రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత పేదల భూములపై అధికార పార్టీ పెద్దలు గద్దల్లా పడుతున్నారని, నాదర్గుల్లో రూ. 7 వేల కోట్ల విలువైన 373 ఎకరాల ప్రభుత్వ భూమిని కబ్జా చేస్తున్నారని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు సంచలన ఆరోపణలు చేశారు. ఆదివారం తెలంగాణ భవన్లో ఏర్పాటు చేసిన మీడియా సమావేశంలో ఆయన ఈ భూ కుంభకోణానికి సంబంధించిన వివరాలను బయటపెట్టారు.
రెవెన్యూ మంత్రి కుటుంబంపై ఆరోపణలు:
ఈ భారీ కబ్జా వెనుక సాక్షాత్తూ రాష్ట్ర రెవెన్యూ మంత్రి పొంగులేటి శ్రీనివాస్ రెడ్డి కుటుంబ సభ్యులు ఉన్నారని హరీశ్ రావు ఆరోపించారు. నాదర్గుల్ భూములపై కన్నేసిన శిల్పా ఇన్ఫ్రా, శిల్పా రాఘవ ఎల్ఎల్పీ, ఏక్యూ స్క్వేర్ రియల్టర్స్ వంటి కంపెనీల్లో మంత్రి కుమారులు హర్షారెడ్డి, లోహిత్ రెడ్డి డైరెక్టర్లుగా ఉన్నారని కంపెనీల వ్యవహారాల శాఖ వెబ్సైట్ ఆధారాలను ఆయన మీడియాకు చూపారు. రక్షకులే భక్షకులుగా మారి ప్రభుత్వ భూములను కాజేస్తున్నారని మండిపడ్డారు.
న్యాయస్థానాల తీర్పులను బేఖాతరు చేస్తూ:
నాదర్గుల్లోని సర్వే నంబర్ 613 (కొత్త నంబర్ 119) లో ఉన్న భూమి ప్రభుత్వానిదేనని గతంలో సుప్రీంకోర్టు, హైకోర్టులు స్పష్టమైన తీర్పులు ఇచ్చాయని హరీశ్ రావు గుర్తుచేశారు. ఈ భూముల విక్రయాలు చెల్లవని హైకోర్టు డివిజన్ బెంచ్ తేల్చిచెప్పినప్పటికీ, అధికార బలంతో బౌన్సర్లను పెట్టి పేద రైతులపై దాడులు చేయిస్తున్నారని ఆగ్రహం వ్యక్తం చేశారు. తాత ముత్తాతల కాలం నుంచి వ్యవసాయం చేసుకుంటున్న దళిత, బలహీన వర్గాల మహిళా రైతులను రౌడీలతో బెదిరిస్తూ, వారి బోర్లను, కంచెలను ధ్వంసం చేస్తున్నారని ఆవేదన వ్యక్తం చేశారు.
హైడ్రా వైఖరిపై ప్రశ్నలు:
నగరంలో పేదల ఇళ్లను కూలగొట్టే ‘హైడ్రా’కు, అధికార పార్టీ నేతల వేల కోట్ల కబ్జాలు ఎందుకు కనిపించడం లేదని హరీశ్ రావు ప్రశ్నించారు. 373 ఎకరాల్లో ఉన్న 17 ఎకరాల లచ్చమ్మ కుంట (FTL), బఫర్ జోన్లను కంపెనీలు ధ్వంసం చేస్తుంటే హైడ్రా కమిషనర్ రంగనాథ్ ఎందుకు మౌనంగా ఉన్నారని నిలదీశారు. “చెరువులను కాపాడతానని చెప్పే సీఎం రేవంత్ రెడ్డికి ఈ కబ్జాలు కనిపించడం లేదా? పేదోడికి ఒక న్యాయం, పెద్దోడికి ఒక న్యాయమా?” అని ఆయన ధ్వజమెత్తారు.
బీఆర్ఎస్ హెచ్చరిక:
నాదర్గుల్ భూములపై రేపు ఉదయం లోపు హైడ్రా కమిషనర్ చర్యలు తీసుకోకపోతే, బీఆర్ఎస్ ఎమ్మెల్యేలతో కలిసి తామే స్వయంగా క్షేత్రస్థాయికి వెళ్లి బాధితులకు అండగా నిలుస్తామని హరీశ్ రావు హెచ్చరించారు. ముఖ్యమంత్రికి నిజాయితీ ఉంటే తక్షణమే అక్రమంగా నిర్మించిన కాంపౌండ్ వాల్స్ను కూల్చివేసి, కబ్జాదారులను అరెస్ట్ చేయాలని డిమాండ్ చేశారు. పదేళ్ల బీఆర్ఎస్ పాలనలో కంటికి రెప్పలా కాపాడిన భూములను, కాంగ్రెస్ ప్రభుత్వం రాగానే దోచుకుంటున్నారని ఆయన విమర్శించారు.
