టీ20 ప్రపంచకప్లో భారత్–పాకిస్థాన్ మ్యాచ్ షెడ్యూల్ ప్రకారమే జరుగుతుందని స్పష్టత వచ్చింది. బంగ్లాదేశ్, శ్రీలంకల విజ్ఞప్తి మేరకు పాకిస్థాన్ ప్రభుత్వం తన బహిష్కరణ నిర్ణయాన్ని వెనక్కి తీసుకోవడంతో టోర్నమెంట్పై నెలకొన్న అనిశ్చితి తొలగిపోయింది. అత్యంత ఆసక్తిగా ఎదురుచూస్తున్న ఈ హై వోల్టేజ్ మ్యాచ్ ఫిబ్రవరి 15న కొలంబోలో జరగనుంది.
స్నేహపూర్వక దేశాల అభ్యర్థనల నేపథ్యంలో ఐసీసీ పురుషుల టీ20 ప్రపంచకప్లో ఫిబ్రవరి 15న జరగనున్న మ్యాచ్కు పాకిస్థాన్ జాతీయ క్రికెట్ జట్టు మైదానంలోకి దిగాలని నిర్ణయించినట్లు పాకిస్థాన్ ప్రభుత్వం విడుదల చేసిన ప్రకటనలో పేర్కొంది. క్రికెట్ స్ఫూర్తిని కాపాడటం, ప్రపంచవ్యాప్తంగా ఈ క్రీడ నిరంతరతకు మద్దతు ఇవ్వాలన్న ఉద్దేశంతోనే ఈ నిర్ణయం తీసుకున్నట్లు ఆ ప్రకటనలో తెలిపింది.
బంగ్లాదేశ్ క్రికెట్ బోర్డు చీఫ్ అమీనుల్ ఇస్లాం, శ్రీలంక అధ్యక్షుడు అనుర కుమార దిస్సానాయకే పాకిస్థాన్ ప్రధాని షెహబాజ్ షరీఫ్కు ఫోన్ చేసి, ఈ ప్రతిష్ఠంభనను స్నేహపూర్వకంగా పరిష్కరించాలని కోరినట్లు సమాచారం. ఈ ప్రకటనకు ముందు పాకిస్థాన్ క్రికెట్ బోర్డు చైర్మన్ మొహ్సిన్ నఖ్వీ, ఐసీసీతో జరిగిన చర్చల వివరాలను ప్రధాని షరీఫ్కు వివరించారు.
ఈ చర్చల్లో అమీనుల్ ఇస్లాం కూడా పాల్గొన్నారు. తుది నిర్ణయానికి మరో రోజు పడుతుందని నఖ్వీ ముందుగా చెప్పినప్పటికీ, బంగ్లాదేశ్ వైఖరి సమంజసమైనదని భావించి వారికి మద్దతుగా నిలిచామని ఆయన తెలిపారు. భద్రతా కారణాలతో భారత్లో ఆడేందుకు నిరాకరించడంతో బంగ్లాదేశ్ను టోర్నమెంట్ నుంచి తొలగించారు.
అయితే, తమకు మద్దతిచ్చిన పాకిస్థాన్కు అమీనుల్ ఇస్లాం కృతజ్ఞతలు తెలుపుతూ, మొత్తం క్రికెట్ వ్యవస్థ ప్రయోజనం కోసం భారత్తో జరిగే మ్యాచ్కు హాజరుకావాలని కోరారు. ఈ పరిణామాల అనంతరం ఐసీసీ కూడా ప్రకటన విడుదల చేసి, భారత్లో ఆడేందుకు నిరాకరించినందుకు బంగ్లాదేశ్పై ఎలాంటి ఆర్థిక, క్రీడా లేదా పరిపాలనా జరిమానాలు విధించబోమని స్పష్టం చేసింది.
బంగ్లాదేశ్ క్రికెట్ బోర్డు అవసరమైతే వివాద పరిష్కార కమిటీని ఆశ్రయించే హక్కు కొనసాగుతుందని పేర్కొంది. అలాగే 2028 నుంచి 2031 మధ్య ఒక అంతర్జాతీయ టోర్నమెంట్ ఆతిథ్య హక్కులను బంగ్లాదేశ్కు ఇవ్వడానికీ అంగీకరించినట్లు వెల్లడించింది.
టోర్నమెంట్లో బంగ్లాదేశ్ స్థానంలో స్కాట్లాండ్ను చేర్చిన విషయం తెలిసిందే. ఐసీసీ హెచ్చరికల వల్ల పీసీబీపై ఒత్తిడి వచ్చిందన్న ఆరోపణలను నఖ్వీ ఖండించారు. బెదిరింపులకు భయపడే స్థితిలో తాము లేమని, ఎలాంటి ఆంక్షలకూ ఆందోళన చెందడం లేదని ఆయన వ్యాఖ్యానించారు. ఐసీసీ డిప్యూటీ చైర్ ఇమ్రాన్ ఖ్వాజాతో జరిగిన భేటీలో భారత్–పాక్ ద్వైపాక్షిక క్రికెట్ పునరుద్ధరణ, బంగ్లాదేశ్తో కలిసి త్రైసిరీస్ నిర్వహణ వంటి డిమాండ్లను నఖ్వీ ఉంచినట్లు సమాచారం.
టోర్నమెంట్ నుంచి బంగ్లాదేశ్ తొలగింపుతో ఆ దేశ క్రికెట్ బోర్డుకు కలిగిన నష్టాన్ని పూడ్చేందుకు ఈ ప్రతిపాదనలు చేసినట్లు తెలుస్తోంది. భారత్–పాక్ ద్వైపాక్షిక సిరీస్ ఐసీసీ పరిధిలోకి రాదని, త్రైసిరీస్ ప్రతిపాదనను ఐసీసీ తిరస్కరించినట్లు తెలిసింది. భారత్ గత పదేళ్లుగా త్రైదేశీయ టోర్నమెంట్లు ఆడలేదని అధికారులు పేర్కొన్నారు. అయితే భవిష్యత్తులో అండర్-19 ప్రపంచకప్ను బంగ్లాదేశ్కు కేటాయించే అంశాన్ని ఐసీసీ పరిశీలించవచ్చని సమాచారం.
