ఆఫ్ఘానిస్థాన్‌లో మహిళల హక్కులను పూర్తిగా కాలరాస్తూ తాలిబన్ ప్రభుత్వం ప్రవేశపెట్టిన నూతన శిక్షాస్మృతి (Penal Code) అంతర్జాతీయంగా తీవ్ర కలకలం రేపుతోంది. సుమారు 90 పేజీల నిడివి ఉన్న ఈ వివాదాస్పద చట్టం గృహహింసను పరోక్షంగా చట్టబద్ధం చేస్తోందని మానవ హక్కుల సంఘాలు మండిపడుతున్నాయి.
తాలిబన్ల సుప్రీం లీడర్ హిబైతుల్లా అఖుంద్‌జాదా ఆమోదించిన ఈ నిబంధనల ప్రకారం, భార్యాపిల్లలపై పురుషులు భౌతిక దాడికి పాల్పడవచ్చు. అయితే, ఆ దాడిలో బాధితుల ఎముకలు విరగడం లేదా తీవ్రమైన రక్తస్రావం కానంత వరకు దానిని నేరంగా పరిగణించరు. ఒకవేళ ఎముకలు విరిగినా, ఆ విషయాన్ని బాధితురాలు కోర్టులో నిరూపించగలిగితే మాత్రమే నిందితుడికి గరిష్టంగా 15 రోజుల జైలు శిక్ష విధిస్తారు.
మహిళల స్వేచ్ఛను మరింత అణచివేసేలా ఈ చట్టంలో అనేక కఠిన నిబంధనలు ఉన్నాయి. భర్త అనుమతి లేకుండా బంధువుల ఇంటికి వెళ్లే వివాహితకు మూడు నెలల వరకు జైలు శిక్ష విధించే అవకాశం ఉంది. 2009లో గత ప్రభుత్వం మహిళల రక్షణ కోసం తీసుకొచ్చిన ‘మహిళలపై హింస నిర్మూలన చట్టాన్ని’ తాలిబన్లు పూర్తిగా రద్దు చేశారు.
కొత్త నిబంధనల ప్రకారం, బాధితురాలు కోర్టులో తన గాయాలను న్యాయమూర్తికి చూపేటప్పుడు కూడా శరీరాన్ని పూర్తిగా కప్పి ఉంచుకోవాలనే నిబంధనను చేర్చారు. ఇది న్యాయం పొందే ప్రక్రియను మరింత క్లిష్టతరం చేస్తోంది. ఈ చట్టంపై ఎవరైనా అభ్యంతరాలు వ్యక్తం చేస్తే దానిని నేరంగా పరిగణిస్తామని తాలిబన్ ప్రభుత్వం హెచ్చరించడం అక్కడి మహిళల పరిస్థితిని మరింత దయనీయంగా మార్చింది.
ఈ కొత్త చట్టం సమాజాన్ని కూడా వివిధ తరగతులుగా విభజించింది. మత పెద్దలు, ఉన్నత వర్గాలకు ఒక రకమైన శిక్షలు, సామాన్య ప్రజలకు కఠిన శిక్షలు ఉండేలా నిబంధనలు రూపొందించారు. విదేశీ ప్రభుత్వాలు, ఐక్యరాజ్యసమితి వంటి సంస్థలు ఈ అమానవీయ చట్టాలను తీవ్రంగా ఖండిస్తున్నాయి.
మహిళలను కేవలం పురుషుల ఆస్తిగా పరిగణించే ఈ విధానం ఆఫ్ఘానిస్థాన్‌ను చీకటి యుగంలోకి నెట్టివేస్తోందని సామాజిక విశ్లేషకులు ఆందోళన వ్యక్తం చేస్తున్నారు.
