డ్రోన్లు, తక్కువ ఎత్తులో దాడులకు వచ్చే శత్రు విమానాలు, హెలికాప్టర్ల నుంచి రక్షణ సామర్థ్యాలను మరింత బలోపేతం చేయడానికి భారత సైన్యం కీలక నిర్ణయం తీసుకునే దిశగా అడుగులు వేస్తోంది.
సుమారు 250 లాంచర్లు, 5,000 వెర్బా మ్యాన్‌ప్యాడ్స్ క్షిపణులను కొనుగోలు చేయాలనే ప్రతిపాదనను రక్షణ శాఖ పరిశీలిస్తోంది. ఈ ప్రతిపాదన వచ్చే నెలలో రక్షణ మంత్రి రాజ్ నాథ్ సింగ్ అధ్యక్షతన జరగనున్న డిఫెన్స్ అక్విజిషన్ కౌన్సిల్ సమావేశంలో చర్చకు వచ్చే అవకాశం ఉన్నట్లు సమాచారం.
వెర్బా మ్యాన్‌ప్యాడ్స్ అనేది రష్యా అభివృద్ధి చేసిన అత్యాధునిక భుజంపై మోసుకెళ్లి ప్రయోగించగల వాయు రక్షణ క్షిపణి వ్యవస్థ. నాటో దేశాలు దీనిని ఎస్‌ఏ-29 గిజ్మోగా గుర్తిస్తాయి. యుద్ధభూమిలో నేరుగా సైనికులు వినియోగించగల ఈ వ్యవస్థ ప్రధానంగా తక్కువ ఎత్తులో ప్రయాణించే యుద్ధ విమానాలు, హెలికాప్టర్లు, డ్రోన్లు మరియు ఇతర వైమానిక లక్ష్యాలను కూల్చివేయడానికి రూపొందించబడింది.
ఈ క్షిపణి వ్యవస్థ 6.5 కిలోమీటర్ల దూరంలో ఉన్న లక్ష్యాలను ఛేదించగలదు. అలాగే 4.5 కిలోమీటర్ల ఎత్తు వరకు ప్రయాణించే లక్ష్యాలను సమర్థవంతంగా కూల్చివేయగల సామర్థ్యం కలిగి ఉంది. ఆధునిక యుద్ధాల్లో విస్తృతంగా ఉపయోగిస్తున్న డ్రోన్ల ముప్పును ఎదుర్కోవడంలో ఇది కీలక పాత్ర పోషించనుంది.
వెర్బా వ్యవస్థలో అత్యాధునిక ట్రై-బ్యాండ్ సీకర్ సాంకేతికతను ఉపయోగించారు. ఇందులో అల్ట్రావైలెట్, నియర్ ఇన్‌ఫ్రారెడ్, మిడ్ ఇన్‌ఫ్రారెడ్ సెన్సర్లు సమన్వయంతో పనిచేస్తాయి. సాధారణంగా శత్రు విమానాలు క్షిపణులను తప్పుదారి పట్టించేందుకు ఫ్లేర్స్ అనే కాంతి ఉచ్చులను విడుదల చేస్తాయి. అయితే వెర్బా సిస్టమ్‌లోని అధునాతన సీకర్ కారణంగా అలాంటి మోసపూరిత చర్యలను గుర్తించి అసలు లక్ష్యాన్ని ఛేదించే సామర్థ్యం ఉంటుంది.
ప్రతిపాదిత కొనుగోలు ఒప్పందం విలువ సుమారు రూ.1,200 కోట్ల వరకు ఉండవచ్చని అంచనా వేస్తున్నారు. ఈ ప్రాజెక్టులో దేశీయ తయారీకి కూడా ప్రాధాన్యం ఇవ్వాలని కేంద్ర ప్రభుత్వం భావిస్తోంది. ‘మేక్ ఇన్ ఇండియా’ కార్యక్రమంలో భాగంగా భారత్ ఫోర్జ్ ఈ క్షిపణుల తయారీలో భాగస్వామిగా వ్యవహరించే అవకాశం ఉన్నట్లు రక్షణ వర్గాలు పేర్కొంటున్నాయి.
ఇటీవలి కాలంలో ప్రపంచవ్యాప్తంగా చోటుచేసుకున్న యుద్ధాలు, సరిహద్దు ఘర్షణలు ఆధునిక యుద్ధ స్వరూపాన్ని పూర్తిగా మార్చేశాయి. తక్కువ ఖర్చుతో పెద్ద నష్టం కలిగించగల డ్రోన్లు యుద్ధరంగంలో కీలక ఆయుధాలుగా మారాయి. దీంతో సరిహద్దుల్లో విధులు నిర్వహించే సైనికులకు వేగంగా స్పందించే, సులభంగా వినియోగించగల వాయు రక్షణ వ్యవస్థల అవసరం పెరిగింది.
ఈ నేపథ్యంలో వెర్బా మ్యాన్‌ప్యాడ్స్ కొనుగోలు భారత సైన్యానికి వ్యూహాత్మకంగా కీలక బలాన్ని అందించనుంది. ముఖ్యంగా సరిహద్దు ప్రాంతాల్లో డ్రోన్లు, హెలికాప్టర్లు, తక్కువ ఎత్తులో చొరబడే వైమానిక లక్ష్యాలను అడ్డుకోవడంలో ఈ వ్యవస్థ ప్రభావవంతమైన ఆయుధంగా మారుతుందని రక్షణ నిపుణులు అభిప్రాయపడుతున్నారు.
