తిరుమల శ్రీవారి పరకామణి చోరీ కేసు వ్యవహారం ఇప్పుడు కీలక మలుపు తిరిగింది. ఈ కేసులో రాజీని సవాల్ చేస్తూ హైకోర్టులో పిటిషన్ దాఖలు చేసిన జర్నలిస్ట్ ఎం. శ్రీనివాసులు తనకు ప్రాణహాని ఉందని ఆందోళన వ్యక్తం చేశారు. కేసులో ప్రధాన ఫిర్యాది అయిన మాజీ ఏవీఎస్ఓ (అసిస్టెంట్ విజిలెన్స్ అండ్ సెక్యూరిటీ ఆఫీసర్) సతీష్ కుమార్ ఇటీవల అనుమానాస్పద రీతిలో మరణించిన నేపథ్యంలో, శ్రీనివాసులు తనకు రక్షణ కల్పించాలని పోలీసులను కోరారు.2023లో జరిగిన పరకామణి చోరీ కేసును అప్పటి అధికారులు లోక్ అదాలత్లో రాజీ చేయడాన్ని సవాల్ చేస్తూ శ్రీనివాసులు హైకోర్టును ఆశ్రయించారు. ఈ కేసులో టీటీడీ ఉద్యోగి సీవీ రవికుమార్ డాలర్లు, బంగారాన్ని అపహరించినట్లు ఫిర్యాదు నమోదైంది. శ్రీనివాసులు పిటిషన్ను విచారించిన హైకోర్టు, లోక్ అదాలత్ రాజీని తప్పుబట్టి, దాని ఆదేశాలను నిలిపివేసింది.దీంతో ఈ కేసు విచారణను సీఐడీకి అప్పగించాలని ఆదేశించింది. ప్రస్తుతం హైకోర్టు ఆదేశాల మేరకు సీఐడీ డీజీ నేతృత్వంలో విచారణ కొనసాగుతోంది.ఈ కేసులో కీలక సాక్షి, దొంగతనాన్ని గుర్తించి ఫిర్యాదు చేసిన సతీష్ కుమార్ (మాజీ ఏవీఎస్ఓ) ఇటీవల అనంతపురం జిల్లా తాడిపత్రి సమీపంలో రైల్వే ట్రాక్ వద్ద అనుమానాస్పద స్థితిలో మృతి చెందడం కలకలం రేపింది. సతీష్ను హత్య చేశారని ప్రతిపక్ష పార్టీల నాయకులు ఆరోపిస్తున్నారు. లోక్ అదాలత్లో రాజీకి రావడానికి ఉన్నతాధికారులు తనపై ఒత్తిడి తెచ్చారని సతీష్ కుమార్ విజిలెన్స్ అధికారికి చెప్పినట్లు వార్తలు వచ్చాయి.ఫిర్యాది అయిన సతీష్ కుమార్ మరణించిన నేపథ్యంలో, ఈ కేసును హైకోర్టులో సవాల్ చేసి, మళ్లీ విచారణకు తెరతీసిన ఎం. శ్రీనివాసులు తన ప్రాణాలకు ముప్పు ఉందని పోలీసులకు విజ్ఞప్తి చేశారు. కేసులో ఉన్న నిజాలు బయటకు వస్తాయనే భయంతో తనకు హాని కలిగించే అవకాశం ఉందని ఆయన ఆందోళన చెందుతున్నారు.ఈ పరిణామాల నేపథ్యంలో, శ్రీవారి పరకామణి చోరీ కేసు విచారణ ఇప్పుడు రాష్ట్రంలో చర్చనీయాంశంగా మారింది.
శ్రీవారి పరకామణి చోరీ కేసు: పిటిషనర్ శ్రీనివాసులుకు ప్రాణహాని భయం
