ఇంతకాలం నా ఆత్మకథను వేరే వారు చెప్పారు… ఇప్పుడు నా కథను నేనే చెబుతాను వినండి అంటూ కాంగ్రెస్ పార్టీ నాయకురాలు సోనియాగాంధీ వ్యాఖ్యానించారు. దశాబ్దాలుగా ఇతరులు తన జీవిత కథను తమకు నచ్చినట్లుగా చెబుతూ వచ్చారని, ఇప్పుడు వాస్తవాలను తన మాటల్లో ప్రజల ముందుంచే అవకాశం తనకు వచ్చిందని పేర్కొన్నారు. ‘బిలాంగింగ్‌: ఎ జర్నీ ఆఫ్‌ లవ్‌’ పేరుతో ఈ పుస్తకం ప్రచురితం కానుంది.
సోనియా గాంధీ తన రాబోయే ఆత్మకథపై ఆసక్తికర వ్యాఖ్యలు సామాజిక మాధ్యమం ఎక్స్‌లో పోస్టు చేశారు. దానికి జత చేసిన వీడియోలో తన ఆత్మకథ రాయడానికి దారితీసిన పరిస్థితులను వివరించారు. “ఈ పుస్తకం బయటకు వచ్చినప్పుడు కొంత రచ్చ జరగడం ఖాయం. ఇన్నేళ్లుగా ఇతరులు నా కథను చెబుతూ వచ్చారు. ఇప్పుడు నా వంతు వచ్చింది” అని ఆమె వ్యాఖ్యానించారు.
ఈ పుస్తకాన్ని ఇతరుల అభిప్రాయాలతో పోల్చి చూడకూడదని కూడా సోనియా స్పష్టం చేశారు. ఇది తన దృష్టిలో జరిగిన సంఘటనల కథనమని, పాఠకులకు భిన్నమైన అభిప్రాయాలు ఉండవచ్చని అన్నారు. ఈ పుస్తకం చదివిన తర్వాత కొందరికి తనపై ఉన్న అభిప్రాయం మారవచ్చని, మరికొందరికి మరింత ప్రతికూల అభిప్రాయం ఏర్పడవచ్చని పేర్కొన్నారు. అయితే, తన జ్ఞాపకాల ప్రకారం వాస్తవాలను వివరించడమే తన ఉద్దేశమని తెలిపారు.
తన భర్త, మాజీ ప్రధానమంత్రి రాజీవ్‌ గాంధీ ప్రధానమంత్రి పదవిని చేపట్టే విషయంలో తాను మొదటి నుంచీ వ్యతిరేకంగా ఉన్నానని సోనియా గుర్తుచేసుకున్నారు. రాజీవ్‌ గాంధీని ప్రధానమంత్రి పదవి చేపట్టాలని కోరినప్పుడు తాను అందుకు పూర్తిగా వ్యతిరేకించానని తెలిపారు. తన జీవితానికి సంబంధించి గతంలో ఎన్నో కథనాలు, పుస్తకాలు వెలువడ్డాయని, వాటిలో కొన్ని వాస్తవాలకు దూరంగా ఉన్నాయని, మరికొన్ని కల్పితమైనవి లేదా వాస్తవాలను అతిశయోక్తులతో చిత్రీకరించినవని ఆమె అభిప్రాయపడ్డారు. అందుకే తన జీవితంలో జరిగిన సంఘటనలను యథార్థంగా నమోదు చేయాలనే ఉద్దేశంతో ఈ పుస్తకాన్ని రాయాలని నిర్ణయించుకున్నట్లు వెల్లడించారు.
ఇటలీలో ఆమె బాల్యం, రాజీవ్‌ గాంధీతో పరిచయం, ప్రేమ, వివాహం, ఆ తర్వాత జీవితంలో ఎదురైన వ్యక్తిగత విషాదాలు, చివరకు రాజకీయాల్లోకి ప్రవేశించిన పరిణామాలను ఇందులో పొందుపరిచినట్లు సమాచారం. భారత రాజకీయాల్లో అత్యంత ప్రభావవంతమైన నాయకుల్లో ఒకరిగా ఎదిగిన సోనియా వ్యక్తిగత జీవితం, రాజకీయ అనుభవాలపై ఈ పుస్తకం వెలువడనుండటంతో రాజకీయ వర్గాల్లో ఆసక్తి నెలకొంది.
ఈ ఆత్మకథ ప్రచురణ విషయంలో గతంలో వివాదం కూడా తలెత్తింది. తొలుత భారతదేశంలో ఈ పుస్తకాన్ని ప్రచురించేందుకు పెంగ్విన్‌ ర్యాండమ్‌ హౌస్‌ ఇండియా ముందుకు వచ్చినప్పటికీ, సంపాదకీయ మార్పులకు సంబంధించిన చర్చల నేపథ్యంలో ఆ సంస్థ ఈ ప్రాజెక్టును చేపట్టలేదు. ప్రధానమంత్రి నరేంద్ర మోదీ, రాష్ట్రీయ స్వయంసేవక్‌ సంఘ్‌ (ఆర్‌ఎస్‌ఎస్‌), చైనా చొరబాట్లకు సంబంధించిన అంశాలు వివాదాస్పదంగా మారాయని కాంగ్రెస్ నాయకులు ఆరోపించారు. అయితే, వాస్తవ నిర్ధారణ, సంపాదకీయ సూచనలు ప్రచురణ ప్రక్రియలో సాధారణ భాగమేనని పెంగ్విన్‌ పేర్కొంది.
ఆ తర్వాత హార్పర్‌కోలిన్స్‌ ఇండియా ఈ పుస్తకాన్ని భారతదేశంలో ప్రచురించనున్నట్లు ప్రకటించడంతో విడుదలపై నెలకొన్న అనిశ్చితికి తెరపడింది. నవంబర్‌ 10న ఈ ఆత్మకథ భారతదేశంలో పాఠకులకు అందుబాటులోకి రానుంది. సోనియా గాంధీ తన జీవితంలోని కీలక ఘట్టాలను ఎలా వివరించారు, గతంలో తనపై వచ్చిన కథనాలపై ఎలాంటి వాస్తవాలను వెల్లడించారు అనే అంశాలపై రాజకీయ వర్గాల్లో ఉత్కంఠ నెలకొంది.
