అమెరికా అధ్యక్షుడు డోనాల్డ్ ట్రంప్ మనసు మార్చుకున్నారు. రష్యా, ఇరాన్‌లపై ఆంక్షలకు సంబంధించిన చట్టం కింద కొన్ని ఆంక్షలు, పరిమితులు, సుంకాల అమలుకు మినహాయింపు ప్రకటించారు. రష్యా నుంచి ముడి చమురు కొనుగోలు చేస్తున్న దేశాలపై భారీ సుంకాలు విధించేందుకు వీలు కల్పించే చట్టం నేపథ్యంలో ట్రంప్ తీసుకున్న ఈ నిర్ణయం భారత్‌కు కూడా మేలుచేస్తుంది.
రష్యా, ఇరాన్‌లపై ఆంక్షలు విధించేందుకు ఉద్దేశించిన లిండ్సే ఓ. గ్రాహం చట్టం ప్రకారం కొన్ని ఆంక్షలు, పరిమితులు, సుంకాల అమలును ప్రస్తుతానికి నిలిపివేస్తున్నట్లు ట్రంప్ ప్రకటించారు. ఈ మినహాయింపు అమెరికా జాతీయ ప్రయోజనాలకు అవసరమని కాంగ్రెస్‌కు ధ్రువీకరణ సమర్పించినట్లు తెలిపారు. చట్టంలోని 115వ సెక్షన్ అధ్యక్షుడికి ఈ అధికారం కల్పిస్తోంది. అయితే ఈ ప్రకటనతో చట్టంలోని అన్ని ఆంక్షలు పూర్తిగా రద్దయినట్లు భావించరాదు. మినహాయింపు పరిధి, వర్తించే నిబంధనలను బట్టి దాని ప్రభావం మారుతుంది.
రష్యా నుంచి ముడి చమురు, సహజ వాయువును కొనుగోలు చేసే అతిపెద్ద ఐదు దేశాల నుంచి అమెరికాలోకి దిగుమతి అయ్యే వస్తువులపై గరిష్ఠంగా 100 శాతం సుంకాలు విధించేందుకు ఈ చట్టం నిర్దేశిస్తుంది. రష్యా చమురు ఆంక్షలను తప్పించుకునేందుకు సహకరించే దేశాలపైనా ఈ చర్యలు వర్తించేలా చట్టాన్ని రూపొందించారు. భారత్, చైనా వంటి దేశాలపై ఈ నిబంధనల ప్రభావం ఉంటుందనే ఆందోళనలు గతంలో వ్యక్తమయ్యాయి. అయితే అక్టోబర్ 16న జారీ చేసిన ఉత్తర్వు ద్వారా ఈ చట్టం కింద పేర్కొన్న సుంకాల అమలుకు ట్రంప్ మినహాయింపు ఇచ్చారు. ఈ మినహాయింపులు తదుపరి చర్యలు తీసుకునే వరకు కొనసాగుతాయని ఉత్తర్వులో పేర్కొన్నారు.
అమెరికా అధ్యక్షుడు ట్రంప్ నిర్ణయం వెనుక అంతర్జాతీయ ఇంధన పరిస్థితులు కూడా కీలకంగా ఉన్నట్లు తెలుస్తోంది. రష్యా నుంచి అమెరికాకు డీజిల్ సరఫరా చేసే ఒప్పందం కుదిరిన కొద్ది రోజులకే ఈ మినహాయింపు ప్రకటించడం ప్రాధాన్యం సంతరించుకుంది. అమెరికాలో ఇంధన ధరలను అదుపులో ఉంచడం, ప్రపంచ మార్కెట్లకు ఇంధన సరఫరాను కొనసాగించడం ఈ పరిణామంతో ముడిపడి ఉన్నాయని వార్తా కథనాలు విశ్లేషించాయి. ఒకవైపు రష్యా చమురు కొనుగోలు చేసే దేశాలపై ఆంక్షలకు చట్టబద్ధమైన ఏర్పాట్లు చేస్తూనే, మరోవైపు తన దేశ ఇంధన అవసరాల కోసం రష్యాతో ఒప్పందం కుదుర్చుకోవడం అమెరికా విధానంపై చర్చకు దారితీసింది.
