తాగి టూ వీలర్ నడిపితేనే తప్పు… మరి విమానం నడిపితే??? అదే అనుమానం మన ఏవియేషన్ అధికారులకు వచ్చింది. దాంతో ప్యాసింజెర్ విమానాలు నడిపే పైలెట్లకు ‘‘డోప్ టెస్టు’’ నిర్వహించాలని నిర్ణయించారు. వారి అనుమానాలే ఇప్పుడు నిజమయ్యాయి. ఎయిర్ ఇండియా గ్రూప్కు చెందిన ఇద్దరు పైలట్లకు నిర్వహించిన ప్రాథమిక డ్రగ్ పరీక్షల్లో ‘నాన్-నెగెటివ్’ ఫలితాలు వచ్చినట్లు సంబంధిత వర్గాలు సోమవారం వెల్లడించాయి.
దీంతో వారి నమూనాలను నిర్ధారణ పరీక్షల కోసం పంపించారు. అయితే ఆ ఇద్దరు పైలట్లు ఎవరన్నది, వారి పరీక్షల్లో ఏ పదార్థం గుర్తించబడిందన్నది వెంటనే స్పష్టంగా తెలియలేదు. ఈ విషయంపై ఎయిర్ ఇండియా నుంచి అధికారిక ప్రకటన వెలువడలేదు.
ఎయిర్ ఇండియా, ఎయిర్ ఇండియా ఎక్స్ప్రెస్ సంస్థలు ఆగస్టు 13 నుంచి తమ పైలట్లందరికీ తప్పనిసరిగా సైకోయాక్టివ్ సబ్స్టెన్స్ డ్రగ్ పరీక్షలను ప్రారంభించాయి. సాధారణంగా విమానయాన నియంత్రణ నిబంధనల ప్రకారం అవసరమైన పరీక్షల పరిధిని మించి ఈ తనిఖీలను విస్తరించడం గమనార్హం. ఆగస్టు 4న జరిగిన ఎయిర్ ఇండియా విమాన ఘటన నేపథ్యంలో ఈ నిర్ణయం తీసుకున్నారు.
ఆగస్టు 4న ఫుకెట్ నుంచి ఢిల్లీకి బయలుదేరిన ఎయిర్ ఇండియా విమానం AI2379 అకస్మాత్తుగా ఎత్తు కోల్పోయింది. ఎయిర్బస్ A320neo విమానం గాల్లో ప్రయాణిస్తున్న సమయంలో తీవ్ర అల్లకల్లోలం (టర్బులెన్స్) ఏర్పడటంతో సుమారు 300 అడుగులు అంటే 91 మీటర్ల మేర కిందికి పడిపోయింది. ఈ విమానంలో 137 మంది ప్రయాణికులు, ఎనిమిది మంది సిబ్బందితో కలిపి మొత్తం 145 మంది ఉన్నారు. ఈ ఘటనలో కనీసం 24 మంది గాయపడ్డారు.
ఈ ఘటన అనంతరం విమానం పైలట్కు నిర్వహించిన డ్రగ్ పరీక్షలో గంజాయి (మారిజువానా) పాజిటివ్గా నిర్ధారణ అయింది. తొలుత నిర్వహించిన స్క్రీనింగ్ పరీక్షలో ‘నాన్-నెగెటివ్’ ఫలితం వచ్చింది. అనంతరం నిర్వహించిన నిర్ధారణ పరీక్షలో మారిజువానా ఉన్నట్లు తేలింది. దీంతో పైలట్ల డ్రగ్ వినియోగంపై విమానయాన రంగంలో మరోసారి తీవ్ర చర్చ మొదలైంది.
తాజా సమాచారం ప్రకారం ఎయిర్ ఇండియా గ్రూప్లో ఇప్పటివరకు సుమారు 400 మంది పైలట్లకు సైకోయాక్టివ్ సబ్స్టెన్స్ పరీక్షలు పూర్తయ్యాయి. వీరిలో ఇద్దరి ప్రాథమిక పరీక్షల్లో ‘నాన్-నెగెటివ్’ ఫలితాలు వచ్చాయి. వారి నమూనాలను ప్రస్తుతం నిర్ధారణ పరీక్షలకు పంపించారు. ప్రాథమిక పరీక్షలో ‘నాన్-నెగెటివ్’ రావడం మాత్రమే డ్రగ్ వినియోగం నిర్ధారణ అయినట్లు కాదని, తుది నిర్ధారణ పరీక్షల ఫలితాల ఆధారంగానే తదుపరి చర్యలు ఉంటాయని సంబంధిత వర్గాలు చెబుతున్నాయి.
టాటా గ్రూప్కు చెందిన ఎయిర్ ఇండియా, ఎయిర్ ఇండియా ఎక్స్ప్రెస్ సంస్థల్లో కలిపి 5,000 మందికి పైగా పైలట్లు పనిచేస్తున్నారు. సమగ్ర డ్రగ్ స్క్రీనింగ్లో ప్రస్తుత విమానయాన నిబంధనల ప్రకారం నిషేధిత సైకోయాక్టివ్ పదార్థాలతో పాటు కొన్ని నిషేధిత మందుల వినియోగాన్ని కూడా పరిశీలిస్తున్నారు. పైలట్ల ఆరోగ్యం, అప్రమత్తత, విమాన భద్రతను దృష్టిలో ఉంచుకుని ఈ పరీక్షలను నిర్వహిస్తున్నారు.
ఆగస్టు 4 ఘటన అనంతరం ప్రారంభమైన ఈ విస్తృత స్థాయి తనిఖీల్లో మరిన్ని పరీక్షల ఫలితాలు వెలువడే అవకాశం ఉంది. తాజా ఇద్దరు పైలట్లకు సంబంధించిన నిర్ధారణ పరీక్షల ఫలితాలు వచ్చిన తర్వాతే వారి విషయంలో తదుపరి చర్యలు తీసుకునే అవకాశం ఉంది.
