గత దశాబ్ద కాలంగా ప్రపంచవ్యాప్తంగా అనేక అవాంతరాలు ఎదురైనప్పటికీ, భారతదేశం అద్భుతమైన అభివృద్ధిని సాధిస్తూ ప్రపంచ ఆర్థిక వ్యవస్థకు కొత్త ఇంజిన్‌గా అవతరిస్తోందని ప్రధానమంత్రి నరేంద్ర మోదీ ఆకాంక్షించారు.
శుక్రవారం న్యూఢిల్లీలో జరిగిన ‘ఈటీ నౌ గ్లోబల్ బిజినెస్ సమ్మిట్ 2026’లో ఆయన ప్రసంగించారు. ‘ఒక దశాబ్దపు అంతరాయం – శతాబ్దపు మార్పు’ అనే ఇతివృత్తంతో జరిగిన ఈ సదస్సులో ప్రధాని మాట్లాడుతూ, గత పదేళ్లలో కరోనా మహమ్మారి, ప్రాంతీయ యుద్ధాలు మరియు సరఫరా గొలుసుల విచ్ఛిన్నం వంటి సవాళ్లు ప్రపంచ సమతుల్యతను దెబ్బతీశాయని గుర్తు చేశారు.
ఇటువంటి సంక్షోభ సమయాలే ఒక దేశం యొక్క అసలైన శక్తిని నిరూపిస్తాయని, ఈ కాలంలో భారత్ తన ప్రజాస్వామ్యాన్ని బలోపేతం చేసుకోవడమే కాకుండా వేగవంతమైన అభివృద్ధిని నమోదు చేసిందని ఆయన గర్వంగా ప్రకటించారు.
పదేళ్ల క్రితం భారత్ ప్రపంచంలో 11వ అతిపెద్ద ఆర్థిక వ్యవస్థగా ఉండేదని, అప్పట్లో దేశ ఆర్థిక పరిస్థితిపై నీలినీడలు ముసురుకున్నాయని మోదీ పేర్కొన్నారు. అయితే నేడు భారత్ ప్రపంచంలోనే మూడవ అతిపెద్ద ఆర్థిక వ్యవస్థగా అవతరించే దిశగా శరవేగంగా దూసుకెళ్తోందని ధీమా వ్యక్తం చేశారు.
ప్రస్తుతం ప్రపంచ వృద్ధిలో భారతదేశం 16 శాతానికి పైగా సహకారం అందిస్తోందని, రాబోయే కాలంలో ఈ వాటా మరింత పెరుగుతుందని ఆయన వివరించారు. రెండవ ప్రపంచ యుద్ధం తర్వాత ఏర్పడిన పాత అంతర్జాతీయ క్రమం ప్రస్తుతం అస్థిరంగా మారుతోందని, ‘వన్ సైజ్ ఫిట్స్ ఆల్’ (అందరికీ ఒకే రకమైన విధానం) అనే పాత పద్ధతి ఇక ఎంతమాత్రం పనికిరాదని ఆయన స్పష్టం చేశారు.
ప్రతి దేశం తనదైన స్వయంప్రతిపత్తిని, స్థితిస్థాపకతను నిర్మించుకోవాల్సిన అవసరం ఏర్పడిందని ప్రధాని అభిప్రాయపడ్డారు. ప్రపంచం ఈ మార్పుల గురించి ఇప్పుడు చర్చిస్తుంటే, భారత్ మాత్రం 2015లోనే ఈ దిశగా అడుగులు వేసిందని మోదీ గుర్తు చేశారు.
పదేళ్ల క్రితం నీతి ఆయోగ్ ఏర్పాటు చేసినప్పుడే, విదేశీ అభివృద్ధి నమూనాలను దిగుమతి చేసుకోకుండా మన అవసరాలకు అనుగుణంగా మనదైన స్వంత విధానాన్ని అనుసరించాలని నిర్ణయించుకున్నట్లు ఆయన తెలిపారు.
ఈ స్వయంప్రతిపత్తి కలిగిన విధానాలే అంతర్జాతీయ ఒడిదుడుకుల సమయంలోనూ భారత ఆర్థిక వ్యవస్థ బలహీనపడకుండా మరింత శక్తివంతంగా ఎదగడానికి ప్రధాన కారణమని ప్రధాని నరేంద్ర మోదీ స్పష్టం చేశారు.
