వెండితెరపై తన విలక్షణ నటనతో ప్రేక్షకులను భయపెట్టే ప్రముఖ నటుడు సాయాజీ షిండే, నిజ జీవితంలో మాత్రం పచ్చని ప్రకృతిని కాపాడే గొప్ప యోధుడిగా నిలుస్తున్నారు. సినిమాల్లో బిజీగా ఉంటూనే, ఆయన పర్యావరణ పరిరక్షణ కోసం ‘సహ్యాద్రి దేవ్ రాయ్’ అనే సంస్థను స్థాపించి అలుపెరగని పోరాటం చేస్తున్నారు. ఇప్పటివరకు సుమారు 7 లక్షలకు పైగా మొక్కలను నాటిన ఆయన, కేవలం నాటడమే కాకుండా వాటిని పెంచే బాధ్యతను కూడా తీసుకుంటున్నారు.
రోడ్ల విస్తరణలో భాగంగా నరికివేతకు గురవుతున్న వందల ఏళ్ల నాటి వృక్షాలను శాస్త్రీయ పద్ధతిలో వేర్లతో సహా పెకలించి, ఇతర చోట్ల తిరిగి నాటి (Transplantation) వాటికి పునర్జన్మ ప్రసాదిస్తున్నారు. ఇటీవల 100 ఏళ్ల నాటి మర్రిచెట్టును రక్షించి ఆయన తన నిబద్ధతను చాటుకున్నారు. కేవలం అడవుల పెంపకానికే పరిమితం కాకుండా, సమాజంలో కూడా చైతన్యం తెచ్చేందుకు సాయాజీ షిండే వినూత్న ప్రయోగాలు చేస్తున్నారు.
ఆలయాలకు వచ్చే భక్తులకు దేవుడి ప్రసాదంతో పాటు ఒక మొక్కను కూడా ప్రసాదంగా ఇవ్వాలనే గొప్ప సంప్రదాయానికి ఆయన శ్రీకారం చుట్టారు. ఈ క్రమంలోనే ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ని కలిసి, తెలుగు రాష్ట్రాల్లోని ఆలయాల్లో కూడా ఈ విధానాన్ని అమలు చేయాలని కోరారు.
అభివృద్ధి పేరుతో పర్యావరణాన్ని విస్మరించకూడదని, మనం పీల్చే ప్రాణవాయువుని ఇచ్చే చెట్లు మన కనీస బాధ్యత అని ఆయన గళం ఎత్తుతున్నారు. రీల్ లైఫ్‌లో విలన్ అయినప్పటికీ, రాబోయే తరాలకు స్వచ్ఛమైన గాలిని అందించే ప్రయత్నంలో రియల్ లైఫ్ హీరోగా ఆయన గుర్తింపు పొందుతున్నారు.
