ఢిల్లీ ప్రాంతంలో జరుగుతున్న అత్యాచార సంఘటనలను సీరియస్ గా తీసుకున్న సుప్రీంకోర్టు వాటిని సుమోటోగా స్వీకరించింది. ఢిల్లీలో స్లీపర్ బస్సులో నిద్రించే బాలికపై జరిగిన లైంగిక దాడి సహా పలు ఘటనలను సుప్రీంకోర్టు తీవ్రంగా పరిగణించింది.
జస్టిస్ జేబీ పర్దివాలా నేతృత్వంలోని సుప్రీంకోర్టు ధర్మాసనం ఈ ఘటనలపై తీవ్ర ఆందోళన వ్యక్తం చేసింది. 2012లో దేశవ్యాప్తంగా సంచలనం సృష్టించిన నిర్భయ ఘటనతో ప్రస్తుత పరిణామాలకు బాధాకరమైన పోలికలు కనిపిస్తున్నాయని ధర్మాసనం వ్యాఖ్యానించింది.
చట్టాన్ని అమలు చేయడంలో వ్యవస్థలు విఫలమైనాయనే అంశాన్ని ఈ ఘటనలు స్పష్టంగా తెలియజేస్తున్నాయని ధర్మాసనం పేర్కొంది. పార్కులు, బస్సులు వంటి ప్రజా ప్రదేశాలు తగిన వెలుతురు లేకపోవడం, నిఘా వ్యవస్థలు బలహీనంగా ఉండటం, అవసరమైన పరిపాలనా సదుపాయాలు లేకపోవడం కారణంగా అధిక ప్రమాద ప్రాంతాలుగా మారడానికి అనుమతించకూడదని స్పష్టం చేసింది.
జస్టిస్ జేబీ పర్దివాలాతో పాటు జస్టిస్ కే. వినోద్ చంద్రన్ సభ్యులుగా ఉన్న ధర్మాసనం ఈ కేసును విచారించనుంది. మహిళలు, బాలికల భద్రతకు సంబంధించిన ఇటువంటి ఘటనల్లో చట్ట అమలు వ్యవస్థ, ప్రజా ప్రదేశాల్లో భద్రతా ఏర్పాట్లు, సంబంధిత అధికారుల బాధ్యత వంటి అంశాలను సుప్రీంకోర్టు పరిశీలించే అవకాశం ఉంది.
