ప్రధాని నరేంద్ర మోదీ ఆదివారం తమిళనాడుకు వచ్చారు. తమిళనాడు రాజధాని చెన్నైలో మెట్రో రైలు రెండో దశలోని తొలి మార్గాన్ని ప్రారంభించేందుకు చెన్నై విమానాశ్రయానికి చేరుకున్న ఆయనకు తమిళనాడు ముఖ్యమంత్రి సి. జోసెఫ్ విజయ్ ఘన స్వాగతం పలికారు.
చెన్నై మెట్రో రైలు రెండో దశలో నాలుగో మార్గానికి చెందిన పూనమల్లి బైపాస్‌ నుంచి వడపళని వరకు నిర్మించిన ఎలివేటెడ్‌ మార్గంలో మెట్రో సేవలను ప్రధాని ప్రారంభించారు. సుమారు రూ.4,900 కోట్ల వ్యయంతో నిర్మించిన ఈ మార్గం దాదాపు 15 కిలోమీటర్ల మేర విస్తరించి ఉంది. ఇందులో మొత్తం 11 మెట్రో స్టేషన్లు ప్రయాణికులకు అందుబాటులోకి వచ్చాయి. చెన్నై పశ్చిమ ప్రాంతాల నుంచి నగరంలోని ఇతర ప్రాంతాలకు ప్రయాణాన్ని సులభతరం చేయడంతో పాటు, రహదారులపై రద్దీని తగ్గించేందుకు ఈ మార్గం దోహదపడనుంది.
ప్రారంభోత్సవం అనంతరం ప్రధాని మోదీ, ముఖ్యమంత్రి విజయ్ కలిసి మెట్రో రైలులో ప్రయాణించారు. ఈ సందర్భంగా మెట్రో ప్రాజెక్టు నిర్మాణం, సేవలు, ప్రయాణికులకు కల్పించిన సౌకర్యాల గురించి అధికారులు ప్రధానమంత్రికి వివరించారు. ఈ మార్గంలో ఆధునిక సంకేత వ్యవస్థలు, ప్రత్యేకమైన సుమారు 3.7 కిలోమీటర్ల డబుల్‌ డెక్కర్‌ నిర్మాణం ఉన్నాయి. చెన్నై నగర రవాణా వ్యవస్థను మరింత బలోపేతం చేయడంలో ఈ ప్రాజెక్టు కీలకంగా నిలవనుంది.
మెట్రో రైలు ప్రారంభోత్సవంతో పాటు తమిళనాడులో రహదారులు, రైల్వేలు, ఓడరేవులు, విద్య, ఇతర మౌలిక సదుపాయాలకు సంబంధించిన పలు అభివృద్ధి కార్యక్రమాల్లోనూ ప్రధాని మోదీ పాల్గొన్నారు. రాష్ట్రంలో రూ.13,000 కోట్లకు పైగా విలువైన ప్రాజెక్టులకు శంకుస్థాపనలు, ప్రారంభోత్సవాలు, జాతికి అంకితం చేసే కార్యక్రమాలు ఈ పర్యటనలో భాగంగా చేపట్టారు.
