నోబెల్ శాంతి బహుమతి కోసం విశేషంగా ప్రయత్నించి విఫలమైన అమెరికా అధ్యక్షుడు డొనాల్డ్ ట్రంప్ సోమవారం ఇజ్రాయెల్ రాజధాని టెల్ అవివ్ సమీపంలోని బెన్ గురియన్ అంతర్జాతీయ విమానాశ్రయానికి చేరుకున్నారు. ఆయనకు ఇజ్రాయెల్ ప్రధాని బిన్యమిన్ నెతన్యాహూ, రాష్ట్రపతి ఐసాక్ హెర్జోగ్, పలు ఉన్నతాధికారులు ఘన స్వాగతం పలికారు. సైనిక బ్యాండ్ ప్రదర్శనల మధ్య విమానాశ్రయం పరిసరాలు ఉత్సాహభరిత వాతావరణాన్ని సంతరించుకున్నాయి.
ప్రజలు జాతీయ జెండాలు ఊపుతూ ట్రంప్‌కు హర్షధ్వానాలతో స్వాగతం పలికారు. ట్రంప్ ఈ సందర్భంగా ఇజ్రాయెల్‌తో అమెరికా స్నేహ బంధం మరింత బలపడుతుందని పేర్కొన్నారు. ఆయన మాట్లాడుతూ “గాజాలో యుద్ధం ముగిసింది. ఇది మధ్యప్రాచ్య శాంతి కోసం కొత్త ఆరంభం. అమెరికా ఈ ప్రాంతంలో శాంతి, భద్రత కోసం కట్టుబడి ఉంది” అని తెలిపారు. ట్రంప్ పర్యటనకు సమాంతరంగా హమాస్ బందీలుగా ఉంచిన కొంతమంది ఇజ్రాయెల్ పౌరులను విడుదల చేసింది.
ఈ పరిణామం గాజా విరమణ ఒప్పందానికి తొలి మెట్టుగా విశ్లేషకులు అభిప్రాయపడ్డారు. విడుదలైన బందీలు ఇజ్రాయెల్ చేరుకున్న వెంటనే వారి కుటుంబ సభ్యులు కంటతడి పెట్టి స్వాగతించారు. ఇజ్రాయెల్ ప్రభుత్వం ఈ విడుదలను “శాంతి దిశగా సానుకూల సంకేతం”గా పేర్కొంది. అమెరికా మధ్యవర్తిత్వంతో ఇజ్రాయెల్–హమాస్ మధ్య కుదిరిన ఒప్పందం ప్రకారం హమాస్ దశలవారీగా బందీలను విడిచిపెడుతుండగా, ఇజ్రాయెల్ కూడా కొంతమంది ప్యాలస్తీనా ఖైదీలను విడుదల చేయనుంది.
ఐక్యరాజ్యసమితి పర్యవేక్షణలో మానవతా సహాయం గాజాలోకి ప్రవేశించే ప్రక్రియ ఇప్పటికే ప్రారంభమైంది. ఇజ్రాయెల్ పర్యటన అనంతరం ట్రంప్ జెరూసలేం పార్లమెంట్ క్నెసెట్‌లో ప్రసంగించనున్నారు. తరువాత ఆయన ఈజిప్ట్‌లోని షార్మ్ ఎల్ షైఖ్‌లో జరిగే మధ్యప్రాచ్య శాంతి సమ్మిట్‌లో పాల్గొననున్నారు. ఈ సమావేశానికి ఐక్యరాజ్యసమితి ప్రతినిధులు, అరబ్ దేశాల నేతలు మరియు యూరోపియన్ యూనియన్ ప్రతినిధులు హాజరుకానున్నారు.
అయితే ఇజ్రాయెల్–హమాస్ మధ్య నమ్మక వాతావరణం పూర్తిగా ఏర్పడలేదని రాజకీయ విశ్లేషకులు చెబుతున్నారు. హమాస్ అంతర్గత వర్గాలు ఒప్పందంపై విభిన్న అభిప్రాయాలు వ్యక్తం చేస్తుండగా, గాజాలో పునర్నిర్మాణం, మానవతా సహాయం పంపిణీ, భద్రతా పునరుద్ధరణ వంటి అంశాలు ముందున్న ప్రధాన సవాళ్లుగా మిగిలి ఉన్నాయి.
