నాగర్‌కర్నూల్ జిల్లా కందనూల్‌లోని శ్రీ కన్యకా పరమేశ్వరి అమ్మవారి దేవాలయంలో దసరా ఉత్సవాలు ఘనంగా జరుగుతున్నాయి. జగన్మాత శ్రీ వాసవీ కన్యకా పరమేశ్వరి అమ్మవారు నేడు శ్రీ అన్నపూర్ణాదేవి అలంకరణలో భక్తులకు దర్శనమిస్తున్నారు. ఈ సందర్భంగా అమ్మవారి దర్శనానికి భక్తులు తరలివచ్చారు. భక్తులకు అన్ని ఏర్పాట్లు చేసినట్లు ఆలయ కమిటీ నిర్వాహకులు తెలిపారు.
అన్నపూర్ణాదేవి అలంకరణలో కొలువుదీరిన అమ్మవారిని దర్శించుకుని భక్తులు ప్రత్యేక పూజలు నిర్వహించనున్నారు. అన్నపూర్ణాదేవిని అన్నదానానికి, ఐశ్వర్యానికి, సకల శుభాలకు అధిష్ఠాన దేవతగా భక్తులు ఆరాధిస్తారు. అమ్మవారి దివ్య దర్శనంతో ప్రజలకు ఆయురారోగ్యాలు, సుఖసంతోషాలు, అష్టైశ్వర్యాలు కలగాలని నిర్వాహకులు ఆకాంక్షించారు. అన్నపూర్ణేశ్వరి అమ్మవారి అనుగ్రహం సర్వజనులపై ఎల్లవేళలా ఉండాలని ప్రార్థించారు.
ఈ వేడుకలను పట్టణ ఆర్యవైశ్య సంఘం, అమ్మవారి దేవాలయ కమిటీ, ఆర్యవైశ్య సమస్త కమిటీల ఆధ్వర్యంలో నిర్వహిస్తున్నారు.
