అమెరికా, ఇరాన్ మధ్య కాల్పుల విరమణ ఒప్పందంపై భారత్ హర్షం వ్యక్తం చేసింది. ఈ తాత్కాలిక శాంతి దీర్ఘకాలిక స్థిరత్వానికి దారితీస్తుందని ఆశాభావం వ్యక్తం చేసింది. అదే సమయంలో, ఉద్రిక్తతలను పూర్తిగా తగ్గించడానికి నిరంతర సంభాషణలు, దౌత్యపరమైన చర్యలు అత్యవసరమని స్పష్టం చేసింది.
ఉద్రిక్తతల తగ్గింపు, సంభాషణలు, దౌత్యం ద్వారానే సాధ్యమౌతుందని భారత్ తన స్థిరమైన అభిప్రాయాన్ని మరోసారి తెలియజేసింది. ఇటీవల రోజుల్లో తీవ్రమైన యుద్ధ వాతావరణం నెలకొని, ప్రాంతీయ స్థాయిలో పెద్ద ఎత్తున యుద్ధం జరుగుతుందనే భయాలను ఈ సంఘటనలు రేకెత్తించాయని పేర్కొంది.
అమెరికా-ఇరాన్ మధ్య ఉద్రిక్తతలు పెరగడంతో గల్ఫ్ ప్రాంతంలో కీలక మార్గాలు దెబ్బతిన్నాయి. ముఖ్యంగా ప్రపంచ చమురు సరఫరాలో కీలక పాత్ర పోషించే హోర్ముజ్ జలసంధి మార్గంలో అంతరాయాలు ఏర్పడి, అంతర్జాతీయ వాణిజ్య వ్యవస్థపై తీవ్ర ప్రభావం పడింది. ఈ నేపథ్యంలో కాల్పుల విరమణ ఒప్పందంలో భాగంగా ఆ మార్గాన్ని మళ్లీ తెరవడానికి తీసుకున్న చర్యలను భారత్ స్వాగతించింది.
యుద్ధ ప్రభావంతో “భారీ మానవ నష్టం” మాత్రమే కాకుండా, గ్లోబల్ ఎనర్జీ సరఫరా, వాణిజ్య నెట్వర్క్లు తీవ్రంగా దెబ్బతిన్నాయని పేర్కొంది. ముఖ్యంగా చమురు దిగుమతులపై ఆధారపడే దేశాల కోసం ఈ పరిస్థితి మరింత క్లిష్టంగా మారిందని తెలిపింది.
హోర్ముజ్ జలసంధి ద్వారా నిర్బంధం లేకుండా నౌకాయాన స్వేచ్ఛ కొనసాగాలని భారత్ స్పష్టం చేసింది. ప్రపంచ వాణిజ్యం సాఫీగా సాగడానికి ఇది అత్యంత కీలకమని అభిప్రాయపడింది. ఈ అంశంపై అంతర్జాతీయ సమాజంలో ఉన్న ఆందోళనలను కూడా భారత్ ప్రతిబింబించింది.
