రెండు రోజుల పసికందును కన్న తల్లి వేరేవారికి అమ్మేసిన దారుణమైన ఘటన ఇది. ఈ ఘటన పంజాబ్లోని లూధియానాలో జరిగింది. లూధియానాలోని నీలా ఝండా రోడ్ పరిసరాల్లోని ఒక పార్కులో ఒక మహిళ శిశువును చేతుల్లోకి తీసుకుని ఆడిస్తుండగా ఎందుకో అనుమానం వచ్చి స్థానికులు పట్టుకున్నారు. స్థానికుల ప్రశ్నలకు సమాధానం చెబుతూ తాను చేసిన పనిని ఆ మహిళ అంగీకరించడంతో ఈ నేరం బయటపడింది.
ఆమె ఆ శిశువును రూ.2.10 లక్షలకు కొనుగోలు చేసినట్లు ఒప్పుకున్నట్లు సమాచారం. దీంతో స్థానికులు పోలీసులకు సమాచారం అందించారు. పోలీసులు దర్యాప్తు అనంతరం చెప్పిన వివరాల ప్రకారం, ఈ బాలిక ఫిబ్రవరి 13న బాబా థాన్ సింగ్ చౌక్ సమీపంలోని అరోరా నర్సింగ్ హోమ్లో జన్మించింది. అప్పటికి ఆమెకు కేవలం రెండు రోజుల వయస్సే ఉంది.
అరెస్టైన వారిలో శిశువు తల్లి సునీతా దేవి (షేర్పూర్ కలాన్ నివాసి), పర్వీన్ (ఖుద్ మొహల్లా), మన్మీత్ కౌర్ (బీ.ఏ.ఎం.ఎస్ వైద్యురాలు, పంజాబ్ మాతా నగర్), రుచి (దబా రోడ్), మండీప్ కౌర్ (మోగ జిల్లాలోని నంగల్ గ్రామం) ఉన్నారు. సునీతా దేవి అసలు ఉత్తరప్రదేశ్లోని గోరఖ్పూర్కు చెందినవారని పోలీసులు తెలిపారు.
అదనపు డీసీపీ-1 సమీర్ వర్మ మీడియా సమావేశంలో మాట్లాడుతూ, సునీతా దేవికి ఇప్పటికే నాలుగు కుమార్తెలు ఉన్నాయని తెలిపారు. ఐదో సంతానం గర్భంలో ఉన్నప్పుడు ఆమె భర్త అసంతృప్తిగా ఉన్నట్లు సమాచారం. దీంతో శిశువును ఇచ్చివేయాలని ఆమె నిర్ణయించి ఆసుపత్రిలో పనిచేస్తున్న ఆశా అనే నర్సును సంప్రదించినట్లు తెలిపారు.
ఆ నర్సు తన పరిచయస్తురాలు పర్వీన్ను సంప్రదించగా, ఆమె మరో నర్సు గుర్మీత్ కౌర్ను కలిసింది. గుర్మీత్ అమృత్సర్కు చెందిన ఆశా వర్కర్ పమ్మాను సంప్రదించగా, ఆమె డాక్టర్లతో పరిచయాలు ఉన్నాయని తెలిపారు. అనంతరం పమ్మా మన్మీత్ కౌర్కు విషయం తెలియజేసింది. కొనుగోలుదారుడు దొరకకపోవడంతో మన్మీత్ కౌర్ తన పరిచయస్తురాలు రుచిని సంప్రదించింది.
రుచి తనకు పిల్లను దత్తత తీసుకోవాలనే ఆసక్తి ఉన్న మండీప్ కౌర్ను సంప్రదించగా, ఆమె రూ.2.10 లక్షలకు శిశువును కొనుగోలు చేయడానికి అంగీకరించినట్లు పోలీసులు తెలిపారు. ఈ మొత్తం డీల్ ప్రకారం రూ.1.5 లక్షలు తల్లికి, రూ.60 వేల కమిషన్గా మధ్యవర్తులకు ఇవ్వాలని నిర్ణయించినట్లు పోలీసులు వెల్లడించారు.
ఫిబ్రవరి 15న మధ్యాహ్నం నీలా ఝండా రోడ్లోని పార్కులో శిశువును అప్పగించే సమయంలో స్థానికుల అప్రమత్తతతో పోలీసులకు సమాచారం అందింది. అక్కడికి చేరుకున్న పోలీసులు విచారణ చేపట్టగా మొత్తం అక్రమ రవాణా నెట్వర్క్ బయటపడినట్లు తెలిపారు.
ఇప్పటివరకు ఐదుగురిని అరెస్ట్ చేసినట్లు పోలీసులు తెలిపారు. శిశువు జన్మించిన నర్సింగ్ హోమ్ వైద్యుడి పాత్రపై కూడా విచారణ కొనసాగుతోందని, దర్యాప్తులో మరిన్ని వివరాలు బయటపడితే చట్టపరమైన చర్యలు తీసుకుంటామని పోలీసులు పేర్కొన్నారు. ఈ కేసులో మరింత దర్యాప్తు కొనసాగుతోంది.
