దేశంలోని 31 రాష్ట్రాలు, కేంద్ర పాలిత ప్రాంతాల ముఖ్యమంత్రుల ఎన్నికల అఫిడవిట్లను విశ్లేషించిన అసోసియేషన్ ఫర్ డెమోక్రాటిక్ రిఫార్మ్స్ (ADR) తాజా నివేదిక ఆసక్తికర విషయాలను వెల్లడించింది. ఈ నివేదిక ప్రకారం, నలుగురు ముఖ్యమంత్రులు రూ.100 కోట్లకు పైగా ఆస్తులు ప్రకటించగా, కర్ణాటక ముఖ్యమంత్రి, కాంగ్రెస్ నాయకుడు డీకే శివకుమార్ రూ.1,413 కోట్ల ఆస్తులతో దేశంలోనే అత్యంత ధనిక ముఖ్యమంత్రిగా నిలిచారు.
ఏడీఆర్ విశ్లేషణ ప్రకారం, దేశంలోని 31 మంది ముఖ్యమంత్రుల సగటు ఆస్తుల విలువ రూ.118.07 కోట్లుగా నమోదైంది. మొత్తం 31 మందిలో నలుగురు (సుమారు 13 శాతం) రూ.100 కోట్లకు పైగా ఆస్తులు కలిగిన కోటీశ్వర ముఖ్యమంత్రులుగా ఉన్నారు.
డీకే శివకుమార్ తర్వాత ఆంధ్రప్రదేశ్ ముఖ్యమంత్రి, తెలుగుదేశం పార్టీ అధినేత నారా చంద్రబాబు నాయుడు రూ.931 కోట్ల ఆస్తులతో రెండో స్థానంలో నిలిచారు. తమిళనాడు ముఖ్యమంత్రి సి. జోసెఫ్ విజయ్ రూ.648 కోట్ల ఆస్తులతో మూడో స్థానంలో ఉండగా, అరుణాచల్ ప్రదేశ్ ముఖ్యమంత్రి పెమా ఖండూ రూ.332 కోట్ల ఆస్తులతో నాలుగో స్థానంలో ఉన్నారు.
ఏడీఆర్ నివేదిక ప్రకారం, దేశంలోని 31 మంది ముఖ్యమంత్రుల మొత్తం ప్రకటించిన ఆస్తుల విలువ రూ.3,660 కోట్లుగా ఉంది. అప్పుల విషయంలో కూడా డీకే శివకుమారే అగ్రస్థానంలో ఉన్నారు. ఆయన ప్రకటించిన అప్పులు రూ.265 కోట్లుగా ఉండగా, అరుణాచల్ ప్రదేశ్ ముఖ్యమంత్రి పెమా ఖండూ రూ.180 కోట్ల అప్పులతో రెండో స్థానంలో ఉన్నారు. అసోం ముఖ్యమంత్రి హిమంత బిశ్వ శర్మ రూ.16 కోట్ల అప్పులు ప్రకటించారు. మొత్తంగా 31 మంది ముఖ్యమంత్రుల్లో 11 మంది రూ.1 కోట్లకు పైగా అప్పులు ఉన్నట్లు అఫిడవిట్లలో పేర్కొన్నారు.
అత్యల్ప ఆస్తులు ప్రకటించిన ముఖ్యమంత్రుల్లో జమ్మూ కాశ్మీర్ ముఖ్యమంత్రి ఒమర్ అబ్దుల్లా రూ.55 లక్షల ఆస్తులతో అట్టడుగు స్థానంలో నిలిచారు. ఆయన ఎలాంటి స్థిరాస్తులు లేవని అఫిడవిట్లో పేర్కొన్నట్లు ఏడీఆర్ వెల్లడించింది.
పశ్చిమ బెంగాల్ ముఖ్యమంత్రి సువేందు అధికారి రూ.85 లక్షల ఆస్తులతో రెండో స్థానంలో ఉండగా, రాజస్థాన్ ముఖ్యమంత్రి భజన్ లాల్ శర్మ రూ.1 కోటి ఆస్తులతో తదుపరి స్థానంలో ఉన్నారు.
ఈ నివేదిక కోసం రాష్ట్రాలు, కేంద్ర పాలిత ప్రాంతాల ప్రస్తుత ముఖ్యమంత్రులు తమ చివరి ఎన్నికల సమయంలో ఎన్నికల సంఘానికి సమర్పించిన స్వీయ అఫిడవిట్లలోని వివరాలను ఏడీఆర్ విశ్లేషించింది.
