డైరెక్టరేట్ ఆఫ్ రెవెన్యూ ఇంటెలిజెన్స్ (DRI) చేపట్టిన “ఆపరేషన్ ఫైర్ ట్రైల్” పేరుతో జరుగుతున్న నిరంతర కార్యకలాపాల్లో ఒక ప్రధాన విజయాన్ని నమోదు చేసింది. చైనా నుంచి అక్రమంగా దిగుమతి అవుతున్న భారీ మొత్తంలో టపాసులు, బాణసంచా రవాణా ప్రయత్నాన్ని అధికారులు విజయవంతంగా అడ్డుకున్నారు.
ముంబై సమీపంలోని నవా షేవా పోర్టు వద్ద డీఆర్ఐ అధికారులు అప్రమత్తంగా వ్యవహరించి, చైనా నుండి వచ్చి, గుజరాత్లోని ఐసీడీ అంక్లేశ్వర్కు వెళ్లాల్సిన ఓ 40-అడుగుల కంటైనర్ను నిలిపివేశారు. దిగుమతి పత్రాల్లో ఈ కంటైనర్లో “లెగ్గింగ్స్” (దుస్తులు) ఉన్నట్లు ప్రకటించారు. కానీ, అధికారులకు అనుమానం వచ్చి కంటైనర్ను క్షుణ్ణంగా తనిఖీ చేయగా, ముందు భాగంలో పైపైన కొన్ని దుస్తులు మాత్రమే కనిపించాయి.
వాటి వెనుక, లోపలి వైపు చాకచక్యంగా దాచి ఉంచిన 46,640 ప్యాకెట్ల టపాసులు/బాణసంచా సరుకు బయటపడింది. స్వాధీనం చేసుకున్న ఈ అక్రమ కన్సైన్మెంట్ మొత్తం విలువ ₹4.82 కోట్లుగా అంచనా వేశారు. ఈ అక్రమ రవాణాకు సంబంధించిన కీలక ఆధారాలను, పత్రాలను తదుపరి సోదాల్లో డీఆర్ఐ అధికారులు సేకరించారు.
ఈ పత్రాలు అక్రమ రవాణా ముఠా పనితీరు (మోడస్ ఆపరేండీ)ని వెల్లడించాయి. దీని ఆధారంగా, ఈ స్మగ్లింగ్ వెనుక ఉన్న ముఖ్య సూత్రధారిని గుజరాత్లోని వెరావల్ నుండి అరెస్టు చేశారు. భారత విదేశీ వాణిజ్య విధానం (Foreign Trade Policy) ప్రకారం, టపాసుల దిగుమతి ‘నియంత్రితం’ (Restricted) కేటగిరీ కిందకు వస్తుంది.
వీటి దిగుమతికి డైరెక్టరేట్ జనరల్ ఆఫ్ ఫారెన్ ట్రేడ్ (DGFT) తో పాటు, ఎక్స్ప్లోజివ్స్ రూల్స్, 2008 కింద పెట్రోలియం అండ్ ఎక్స్ప్లోజివ్స్ సేఫ్టీ ఆర్గనైజేషన్ (PESO) నుంచి కూడా తప్పనిసరిగా లైసెన్స్లు ఉండాలి. ఇలాంటి ప్రమాదకర వస్తువులను చట్టవిరుద్ధంగా దిగుమతి చేసుకోవడం ప్రజల భద్రతకు, జాతీయ భద్రతకు, అలాగే పోర్టు మౌలిక సదుపాయాలకు తీవ్రమైన ముప్పును కలిగిస్తుంది.
దేశ వాణిజ్య మరియు భద్రతా వ్యవస్థల సమగ్రతను కాపాడటానికి, ఇలాంటి వ్యవస్థీకృత అక్రమ రవాణా నెట్వర్క్లను గుర్తించి, నిర్మూలించడంలో డీఆర్ఐ స్థిరంగా పనిచేస్తుందని అధికారులు స్పష్టం చేశారు.
