ప్రస్తుత పరిస్థితుల దృష్ట్యా ప్రయాణికులకు అండగా నిలిచేందుకు యునైటెడ్ అరబ్ ఎమిరేట్స్ (UAE) నుండి భారత్‌కు పలు ప్రత్యేక విమానాలను నడుపుతున్నట్లు స్పైస్‌జెట్ ఎయిర్‌లైన్స్ ప్రకటించింది. ఈ మేరకు సోషల్ మీడియా ప్లాట్‌ఫారమ్ ‘X’ ద్వారా ఎయిర్‌లైన్ అధికారిక ప్రకటన చేసింది.
ప్రయాణికులు ఎటువంటి ఇబ్బందులు లేకుండా తమ గమ్యస్థానాలకు చేరుకోవడానికి, మెరుగైన విమాన సదుపాయం కల్పించడానికి ఈ అదనపు విమానాలను షెడ్యూల్ చేసినట్లు సంస్థ పేర్కొంది. ఇటీవల విమాన ప్రయాణాల్లో ఏర్పడిన అంతరాయాల వల్ల ఇబ్బంది పడుతున్న వారిని ఆదుకోవడంతో పాటు, పెరిగిన ప్రయాణికుల రద్దీని దృష్టిలో ఉంచుకుని ఈ ప్రత్యేక సేవలను ఏర్పాటు చేసినట్లు వెల్లడించింది.
తాజా విమాన షెడ్యూల్‌లు, ప్రయాణ సమాచారం కోసం ప్రయాణికులు నిరంతరం ఎయిర్‌లైన్ ప్రతినిధులతో సంప్రదింపుల్లో ఉండాలని స్పైస్‌జెట్ సూచించింది.
