పల్నాడు జిల్లా మాచర్ల మున్సిపాలిటీలో ఎన్నికల నామినేషన్ల ప్రక్రియ ప్రారంభమైంది. ఇందులో భాగంగా మాచర్ల మున్సిపల్ చైర్మన్ పదవికి వైఎస్సార్ కాంగ్రెస్ పార్టీ అభ్యర్థిగా షేక్ సుల్తానా మున్సిపల్ కార్యాలయంలో నామినేషన్ దాఖలు చేశారు.
నామినేషన్ల ప్రక్రియకు సంబంధించి మాచర్ల మున్సిపల్ కార్యాలయంలో ఏర్పాటు చేసిన ఏర్పాట్లను మున్సిపల్ ప్రత్యేక అధికారి, గురజాల ఆర్డీవో మురళీకృష్ణ పరిశీలించారు. ఈ సందర్భంగా ఆర్డీవో మురళీకృష్ణ మాట్లాడుతూ, నామినేషన్ల ప్రక్రియ ప్రశాంతంగా జరిగేలా అన్ని ఏర్పాట్లు చేసినట్లు తెలిపారు. ఎలాంటి అవాంఛనీయ ఘటనలు చోటుచేసుకోకుండా అవసరమైన చర్యలు తీసుకున్నామని వెల్లడించారు.
నామినేషన్ దాఖలు చేసే అభ్యర్థితో పాటు మరో ఇద్దరికి మాత్రమే కార్యాలయంలోకి ప్రవేశం ఉంటుందని స్పష్టం చేశారు. ఉదయం 11 గంటల నుంచి మధ్యాహ్నం 3 గంటల వరకు వచ్చే అభ్యర్థుల నామినేషన్లను స్వీకరిస్తామని తెలిపారు. మాచర్ల మున్సిపాలిటీలోని 36 వార్డులకు సంబంధించి నామినేషన్ల స్వీకరణ కోసం 10 కౌంటర్లను ఏర్పాటు చేసినట్లు వివరించారు. ప్రతి కౌంటర్‌లో ఒక ఎన్నికల అధికారి, ఇద్దరు సహాయక అధికారులు విధులు నిర్వహిస్తారని పేర్కొన్నారు.
నామినేషన్ దాఖలు చేసిన అనంతరం చెక్ స్లిప్ అందజేస్తామని, నామినేషన్ పత్రాల్లో ఏవైనా లోపాలు ఉన్నట్లయితే వాటిని కూడా సంబంధిత స్లిప్‌లో తెలియజేస్తామని తెలిపారు. మాచర్ల మున్సిపల్ ఎన్నికలు సజావుగా, ప్రశాంతంగా జరిగేందుకు అన్ని రాజకీయ పార్టీల నాయకులు, అభ్యర్థులు అధికారులకు సహకరించాలని ఆర్డీవో మురళీకృష్ణ విజ్ఞప్తి చేశారు.
