మధ్యప్రాచ్యంలోని ఉద్రిక్త పరిస్థితుల నేపథ్యంలో అంతర్జాతీయ క్రూడ్ ఆయిల్ ధరలు పెరగడంతో, శుక్రవారం ప్రీమియం (హై గ్రేడ్) పెట్రోల్ ధరను లీటరుకు రూ.2 పెంచారు. అలాగే పరిశ్రమలకు సరఫరా చేసే బల్క్ డీజిల్ ధరను సుమారు లీటరుకు రూ.22 పెంచినట్లు సమాచారం. అయితే సాధారణ పెట్రోల్, డీజిల్ ధరల్లో ఎలాంటి మార్పు చేయలేదు.
దేశ రాజధాని ఢిల్లీలో 95 ఆక్టేన్ ప్రీమియం పెట్రోల్ ధర రూ.99.89 నుంచి రూ.101.89కు పెరిగింది. అదే సమయంలో ఇండస్ట్రియల్ వినియోగానికి ఉపయోగించే బల్క్ డీజిల్ ధర రూ.87.67 నుంచి రూ.109.59కు పెరిగింది. అయితే సాధారణ పెట్రోల్ ధర లీటరుకు రూ.94.77గానే ఉండగా, డీజిల్ ధర రూ.87.67గానే కొనసాగుతోంది.
ఇరాన్ యుద్ధ ఉద్రిక్తతల నేపథ్యంలో అంతర్జాతీయ మార్కెట్లో క్రూడ్ ఆయిల్ ధరలు గురువారం బ్యారెల్కు 119 డాలర్ల వరకు చేరి, తరువాత సుమారు 108 డాలర్లకు తగ్గాయి. సాధారణంగా వినియోగించే పెట్రోల్ ఆక్టేన్ రేటింగ్ 91-92 మధ్య ఉండి, సాధారణ వాహనాలకు సరిపోతుంది. ప్రీమియం పెట్రోల్ మాత్రం 95-98 ఆక్టేన్ రేటింగ్ కలిగి ఉండి, అధిక పనితీరు గల ఇంజిన్లకు అనుకూలంగా ఉంటుంది.
ఈ విషయంపై మీడియా సమావేశంలో పెట్రోలియం & నేచురల్ గ్యాస్ మంత్రిత్వ శాఖ జాయింట్ సెక్రటరీ సుజాతా శర్మ మాట్లాడుతూ, సాధారణ పెట్రోల్, డీజిల్ ధరల్లో ఎలాంటి పెంపు లేదని స్పష్టం చేశారు. ప్రీమియం కేటగిరీలో మాత్రమే స్వల్ప పెంపు జరిగిందని, అది మొత్తం విక్రయాల్లో 2-4 శాతం మాత్రమే ఉంటుందని తెలిపారు. “సాధారణ ప్రజలపై భారం పడేలా ఎలాంటి నిర్ణయం తీసుకోలేదు” అని అన్నారు.
పెట్రోల్, డీజిల్ ధరలు ఆయిల్ మార్కెటింగ్ కంపెనీలే నిర్ణయిస్తాయని, ప్రభుత్వం వాటిని నియంత్రించదని ఆమె చెప్పారు. భారత్లో పెట్రోల్ ధరలను 2010లో, డీజిల్ ధరలను 2014లో డీ-రెగ్యులేట్ చేశారు. ప్రస్తుతం గ్లోబల్ ఆయిల్ మార్కెట్లను ప్రభుత్వం దగ్గరగా పర్యవేక్షిస్తున్నప్పటికీ, రిటైల్ ధరలను పెంచే యోచన లేదని తెలిపారు. తాత్కాలికంగా ఖర్చు భారం ఆయిల్ కంపెనీలే భరిస్తాయని చెప్పారు.
దేశంలో Indian Oil Corporation (IOC), Bharat Petroleum Corporation Limited (BPCL), Hindustan Petroleum Corporation Limited (HPCL) వంటి సంస్థలు 2022 ఏప్రిల్ నుంచి రిటైల్ ధరలను స్థిరంగా ఉంచాయి. క్రూడ్ ధరలు పెరిగినప్పుడు నష్టాలను భరించి, తగ్గినప్పుడు లాభాలు పొందుతున్నాయి. భారత్ తన అవసరమైన క్రూడ్ ఆయిల్లో సుమారు 88 శాతం దిగుమతి చేసుకుంటోంది. అలాగే సహజ వాయువు అవసరాల్లో సగం వరకు దిగుమతులపై ఆధారపడుతోంది. వీటిలో ఎక్కువ భాగం హోర్మోజ్ జలసంధి ద్వారా రవాణా అవుతాయి.
ఇరాన్పై అమెరికా, ఇజ్రాయెల్ దాడుల తరువాత ఆ ప్రాంతంలో ఉద్రిక్తతలు పెరగడంతో, హార్ముజ్ జలసంధి వద్ద రవాణా ప్రభావితమైందని సమాచారం. ఇన్సూరెన్స్ కంపెనీలు కవరేజీ ఉపసంహరించుకోవడంతో ఆయిల్ ట్యాంకర్ రవాణా దాదాపు నిలిచిపోయింది.
2022లో రష్యా-ఉక్రెయిన్ యుద్ధం తర్వాత కూడా క్రూడ్ ధరలు బ్యారెల్కు 119 డాలర్ల వరకు పెరిగాయి. ఆర్థిక సంవత్సరం 2023-24లో ఆయిల్ కంపెనీలు రూ.81,000 కోట్ల రికార్డు లాభాలు సాధించాయి. ప్రస్తుత ఆర్థిక సంవత్సరంలో డిసెంబర్ త్రైమాసికంలోనే రూ.23,743 కోట్ల లాభాలు నమోదు చేశాయి.
