తమిళనాడు రాజకీయాల్లో పెను సంచలనం చోటుచేసుకుంది. రాష్ట్ర మాజీ ముఖ్యమంత్రి, అన్నాడీఎంకే (AIADMK) బహిష్కృత నేత ఓ. పన్నీర్‌సెల్వం (OPS) అధికార పక్షమైన డీఎంకే (DMK)లో చేరారు. శుక్రవారం ఉదయం చెన్నైలోని డీఎంకే ప్రధాన కార్యాలయం ‘అన్నా అరివాలయం’లో ముఖ్యమంత్రి ఎం.కె. స్టాలిన్ సమక్షంలో ఆయన పార్టీ తీర్థం పుచ్చుకున్నారు.
పన్నీర్‌సెల్వంకు స్టాలిన్ స్వయంగా పార్టీ కండువా కప్పి సాదరంగా ఆహ్వానించారు. ఈ సందర్భంగా పన్నీర్‌సెల్వం మాట్లాడుతూ, ‘తాయ్ కళగం’ (తల్లి పార్టీ) అయిన డీఎంకేలోకి తిరిగి రావడం తనకు ఎంతో సంతోషాన్నిస్తోందని, అన్నాదురై స్థాపించిన ఈ పార్టీలో చేరడం గర్వకారణంగా ఉందని పేర్కొన్నారు. ముఖ్యమంత్రి స్టాలిన్‌ను ఆయన ‘దళపతి’ అని సంబోధిస్తూ కృతజ్ఞతలు తెలిపారు.
గత కొంతకాలంగా అన్నాడీఎంకే ప్రధాన కార్యదర్శి ఎడప్పాడి పళనిస్వామి (EPS) తో విభేదాల కారణంగా పార్టీకి దూరమైన ఓపీఎస్, కోర్టుల్లో మరియు ఎన్నికల కమిషన్ వద్ద సుదీర్ఘ పోరాటం చేశారు. అయితే అక్కడ ఆశించిన ఫలితం రాకపోవడం, మరోవైపు వచ్చే ఏప్రిల్-మే నెలల్లో జరగనున్న తమిళనాడు అసెంబ్లీ ఎన్నికల నేపథ్యంలో ఆయన ఈ కీలక నిర్ణయం తీసుకున్నారు. పన్నీర్‌సెల్వం రాకతో దక్షిణ తమిళనాడులో, ముఖ్యంగా ముక్కులతార్ సామాజిక వర్గంలో డీఎంకే బలం మరింత పెరుగుతుందని రాజకీయ విశ్లేషకులు భావిస్తున్నారు.
ఓపీఎస్ అనుచరుల సమాచారం ప్రకారం, ఆయనకు డీఎంకేలో రాష్ట్ర స్థాయి కీలక పదవి దక్కే అవకాశం ఉంది. అలాగే రాబోయే ఎన్నికల్లో ఆయన తన సొంత నియోజకవర్గమైన బోడినాయకనూర్ నుంచే డీఎంకే అభ్యర్థిగా బరిలోకి దిగే అవకాశం ఉన్నట్లు తెలుస్తోంది.
ఇప్పటికే ఆయన ప్రధాన అనుచరులైన ఆర్.వైతిలింగం, మనోజ్ పాండియన్ వంటి నేతలు డీఎంకేలో చేరిన సంగతి తెలిసిందే. ఈ పరిణామం తమిళనాడు రాజకీయ సమీకరణాలను పూర్తిగా మార్చివేసింది, ముఖ్యంగా అన్నాడీఎంకే ఓటు బ్యాంకుపై ఇది తీవ్ర ప్రభావం చూపే అవకాశం ఉంది
.
