ఒడిశాలోని కటక్ వేదికగా ఏప్రిల్ 8 నుండి 11 వరకు జరిగిన మొదటి ‘ఆల్ ఇండియా ఇండోర్ రోయింగ్ ఛాంపియన్‌షిప్’లో తెలంగాణ రోయర్లు అద్భుత ప్రదర్శన కనబరిచారు. ఈ ప్రతిష్టాత్మక పోటీల్లో తెలంగాణ జట్టు మొత్తం 7 పతకాలను కొల్లగొట్టి సత్తా చాటింది. ఇందులో 2 స్వర్ణ పతకాలు, 3 రజత పతకాలు మరియు 2 కాంస్య పతకాలు ఉన్నాయి. ముఖ్యంగా అండర్-15 విభాగంలో తెలంగాణ జట్టు రన్నరప్ ట్రోఫీని గెలుచుకోవడం విశేషం.
ఈ పోటీల్లో తెలంగాణ స్పోర్ట్స్ స్కూల్, తెలంగాణ ట్రైబల్ స్కూల్ మరియు హైదరాబాద్ నగరానికి చెందిన రోయర్లు ప్రాతినిధ్యం వహించారు. జాతీయ స్థాయిలో జరిగిన ఈ తొలి ఇండోర్ రోయింగ్ పోటీల్లో తెలంగాణ క్రీడాకారులు తమ పట్టుదల, నైపుణ్యంతో ఇతర రాష్ట్రాల పోటీదారులకు గట్టి పోటీనిచ్చారు.
విజేతలుగా నిలిచిన క్రీడాకారులను రాష్ట్ర క్రీడా వర్గాలు మరియు కోచ్‌లు అభినందించారు. గ్రామీణ మరియు గిరిజన ప్రాంతాల నుండి వచ్చిన క్రీడాకారులు జాతీయ స్థాయిలో పతకాలు సాధించడం పట్ల సర్వత్రా హర్షం వ్యక్తమవుతోంది.
