ఉత్తరాది రాష్ట్రాలు దారుణమైన చలి పరిస్థితులను ఎదుర్కుంటున్నాయి. అనేక ప్రాంతాలలో ఎన్నడూ లేనంత కనిష్ట స్థాయికి రాత్రి ఉష్ణోగ్రతలు చేరుకున్నాయి. చండీగఢ్లో సోమవారం తీవ్ర చలి పరిస్థితులు నెలకొన్నాయి. పలువురు వాతావరణ కేంద్రాల్లో కనిష్ఠ ఉష్ణోగ్రత సుమారు 3.3 డిగ్రీల సెల్సియస్కు పడిపోయి, 2023 తర్వాత జనవరిలో ఇదే అత్యంత చలి రోజు గా నమోదైంది. ఉష్ణోగ్రతలు ఒక్కసారిగా పడిపోవడంతో జనం ఉక్కిరిబిక్కిరి అవుతున్నారు.
ఉదయం గడ్డకట్టే చలితో ప్రారంభం అవుతున్నది. హర్యానాలోని గురుగ్రామ్ అత్యంత చలిగా మారి అక్కడ కనిష్ఠ ఉష్ణోగ్రత 0.6 డిగ్రీల సెల్సియస్గా నమోదైంది. భారత వాతావరణ శాఖ (IMD) ప్రకారం, కనిష్ఠ ఉష్ణోగ్రత 10 డిగ్రీల సెల్సియస్ కంటే తక్కువగా ఉండి, సాధారణ స్థాయికి 4.5 నుంచి 6.4 డిగ్రీలు తక్కువగా నమోదైతే ‘చలి అల’ (కోల్డ్ వేవ్)గా ప్రకటిస్తారు.
అదే కనిష్ఠ ఉష్ణోగ్రత 2 డిగ్రీల సెల్సియస్ లేదా అంతకంటే తక్కువకు పడిపోతే ‘తీవ్ర చలి అల’గా గుర్తిస్తారు. వాతావరణ శాఖ అధికారులు తెలిపిన వివరాల ప్రకారం, రాబోయే కొన్ని రోజులు రాత్రివేళలు చలిగానే కొనసాగనున్నప్పటికీ, మధ్యాహ్నాల సమయంలో ఎండపాటు వాతావరణం కనిపించే అవకాశం ఉంది. ఈ శీతాకాలంలో తొలిసారిగా చండీగఢ్లో కనిష్ఠ ఉష్ణోగ్రత 3.3 డిగ్రీల సెల్సియస్గా నమోదైంది.
ఇది ఆదివారం రాత్రి నమోదు అయ్యింది. శనివారం రాత్రి నగరంలో కనిష్ఠ ఉష్ణోగ్రత 4 డిగ్రీల సెల్సియస్గా ఉంది. గత సంవత్సరం జనవరిలో చండీగఢ్లో అత్యల్ప ఉష్ణోగ్రత 6 డిగ్రీలు మాత్రమే, అది జనవరి 27న నమోదైంది. 2024లో అయితే జనవరి 16న ఉష్ణోగ్రత 2.7 డిగ్రీల సెల్సియస్కు పడిపోయింది. దట్టమైన నుంచి అత్యంత దట్టమైన పొగమంచు మరియు కొన్ని ప్రాంతాల్లో చలి అల పరిస్థితుల దృష్ట్యా IMD యెల్లో అలర్ట్ జారీ చేసింది. ఇది మరో వారం పాటు కొనసాగనున్నట్లు తెలిపింది.
ట్రైసిటీ ప్రాంతంలో వాతావరణం పొడిగానే ఉండే అవకాశం ఉంది. వర్ష సూచనలు లేవు. కనిష్ఠ ఉష్ణోగ్రతల్లో పెద్దగా మార్పు ఉండకపోవచ్చని అంచనా. పంజాబ్, హర్యానాలోని పలుచోట్ల కూడా ఆదివారం తీవ్ర చలి ప్రభావం కనిపించింది. అక్కడ కనిష్ఠ ఉష్ణోగ్రతలు సాధారణ స్థాయికి కంటే తక్కువగా నమోదయ్యాయి.
ఢిల్లీని వణికిస్తున్న దారుణమైన చలి
ఇదే సమయంలో, ఢిల్లీలో కూడా సోమవారం తీవ్ర చలి నెలకొంది. నగరంలోని పలు వాతావరణ కేంద్రాల్లో కనిష్ఠ ఉష్ణోగ్రత సుమారు 3 డిగ్రీల సెల్సియస్కు పడిపోయి, 2023 తర్వాత జనవరిలో ఇదే అత్యంత చలి రోజు అయింది. IMD గణాంకాల ప్రకారం, 2023 జనవరి 16న ఢిల్లీలో కనిష్ఠ ఉష్ణోగ్రత 1.4 డిగ్రీల సెల్సియస్కు పడిపోయింది.
ఉదయం 8.30 గంటలకు నమోదు చేసిన కేంద్రాల వారీ గణాంకాల్లో, ఢిల్లీలోని ప్రధాన వాతావరణ కేంద్రం సఫ్దర్జంగ్ పరిశీలన కేంద్రంలో కనిష్ఠ ఉష్ణోగ్రత 3.2 డిగ్రీల సెల్సియస్గా నమోదై, ఇది సాధారణ స్థాయికి 4.2 డిగ్రీలు తక్కువగా ఉంది. జాతీయ రాజధానిలో గరిష్ఠ ఉష్ణోగ్రత సుమారు 19 డిగ్రీల సెల్సియస్ వరకు చేరుతుందని IMD అంచనా వేసింది. రాబోయే రెండు రోజుల పాటు ఢిల్లీలో చలి అల పరిస్థితులు కొనసాగవచ్చని తెలిపింది. ఇదిలా ఉండగా, ఢిల్లీలో గాలి నాణ్యత మాత్రం ఇంకా ‘పూర్’ స్థాయిలోనే కొనసాగుతోంది.
