ఆంధ్రప్రదేశ్ పర్యాటక రంగానికి సరికొత్త ఊపు రానుంది. ఆధ్యాత్మిక రాజధాని తిరుపతి, సాగరతీర నగరం విశాఖపట్నంలను పర్యాటక గమ్యస్థానాలుగా తీర్చిదిద్దేందుకు కేంద్ర ప్రభుత్వం కసరత్తు చేస్తోంది. కేంద్ర ప్రభుత్వ ప్రతిష్టాత్మక ఛాలెంజ్ బేస్డ్ డెస్టినేషన్ డెవలప్మెంట్ కార్యక్రమం కింద ఈ రెండు నగరాలు ఎంపికయ్యే అవకాశాలు కనిపిస్తున్నాయి.
ఈ ప్రాజెక్టు కింద ఎంపికైన ఒక్కో నగరంలో 50 నుంచి 100 ఎకరాల విస్తీర్ణంలో భారీ ఎత్తున పర్యాటక సదుపాయాలను కల్పించనున్నారు. ఇందుకోసం కేంద్ర ప్రభుత్వం ఐదేళ్ల కాలానికి గాను ఒక్కో నగరానికి రూ. 500 కోట్ల చొప్పున, మొత్తంగా రూ. 1,000 కోట్ల భారీ నిధులను అందించనుంది. దీనికి సంబంధించిన అధికారిక ప్రకటన త్వరలోనే వెలువడనుంది.
దేశవ్యాప్తంగా పర్యాటక రంగాన్ని మిషన్ మోడ్లో వేగంగా అభివృద్ధి చేయాలనే పట్టుదలతో కేంద్ర ప్రభుత్వం ఉంది. ఇందులో భాగంగానే స్వదేశ్ దర్శన్ 2.0 పథకం కింద ఛాలెంజ్ బేస్డ్ డెస్టినేషన్ డెవలప్మెంట్ అనే సరికొత్త ఉప పథకాన్ని ప్రవేశపెట్టింది. రాష్ట్రాల మధ్య పోటీ పద్ధతిలో దేశవ్యాప్తంగా అత్యంత ప్రతిభావంతమైన 50 పర్యాటక గమ్యస్థానాలను ఎంపిక చేసి వాటిని సర్వాంగ సుందరంగా తీర్చిదిద్దడమే ఈ స్కీమ్ ముఖ్య ఉద్దేశం.
దేశీయ, విదేశీ పర్యాటకులకు మెరుగైన భద్రత, ప్రపంచ స్థాయి వసతులు, స్థానిక ఆహార సదుపాయాలు, వినూత్న అనుభవాలు, డిజిటల్ సేవల వంటివన్నీ ఒకే చోట సమగ్ర ప్యాకేజీగా అందించాలనేది కేంద్రం మాస్టర్ ప్లాన్. ఈ నేపథ్యంలోనే తిరుపతి, విశాఖ నగరాల్లో పర్యాటక సమగ్రాభివృద్ధికి సంబంధించిన ప్రతిపాదనలు ఇప్పటికే కేంద్రానికి చేరాయి. తిరుపతిలో ఇప్పటికే 50-60 ఎకరాల భూమిని ఒకే ప్రాంతంలో గుర్తించగా, విశాఖలోనూ 50 ఎకరాల ఖాళీ భూమిని సేకరించే పనిలో అధికారులు బిజీగా ఉన్నారు.
ఈ మెగా ప్రాజెక్టులో ముఖ్యంగా గోవా రోడ్ మ్యాప్లో పేర్కొన్న 5 కీలకాంశాలకు కేంద్రం అత్యధిక ప్రాధాన్యత ఇవ్వనుంది. గ్రీన్ టూరిజం , డిజిటలైజేషన్, నైపుణ్యాభివృద్ధి, పర్యాటక ఎంఎస్ఎంఈల బలోపేతం, డెస్టినేషన్ మేనేజ్మెంట్ అనే ఐదు సూత్రాల ఆధారంగానే ఈ రూ. 1,000 కోట్ల నిధులను కేటాయించనున్నారు. రాష్ట్రాలకు జారీ చేసిన తాజా మార్గదర్శకాల్లోనూ కేంద్రం ఇదే విషయాన్ని స్పష్టం చేసింది. కేంద్ర ప్రభుత్వం నుంచి అధికారిక ప్రకటన వెలువడిన వెంటనే, ఈ రెండు నగరాలకు సంబంధించిన సమగ్ర ప్రాజెక్టు నివేదికలను పంపేందుకు ఏపీ పర్యాటక శాఖ సిద్ధమవుతోంది.
ఈ మొత్తం పర్యాటకాభివృద్ధి ప్రాజెక్టులో స్థానికుల భాగస్వామ్యాన్ని కేంద్ర ప్రభుత్వం కీలకాంశంగా పేర్కొంది. ఎంపిక చేసిన ప్రాంతాల్లో అభివృద్ధి పనులు చేపట్టేటప్పుడు స్థానిక అవసరాలు, అక్కడి ప్రజల ఆశయాలు, సాంస్కృతిక విలువలు దెబ్బతినకుండా జాగ్రత్తలు తీసుకోవాలని స్పష్టం చేసింది. అంతేకాకుండా, పర్యాటక రంగంలో ప్రైవేట్ పెట్టుబడులను, భాగస్వామ్యానికి కూడా పెద్దపీట వేయాలని సూచించింది. కేంద్రం గనుక ఈ ప్రాజెక్టును అధికారికంగా ప్రకటిస్తే, భవిష్యత్తులో తిరుపతి, విశాఖ నగరాల పర్యాటక రూపురేఖలు పూర్తిగా మారిపోవడం ఖాయంగా కనిపిస్తోంది.
