ఆంధ్రప్రదేశ్కు కేంద్రప్రభుత్వం మరో గుడ్న్యూస్ చెప్పింది. ఏపీలో ఏకంగా రూ. 30,000 కోట్ల భారీ వ్యయంతో మెగా షిప్ బిల్డింగ్ క్లస్టర్ను ఏర్పాటు చేయనున్నట్లు కేంద్ర మంత్రి సర్బానంద సోనోవాల్ అధికారికంగా వెల్లడించారు. మే నెలలోనే ఈ ప్రతిష్టాత్మక ప్రాజెక్టుకు కేంద్ర మంత్రిమండలి అధికారిక ఆమోదం తెలపనుందని ఆయన స్పష్టం చేశారు.
ఉమ్మడి తిరుపతి, నెల్లూరు జిల్లాల సరిహద్దు ప్రాంతంలోని దుగరాజపట్నం వేదికగా ఈ మెగా నౌకా నిర్మాణ క్లస్టర్ను ఏర్పాటు చేయడానికి కేంద్ర, రాష్ట్ర ప్రభుత్వాలు చకచకా కసరత్తు చేస్తున్నాయి. ఈ భారీ ప్రాజెక్టు కోసం ఏపీ ప్రభుత్వం సుమారు 3,488 ఎకరాల భూమిని కేటాయించనుంది.
ఈ క్లస్టర్ గనుక పూర్తిస్థాయిలో అందుబాటులోకి వస్తే, దేశంలోనే అతిపెద్ద నౌకా నిర్మాణ కేంద్రంగా ఆంధ్రప్రదేశ్ సరికొత్త రికార్డు సృష్టించడం ఖాయంగా కనిపిస్తోంది. ఇందులో కేవలం నౌకల తయారీ మాత్రమే కాకుండా, అంతర్జాతీయ ప్రమాణాలతో భారీ స్థాయిలో షిప్ రిపేర్, మెయింటెనెన్స్ కూడా అందుబాటులోకి రానున్నాయి.
ఈ మెగా ప్రాజెక్టు రాకతో ఏపీ తీరప్రాంతంలో సరికొత్త పారిశ్రామిక విప్లవం ప్రారంభం కానుందని నిపుణులు అంచనా వేస్తున్నారు. ఈ క్లస్టర్ ద్వారా ప్రత్యక్షంగా, పరోక్షంగా దాదాపు 30 వేల మందికి పైగా యువతకు ఉపాధి అవకాశాలు లభించనున్నాయి.
అంతేకాకుండా, నౌకా నిర్మాణానికి అవసరమైన స్టీల్, మెరైన్ ఇంజనీరింగ్, విడిభాగాల తయారీ, పోర్ట్ లాజిస్టిక్స్ రంగాల్లో వందలాది అనుబంధ పరిశ్రమలు ఏపీకి క్యూ కట్టే అవకాశం ఉంది. అంతర్జాతీయ నౌకాయాన సంస్థలు సైతం ఈ క్లస్టర్ వైపు మొగ్గు చూపే అవకాశం ఉండటంతో, రాబోయే రోజుల్లో రాష్ట్రానికి భారీగా విదేశీ పెట్టుబడులు రానున్నాయి.
ముఖ్యమంత్రి నారా చంద్రబాబు నాయుడు అత్యంత ప్రతిష్టాత్మకంగా భావిస్తున్నబ్లూ ఎకానమీ ఆలోచనలకు ఈ ప్రాజెక్టు పెద్ద బూస్ట్లా మారనుంది. రాష్ట్రంలోని సుదీర్ఘ తీర ప్రాంతాన్ని కేంద్రంగా చేసుకుని పారిశ్రామిక అభివృద్ధిని పరుగులు పెట్టించాలన్న కూటమి ప్రభుత్వ లక్ష్యానికి ఇది మరింత బలాన్ని చేకూర్చనుంది.
అయితే ఈ ప్రాజెక్టు వెనుక ఒక ఆసక్తికరమైన వ్యూహాత్మక పరిణామం ఉంది. ఉమ్మడి రాష్ట్ర విభజన చట్టంలో హామీ ఇచ్చిన దుగరాజపట్నం పోర్టు ప్రాజెక్టు పలు సాంకేతిక కారణాల వల్ల సాధ్యం కాకపోవడంతో, దానికి ప్రత్యామ్నాయంగా అంతకంటే 100 రెట్లు భారీ స్థాయిలో ఈ మెగా షిప్ బిల్డింగ్ క్లస్టర్ను అభివృద్ధి చేయాలని కేంద్ర ప్రభుత్వం నిర్ణయించడం విశేషం.
వికసిత్ భారత్ – 2047 విజన్లో భాగంగా, 2047 నాటికి భారతదేశాన్ని ప్రపంచ నౌకా నిర్మాణ రంగంలో టాప్-5 దేశాల్లో ఒకటిగా నిలపాలనే లక్ష్యంతో మోదీ ప్రభుత్వం వ్యూహాత్మకంగా ఏపీని ఎంచుకుంది. ఈ భారీ ప్రాజెక్టు ద్వారా ఆంధ్రప్రదేశ్ దేశ నౌకాశ్రయ, సముద్ర పారిశ్రామిక రంగంలోనే ఒక తిరుగులేని గ్లోబల్ హబ్ లా అవతరించబోతోంది.
