కుటుంబ సభ్యులనే చంపితే ఎలా ఉంటుంది? వికృతమైన, దారుణమైన ఈ అంశంపై డార్క్ వెబ్ లో వెతికాడు… చివరకు అలానే చేసేశాడు…. చదవడానికే బాధగా అనిపించే ఈ సంఘటన అమెరికాలోని మసాచుసెట్స్లో జరిగింది. 17 ఏళ్ల వయసు ఉన్న భారతీయ సంతతికి చెందిన అర్జున్ అరవింద్ ఈ దారుణానికి పాల్పడ్డాడు. సొంత తల్లి సుధా వెంకటేశన్ (45), తమ్ముడు సిద్ధార్థ్ అరవింద్ (14)లను అతి కిరాతకంగా హత్య చేసి పారిపోయాడు.
యాక్టన్కు చెందిన అర్జున్ అరవింద్పై రెండు హత్య కేసులతో పాటు కుటుంబ సభ్యులపై దాడి, దాడికి యత్నం, అనుమతి లేకుండా వాహనం వినియోగించడం, మోటారు వాహనం చోరీకి సంబంధించిన పలు అభియోగాలను అధికారులు నమోదు చేశారు.
మిడిల్సెక్స్ డిస్ట్రిక్ట్ అటార్నీ మరియన్ ర్యాన్, యాక్టన్ పోలీస్ చీఫ్ డగ్లస్ స్టర్నియోలో వెల్లడించిన వివరాల ప్రకారం, మంగళవారం ఆగస్టు 11న యాక్టన్లోని మార్తా లేన్లో ఉన్న కుటుంబ నివాసంలో ఈ ఘటన జరిగింది. బోస్టన్కు సుమారు 48 కిలోమీటర్ల దూరంలో ఉన్న ఈ ప్రాంతంలో సాయంత్రం 6.37 గంటల సమయంలో అర్జున్ తండ్రి పోలీసులకు ఫోన్ చేశారు. తన కుటుంబ సభ్యులను సంప్రదించేందుకు ప్రయత్నించినా స్పందించకపోవడంతో ఆయన పోలీసులను ఆశ్రయించారు. ఇంటికి రావాల్సిన ట్యూటర్ కూడా కుటుంబ సభ్యులను సంప్రదించలేకపోయినట్లు అధికారులు తెలిపారు.
అర్జున్ తండ్రి ఉదయం పనికి వెళ్లే ముందు తన భార్య సుధాతో చివరిసారిగా మాట్లాడారు. అర్జున్ తమ్ముడు సిద్ధార్థ్ మధ్యాహ్నం సమయంలో చివరిసారిగా కనిపించినట్లు అధికారులు తెలిపారు. పోలీసులు ఇంటికి చేరుకున్నప్పుడు ఇద్దరూ మృతి చెంది కనిపించారు. సిద్ధార్థ్ మృతదేహం మొదటి అంతస్తులో, సుధా మృతదేహం బేస్మెంట్లోని పూర్తిచేసిన గదిలో లభ్యమైంది. ఇద్దరి శరీరాలపై స్పష్టమైన గాయాల గుర్తులు ఉన్నాయని పోలీసులు తెలిపారు. అయితే మరణానికి ఖచ్చితమైన కారణం, ఏ విధంగా మరణం సంభవించిందన్న వివరాలను చీఫ్ మెడికల్ ఎగ్జామినర్ ఇంకా వెల్లడించలేదు. హత్యల్లో ఉపయోగించిన ఆయుధం ఏమిటన్నదీ దర్యాప్తులోనే ఉంది.
ఘటన అనంతరం అర్జున్ ఇంట్లో కనిపించలేదని పోలీసులు తెలిపారు. అతడు తన తల్లి కారులో అక్కడి నుంచి వెళ్లిపోయినట్లు ఆరోపణలు ఉన్నాయి. అర్జున్ కోసం పోలీసులు గాలింపు చేపట్టడంతోపాటు ఇతర భద్రతా సంస్థలు, ప్రజలను అప్రమత్తం చేశారు. బుధవారం తెల్లవారుజామున మసాచుసెట్స్లోని వేలాండ్లో ఓ పార్కింగ్ ప్రాంతంలో మరో ఘటనకు సంబంధించి స్పందించిన పోలీసులు అక్కడ అర్జున్ ఉన్న కారును గుర్తించారు. కారులో ఉన్న అర్జున్ను ఎలాంటి ప్రతిఘటన లేకుండా అదుపులోకి తీసుకున్నారు.
అర్జున్ ప్రవర్తనపై కూడా దర్యాప్తులో కీలక విషయాలు వెలుగులోకి వచ్చినట్లు మిడిల్సెక్స్ కౌంటీ డిస్ట్రిక్ట్ అటార్నీ కార్యాలయం తెలిపింది. ఇటీవల అతడు తన కుటుంబ సభ్యులను హత్య చేయడం గురించి డార్క్ వెబ్ లో వెతికినట్లు కనిపెట్టారు. అదే విధంగా తన ఊహలను మరింతగా తెలుసుకునేందుకు ఇంటర్నెట్తో పాటు చాట్జీపీటీలో శోధనలు చేసినట్లు అధికారులు పేర్కొన్నారు. అయితే ఆ శోధనలకు, జరిగిన హత్యలకు మధ్య ఉన్న సంబంధంపై దర్యాప్తు కొనసాగుతోంది.
అర్జున్ను లోవెల్ జువెనైల్ కోర్టులో హాజరుపరచాల్సి ఉంది. అయితే జువెనైల్ కోర్టుకు హత్య కేసుపై విచారణ జరిపే అధికార పరిధి లేకపోవడంతో, హత్యతో పాటు సంబంధిత దాడి కేసులపై అతడిని అనంతరం కాంకర్డ్ డిస్ట్రిక్ట్ కోర్టులో హాజరుపరచనున్నారు. ఘటనకు దారితీసిన కారణాలు, హత్యల్లో ఉపయోగించిన ఆయుధం, అర్జున్ ప్రవర్తనకు సంబంధించిన ఇతర అంశాలపై పోలీసులు దర్యాప్తు కొనసాగిస్తున్నారు.
