అన్ని ఉద్యోగాలకు నిర్దిష్టమైన పని వేళలు ఉంటాయని, పోలీసులకు మాత్రం పని వేళల కంటే బాధ్యతే ముఖ్యమని రాష్ట్ర ఆర్థిక మంత్రి పయ్యావుల కేశవ్ అన్నారు. అనంతపురంలోని పోలీస్ ట్రైనింగ్ సెంటర్లో సివిల్ కానిస్టేబుళ్ల 2025–26 బ్యాచ్ పాసింగ్ అవుట్ పరేడ్ ఘనంగా నిర్వహించారు. ఈ కార్యక్రమానికి ఆయన ముఖ్య అతిథిగా హాజరై శిక్షణ పూర్తి చేసుకున్న కానిస్టేబుళ్లను అభినందించారు.
ఈ సందర్భంగా మంత్రి పయ్యావుల కేశవ్ మాట్లాడుతూ ఖాకీ యూనిఫామ్ అధికారంతో పాటు ఎంతో బాధ్యతను కూడా కల్పిస్తుందని అన్నారు. రోడ్లపై విధులు నిర్వహించే పోలీసులే ప్రజలకు ప్రత్యక్షంగా కనిపించే ప్రభుత్వ ప్రతినిధులని పేర్కొన్నారు. పోలీసులు వ్యవహరించే విధానంపైనే ప్రభుత్వానికి పేరు వస్తుందని చెప్పారు.
ప్రమాదాలను సైతం ఎదుర్కొంటూ విధులు నిర్వహించే పోలీసులు సమాజానికి రక్షణ కల్పిస్తున్నారని తెలిపారు. పోలీసులు కాపలా కాస్తున్నారు కాబట్టే ప్రజలు పండుగలను ప్రశాంతంగా జరుపుకుంటున్నారని, రాత్రివేళ హాయిగా నిద్రపోతున్నారని పేర్కొన్నారు.
పోలీసుల త్యాగంతో పాటు వారి కుటుంబాల త్యాగాన్ని కూడా సమాజం గుర్తించాలని పయ్యావుల కేశవ్ అన్నారు. సమాజం ప్రశాంతంగా ఉందంటే దాని వెనుక ఎంతోమంది చేసిన త్యాగాలు ఉన్నాయని చెప్పారు. ప్రతి యూనిఫామ్ వెనుక ఒక మంచి పోలీసు ఉన్నాడనే విషయాన్ని గుర్తుంచుకోవాలని కొత్తగా బాధ్యతలు చేపట్టనున్న కానిస్టేబుళ్లకు సూచించారు.
రౌడీలు, నేరస్థులు మాత్రమే పోలీసులను చూసి భయపడే విధంగా విధులు నిర్వహించాలని మంత్రి సూచించారు. బాధితులకు నమ్మకం కల్పించేలా మానవత్వంతో, బాధ్యతతో పనిచేయాలని అన్నారు. సమాజానికి బాధ్యతగా సేవ చేస్తూ రాష్ట్రానికి మంచి పేరు తీసుకురావాలని ఆకాంక్షించారు.
ప్రస్తుత కాలంలో పోలీసింగ్ విధానం పూర్తిగా మారుతోందని, సైబర్ నేరాలు రోజురోజుకూ పెరుగుతున్నాయని పయ్యావుల కేశవ్ తెలిపారు. నేరాలను సమర్థంగా అరికట్టాలంటే పోలీసులు సాంకేతిక పరిజ్ఞానాన్ని నిరంతరం నేర్చుకుంటూ తమను తాము నవీకరించుకోవాల్సిన అవసరం ఉందన్నారు. నేరస్థుల కంటే ముందుండేలా సాంకేతిక పరిజ్ఞానాన్ని ఉపయోగించుకోవాలని సూచించారు.
పోలీసు యూనిఫామ్ ప్రజల్లో నమ్మకాన్ని, పోలీసుల్లో బాధ్యతను కల్పిస్తుందని మంత్రి అన్నారు. బాధితులకు అండగా నిలిచి, ప్రజలకు భరోసా కల్పించే విధంగా విధులు నిర్వహించాలని సూచించారు. ఈ స్థాయికి తీసుకురావడానికి ఎంతో కష్టపడిన తల్లిదండ్రులను ఎప్పటికీ మర్చిపోవద్దని కొత్త కానిస్టేబుళ్లకు హితవు పలికారు.
అనంతపురం పోలీస్ ట్రైనింగ్ సెంటర్ నుంచి రాష్ట్రంలోనే అతిపెద్ద బ్యాచ్ పాసింగ్ అవుట్ అవుతుండటం గర్వకారణమని మంత్రి పయ్యావుల కేశవ్ అన్నారు. శిక్షణ పూర్తిచేసుకున్న ప్రతి ఒక్కరూ ప్రజల విశ్వాసాన్ని నిలబెట్టేలా, అందరూ గర్వపడేలా పనిచేయాలని ఆకాంక్షించారు.
