రంగారెడ్డి జిల్లాలో కస్టమ్ మిల్లింగ్ రైస్ (సీఎంఆర్) బకాయిల వసూలుపై జిల్లా అదనపు కలెక్టర్ (రెవెన్యూ) కె. చంద్రారెడ్డి మంగళవారం కలెక్టరేట్‌లోని తన ఛాంబర్‌లో బకాయిదారులైన రైస్ మిల్లర్లతో సమావేశం నిర్వహించి సమీక్షించారు. జిల్లాలో సీఎంఆర్‌కు సంబంధించి పెండింగ్‌లో ఉన్న బకాయిల వివరాలను పరిశీలించి, వాటి వసూలు ప్రక్రియను వేగవంతం చేయడంపై చర్చించారు.
ఈ సందర్భంగా అదనపు కలెక్టర్ మాట్లాడుతూ ఖరీఫ్ మార్కెటింగ్ సీజన్ (కెఎంఎస్) 2014-15 నుంచి ఖరీఫ్ 2024-25 వరకు ధాన్యం సేకరణకు సంబంధించి ప్రభుత్వం జారీ చేసిన జి.ఓ.ఎం.ఎస్. నం.17 ప్రకారం రైస్ మిల్లర్ల నుంచి బకాయిలను వసూలు చేయాలని సూచించారు. ప్రభుత్వ నిబంధనలకు అనుగుణంగా బకాయిల చెల్లింపులు జరిగేలా సంబంధిత అధికారులు చర్యలు తీసుకోవాలని ఆదేశించారు. జిల్లాలో బకాయిలు చెల్లించని ప్రతి రైస్ మిల్లర్‌తో అదనపు కలెక్టర్ మాట్లాడి, వారు చెల్లించాల్సిన పెండింగ్ బకాయిల వివరాలను సమీక్షించారు. మిల్లర్ల వారీగా బకాయిల పరిస్థితిని పరిశీలించి, చెల్లింపుల్లో జాప్యానికి సంబంధించిన అంశాలపై చర్చించారు. బకాయిల వసూలును ప్రాధాన్యతగా తీసుకొని, పెండింగ్‌లో ఉన్న మొత్తాలను త్వరితగతిన రాబట్టేందుకు చర్యలు చేపట్టాలని స్పష్టం చేశారు.
బకాయిల చెల్లింపునకు సంబంధించి రైస్ మిల్లర్లకు తుది అవకాశం కల్పిస్తున్నట్లు అదనపు కలెక్టర్ తెలిపారు. సమావేశం జరిగిన తేదీ నుంచి వారం రోజుల్లోగా పెండింగ్ బకాయిలను పూర్తిగా చెల్లించాలని ఆదేశించారు. నిర్ణీత గడువును దృష్టిలో ఉంచుకొని మిల్లర్లు ఎలాంటి జాప్యం చేయకుండా బకాయిల చెల్లింపులను పూర్తి చేయాలని సూచించారు. నిర్ణీత గడువులోగా బకాయిలు చెల్లించని రైస్ మిల్లర్లపై ప్రభుత్వ నిబంధనల ప్రకారం తదుపరి చర్యలు చేపడతామని అదనపు కలెక్టర్ కె. చంద్రారెడ్డి స్పష్టం చేశారు. బకాయిల వసూలు విషయంలో ఎలాంటి నిర్లక్ష్యానికి తావులేకుండా, ప్రభుత్వ నిబంధనలకు అనుగుణంగా చర్యలు కొనసాగిస్తామని తెలిపారు.
