జంతర్ మంతర్ వద్ద విద్యార్థులు, నిరసనకారులపై పోలీసుల దాడి ఘటనపై ప్రతిపక్షాల ఆందోళనలు, జవాబుదారీతనంపై డిమాండ్ల నేపథ్యంలో కేంద్ర హోంమంత్రి అమిత్ షా సోమవారం లోక్‌సభలో ఈ అంశంపై స్పందించనున్నారు. ప్రతిపక్షాలు ఏకతాటిపైకి వచ్చి.. హోంమంత్రి సమాధానం ఇవ్వకపోతే సభా కార్యక్రమాలను కొనసాగించేందుకు అంగీకరించబోమని లోక్‌సభ బిజినెస్ అడ్వైజరీ కమిటీ (BAC) సమావేశంలో స్పష్టం చేసిన నేపథ్యంలో ఈ నిర్ణయం తీసుకున్నారు. రామ మందిర విరాళాల నిధుల దుర్వినియోగంపై కూడా చర్చ జరపాలని ప్రతిపక్షాలు డిమాండ్ చేశాయి.
కేంద్ర పార్లమెంటరీ వ్యవహారాల శాఖ మంత్రి కిరెన్ రిజిజు ఈ పరిణామాన్ని ధ్రువీకరించారు. విద్యార్థుల ఆందోళనలు, వాటికి సంబంధించిన అంశాలపై పూర్తి స్థాయి చర్చకు ప్రభుత్వం సిద్ధంగా ఉందని తెలిపారు. హోంమంత్రి సమాధానం ఇచ్చే సమయంలో ప్రతిపక్ష సభ్యులు సభలో ప్రశాంతంగా ఉండి, ఎలాంటి అంతరాయాలు కలిగించకుండా సహకరించాలని కోరారు.
జంతర్ మంతర్ నిరసన, దానికి సంబంధించిన అంశాలపై చర్చకు హోంమంత్రి అమిత్ షా కేవలం ప్రకటన చేయడం మాత్రమే కాకుండా, చర్చ అనంతరం సమాధానం కూడా ఇస్తారని రిజిజు స్పష్టం చేశారు. విద్యార్థుల ఉద్యమాలకు సంబంధించిన అన్ని అంశాలపై పూర్తి స్థాయి చర్చకు ప్రభుత్వం సిద్ధంగా ఉందని, ప్రతిపక్షాలు సభా కార్యకలాపాలను అడ్డుకోకూడదని ఆయన అన్నారు.
కాంగ్రెస్, సమాజ్‌వాదీ పార్టీ సహా ప్రతిపక్ష పార్టీల మధ్య కొన్ని అంశాల్లో భేదాభిప్రాయాలు ఉన్నాయని, వాటిని ఆయా పార్టీలు పరిష్కరించుకోవాలని రిజిజు సూచించారు. రామ మందిర విరాళాల వ్యవహారంపై ఉత్తరప్రదేశ్ ప్రభుత్వం ఇప్పటికే ప్రత్యేక దర్యాప్తు బృందాన్ని (SIT) ఏర్పాటు చేసిందని, ఆ దర్యాప్తు కొనసాగుతోందని తెలిపారు.
సభా కార్యక్రమాలు సజావుగా సాగేందుకు సహకరించాలని ప్రభుత్వం ప్రతిపక్షాలను కోరింది. గనులు, ఖనిజాలు, సహకార రంగానికి సంబంధించిన రెండు బిల్లులను కూడా లోక్‌సభలో ప్రవేశపెట్టారు. అయితే ఈ బిల్లులను మరింత లోతుగా పరిశీలించేందుకు పార్లమెంటరీ స్థాయీ సంఘాలకు పంపించాలని ప్రతిపక్షాలు డిమాండ్ చేశాయి.
జూలై 20న విద్యార్థుల నిరసనలపై పోలీసులు బలప్రయోగం చేసిన ఘటనపై హోంమంత్రి అమిత్ షా సమాధానం ఇవ్వాలని ప్రతిపక్షాలు పట్టుబట్టాయి. ఈ ఘటనలో ఢిల్లీ పోలీసులు, ర్యాపిడ్ యాక్షన్ ఫోర్స్ నిరసనకారులపై పెల్లెట్ గన్స్ ఉపయోగించినట్లు అంగీకరించాయని కాంగ్రెస్ పేర్కొంది. ఢిల్లీ పోలీసులు, ర్యాపిడ్ యాక్షన్ ఫోర్స్ హోంశాఖ పరిధిలో ఉండటంతో ఈ ఘటనకు బాధ్యత వహిస్తూ అమిత్ షా రాజీనామా చేయాలని కాంగ్రెస్ డిమాండ్ చేస్తోంది.
మధ్యాహ్నం 2 గంటలకు లోక్‌సభ తిరిగి సమావేశమైన తర్వాత కూడా కాంగ్రెస్ నేతృత్వంలోని ప్రతిపక్ష సభ్యులు నినాదాలు చేస్తూ ఆందోళన కొనసాగించారు. సభను నిర్వహిస్తున్న జగదాంబికా పాల్ సభ్యులు క్రమశిక్షణ పాటించాలని కోరారు. హోంమంత్రి స్పందించేందుకు సిద్ధంగా ఉన్నారని, అయితే ప్రతిపక్షాలు శాంతియుతంగా, సభా మర్యాదలను పాటిస్తూ వ్యవహరించాల్సి ఉంటుందని పార్లమెంటరీ వ్యవహారాల మంత్రి ఇప్పటికే స్పష్టం చేశారని ఆయన గుర్తుచేశారు.
