అమెరికా కాంగ్రెషనల్ రీసెర్చ్ సర్వీస్ (CRS) తాజాగా విడుదల చేసిన నివేదిక పాకిస్థాన్ కేంద్రంగా సాగుతున్న ఉగ్రవాద కార్యకలాపాలపై భారత్ దశాబ్దాలుగా వ్యక్తం చేస్తున్న ఆందోళనలను మరోసారి ధృవీకరించింది. పాకిస్థాన్ భూభాగం నుంచి అనేక ఉగ్రవాద సంస్థలు ఇప్పటికీ యధేచ్ఛగా కార్యకలాపాలు సాగిస్తున్నాయని, ఇవి ప్రధానంగా జమ్మూ కాశ్మీర్‌ను లక్ష్యంగా చేసుకుని భారత్ భద్రతకు పెను సవాలుగా మారాయని ఈ నివేదిక స్పష్టం చేసింది.
ఈ విశ్లేషణ ప్రకారం, భారత్, కాశ్మీర్‌పై దాడులే లక్ష్యంగా పెట్టుకున్న లష్కరే తోయిబా (LeT), జైషే మహమ్మద్ (JeM), హరకతుల్ జిహాద్ ఇస్లామీ (HUJI), హరకతుల్ ముజాహిదీన్ (HuM) హిజ్బుల్ ముజాహిదీన్ వంటి సంస్థలు పాకిస్థాన్ నేలపై తమ నెట్‌వర్క్‌ను కొనసాగిస్తున్నాయి. పాకిస్థాన్ అటు సాయుధ ఉగ్రవాద ముఠాలకు స్థావరంగా ఉండటమే కాకుండా, స్వయంగా వాటి వల్ల హింసను కూడా ఎదుర్కొంటోందని నివేదిక పేర్కొంది. 1980ల నుంచి క్రియాశీలంగా ఉన్న అనేక ఉగ్రవాద ముఠాలు ఇంకా పూర్తిగా తుడిచిపెట్టుకుపోలేదని వెల్లడైంది.
అమెరికా, ఐక్యరాజ్యసమితి ఇప్పటికే వీటిని అంతర్జాతీయ ఉగ్రవాద సంస్థలుగా ప్రకటించినప్పటికీ, పాకిస్థాన్ ప్రభుత్వం చేపట్టిన సైనిక చర్యలు లేదా విధానపరమైన మార్పులు ఈ నెట్‌వర్క్‌లను పూర్తిగా ధ్వంసం చేయడంలో విఫలమయ్యాయి. సరిహద్దుల్లో ఉగ్రవాద మౌలిక సదుపాయాలు ఇంకా అలాగే ఉండటం వల్ల భారత్‌కు ఉగ్రవాద ముప్పు పొంచి ఉందని అమెరికా హెచ్చరించింది. 2025లో పాకిస్థాన్‌లో ఉగ్రవాద సంబంధిత మరణాల సంఖ్య 11 ఏళ్ల గరిష్ట స్థాయికి (సుమారు 4,000 మంది) చేరుకోవడం అక్కడి అస్థిరతకు అద్దం పడుతోంది. ఈ పరిస్థితుల నేపథ్యంలో భారత్ తన సరిహద్దు భద్రతను మరింత కట్టుదిట్టం చేసుకోవాల్సిన అవసరం ఉందని ఈ నివేదిక సూచిస్తోంది.
