. ఇరాన్ చమురు, పెట్రోకెమికల్ ఎగుమతులపై ఉన్న కొన్ని పరిమితులు ఎత్తివేయబడ్డాయని, నిల్వలో ఉన్న కొంత ఆస్తులు విడుదలయ్యాయని, పునర్నిర్మాణం మరియు అభివృద్ధి కార్యక్రమాలకు మార్గం ఏర్పడిందని తెలిపారు.
ఖతార్, పాకిస్తాన్ విడుదల చేసిన సంయుక్త ప్రకటన ప్రకారం, ప్రధాన చర్చాకర్తలు క్రమం తప్పకుండా ఉన్నతస్థాయి కమిటీకి నివేదికలు సమర్పిస్తారు. అణు అంశాలు, ఆంక్షలు, ఒప్పంద అమలు విధానాలపై ప్రత్యేక బృందాలు చర్చలను కొనసాగిస్తాయి.
జూన్ 18న ఇస్లామాబాద్ అవగాహన ఒప్పందం కుదిరిన తర్వాత ఏర్పాటైన తొలి ప్రధాన సంస్థాగత వ్యవస్థ ఇదే కావడం విశేషం. లెబనాన్‌లో కాల్పుల విరమణ అమలు ముందుగా జరగాలని ఇరాన్ పట్టుబట్టిన కొన్ని రోజులకే ఈ కీలక పరిణామాలు చోటుచేసుకున్నాయి.
