అమెరికా భారత్ మధ్య మళ్లీ వాణిజ్యపరమైన చర్చలు ప్రారంభం అయ్యాయి. ఇందులో భాగంగా అమెరికా విదేశాంగ మంత్రి మార్కో రూబియో భారత్‌లో పర్యటిస్తున్నారు. ఈ ఏడాదిలో ఆయన భారత్‌కు రావడం ఇది రెండోసారి. ఆసియా దేశాలతో దౌత్య సంబంధాలను బలోపేతం చేయడంతో పాటు వాణిజ్య అంశాలపై చర్చలు జరిపే లక్ష్యంతో ఆయన ఈ పర్యటన చేపట్టారు. ఉజ్బెకిస్థాన్‌ పర్యటన అనంతరం ముంబైకి చేరుకోనున్న రూబియో భారత విదేశాంగ మంత్రి ఎస్‌. జైశంకర్‌తో సమావేశం కానున్నారు. అలాగే వ్యాపార ప్రముఖులతోనూ చర్చలు జరపనున్నారు.
భారత్, అమెరికా మధ్య వాణిజ్య ఒప్పందం ఖరారు కావాల్సి ఉన్న నేపథ్యంలో రూబియో పర్యటనకు ప్రాధాన్యం ఏర్పడింది. ఇరు దేశాల మధ్య వాణిజ్య సంబంధాలు కొంతకాలంగా ఉద్రిక్తతలను ఎదుర్కొంటున్నాయి. ఉజ్బెకిస్థాన్‌లోని సమర్‌కండ్‌లో సోమవారం మాట్లాడిన రూబియో.. భారత్, అమెరికా వాణిజ్య ఒప్పందానికి చాలా దగ్గరగా ఉన్నాయని తెలిపారు. అయితే ప్రస్తుత పర్యటనలోనే ఒప్పందం ఖరారయ్యే అవకాశాలు పరిమితంగానే కనిపిస్తున్నాయి.
గత ఏడాది ఏప్రిల్‌లో అమెరికా అధ్యక్షుడు డొనాల్డ్‌ ట్రంప్‌ ప్రారంభించిన సుంకాల విధానం ఇరు దేశాల మధ్య విభేదాలను మరింత పెంచింది. రష్యా నుంచి భారత్ పెద్ద మొత్తంలో చమురు దిగుమతి చేసుకోవడం, అమెరికా–పాకిస్థాన్‌ సంబంధాలు మెరుగుపడటం కూడా ద్వైపాక్షిక సంబంధాలపై ప్రభావం చూపుతున్నాయి. భారత్‌కు పాత ప్రత్యర్థిగా ఉన్న పాకిస్థాన్‌తో అమెరికా సాన్నిహిత్యం పెరగడంపై కూడా దృష్టి నెలకొంది.
రష్యా చమురు కొనుగోళ్లకు సంబంధించి అమెరికా తాత్కాలికంగా కొన్ని ఆంక్షల నుంచి మినహాయింపులు ఇవ్వడంపై రూబియోను ప్రశ్నించగా ఇతర దేశాలతో ద్వైపాక్షిక సంబంధాలు, ఆయా దేశాలు తమ ఇంధన అవసరాలను వాస్తవికంగా ఎంతవరకు తీర్చుకోగలవన్న అంశాలను కూడా పరిగణనలోకి తీసుకోవాల్సి ఉంటుందని చెప్పారు. ఒకే అంశాన్ని దృష్టిలో ఉంచుకుని ఇతర దేశాల ఆర్థిక వ్యవస్థలను దెబ్బతీయలేమని ఆయన వ్యాఖ్యానించారు.
భారత ఆర్థిక మంత్రి నిర్మలా సీతారామన్‌ ఈ నెలలో వాణిజ్య చర్చలపై స్పందిస్తూ అవి ఒక స్థాయికి చేరుకున్నాయని, ఆ తర్వాత ఇరు పక్షాలు పరస్పరం ఇచ్చిపుచ్చుకునే అంశాల్లో ముందుకు సాగడం చాలా కష్టంగా మారవచ్చని పేర్కొన్నారు. ఈ నేపథ్యంలో మార్కో రూబియో పర్యటన ద్వారా వాణిజ్య చర్చల్లో పురోగతి సాధ్యమవుతుందా, రష్యా చమురు దిగుమతులు, సుంకాలు వంటి అంశాలపై ఇరు దేశాలు ఏకాభిప్రాయానికి వస్తాయా అన్నది ఆసక్తికరంగా మారింది.
