మక్కా మదీనాలో దాదాపుగా 4 వేల మంది భారతీయులు చిక్కుకుపోయారు. ఉద్రిక్తతలు, భద్రతాపరమైన ఆందోళనల నేపథ్యంలో పలు విమానయాన సంస్థలు సర్వీసులను నిలిపివేయడంతో వారు స్వదేశానికి తిరిగి రాలేని పరిస్థితి ఏర్పడింది.
ప్రయాణికుల రాకపోకలకు ఇబ్బందులు లేకుండా పెద్ద విమానాలను నడిపేందుకు విమానయాన సంస్థలకు అనుమతి ఇవ్వాలని, సాధారణ సర్వీసులను పునరుద్ధరించడం సాధ్యం కాకపోతే ప్రత్యేక విమానాలను ఏర్పాటు చేయాలని పౌర విమానయాన డైరెక్టరేట్‌ జనరల్‌ (డీజీసీఏ)కు ఎంఐఎం అధినేత, హైదరాబాద్‌ ఎంపీ అసదుద్దీన్‌ ఒవైసీ విజ్ఞప్తి చేశారు.
సౌదీ అరేబియాలో చిక్కుకున్న ఉమ్రా యాత్రికుల తిరుగు ప్రయాణానికి చర్యలు తీసుకుంటున్నట్లు భారత విదేశాంగ మంత్రిత్వ శాఖ వెల్లడించింది. గత వారంలో అందుబాటులో ఉన్న విమాన సర్వీసుల ద్వారా సుమారు 3 వేల మంది యాత్రికులు భారత్‌కు తిరిగి వచ్చారని విదేశాంగ శాఖ అధికార ప్రతినిధి రణధీర్‌ జైస్వాల్‌ తెలిపారు. ఇదే సమయంలో షెడ్యూల్‌ ప్రకారం నడిచిన విమానాల్లో మరో 10 వేల మందికి పైగా యాత్రికులు కూడా స్వదేశానికి చేరుకున్నారని చెప్పారు.
సౌదీ అరేబియాలోని భారత రాయబార కార్యాలయం, జెడ్డాలోని భారత కాన్సులేట్‌ విమానయాన సంస్థలు, పర్యాటక నిర్వాహకులతో నిరంతరం సంప్రదింపులు జరుపుతున్నాయని జైస్వాల్‌ వెల్లడించారు. ఇంకా అక్కడే ఉన్న ఉమ్రా యాత్రికులు వీలైనంత త్వరగా స్వదేశానికి తిరిగి వచ్చేందుకు ఏర్పాట్లపై చర్చలు జరుగుతున్నాయని తెలిపారు. భారతీయులకు అవసరమైన సహాయాన్ని అందించేందుకు దౌత్య కార్యాలయాలు, స్థానిక భారతీయ సమాజానికి చెందిన స్వచ్ఛంద కార్యకర్తలు కృషి చేస్తున్నారని పేర్కొన్నారు.
ఇండిగో సంస్థ రియాద్‌, జెడ్డా, దమ్మామ్‌, మదీనా నగరాలకు వెళ్లే, అక్కడి నుంచి వచ్చే విమానాలను అక్టోబర్‌ 24 వరకు రద్దు చేసింది. ఆకాసా ఎయిర్‌ కూడా రియాద్‌కు విమాన సర్వీసుల నిలిపివేతను అదే తేదీ వరకు పొడిగించింది. ఎయిర్‌ ఇండియా, ఎయిర్‌ ఇండియా ఎక్స్‌ప్రెస్‌ సైతం సౌదీ అరేబియాలోని కీలక మార్గాల్లో కొన్ని విమానాలను రద్దు చేసినట్లు ప్రకటించాయి.
ఈ పరిణామాలతో ప్రయాణికులు తమ తిరుగు ప్రయాణంపై అనిశ్చితిని ఎదుర్కొంటున్నారు. ముఖ్యంగా ఉమ్రా యాత్రికుల వసతి, విమాన టికెట్లు, ప్రయాణ షెడ్యూళ్లు సాధారణంగా ట్రావెల్‌ ఏజెంట్ల ద్వారా ముందుగానే ఖరారు కావడంతో విమానాల రద్దు వారి ఇబ్బందులను మరింత పెంచింది. విమానయాన సంస్థలు నిబంధనలను బట్టి టికెట్ల రీఫండ్‌ లేదా ప్రయాణ తేదీల మార్పునకు అవకాశాలు కల్పిస్తున్నాయి.
భారతీయుల సహాయం కోసం సంప్రదించాల్సిన నంబర్లు:
రియాద్‌లోని భారత రాయబార కార్యాలయం:
– +966-5544 12016
– +966-5421 26784
– సౌదీ అరేబియాలోని టోల్‌ ఫ్రీ నంబర్‌: 800247 1234
– వాట్సాప్‌: +966-53621 6082
జెడ్డాలోని భారత కాన్సులేట్‌:
– +966-12-261 4093
– +966-5561 22301
– వాట్సాప్‌: +966-53620 9704
విమాన సర్వీసులు రద్దయిన ప్రయాణికులు తమ విమానయాన సంస్థలు, ట్రావెల్‌ ఏజెంట్లతో సంప్రదింపులు కొనసాగించాలని భారత దౌత్య కార్యాలయాలు సూచించాయి. చిక్కుకుపోయిన యాత్రికులను సురక్షితంగా స్వదేశానికి తీసుకురావడానికి ఏర్పాట్లు కొనసాగుతున్నాయి.
